Leeqkunan yachayta munanku

¿Bautizanachu huch’uy wawakunata?

▪ Victorian willakun: “John sullk’achaymantan llakikuq kani limbopi kasqanmanta”, nispa. ¿Imarayku? “Johnqa mana bautizakuspan wañupurqan chaymi huk cura nirqan: ‘Wiñaypaqmi limbopi kanqa’, nispa”. ¡Chaychá Victoriaqa anchata llakikurqan! ¿Yachachinchu Biblia mana bautizasqa wawakuna wiñaypaq huchachasqa kanankuta?

Bibliaq nisqan hina cristianokunaqa bautizakunankun. Jesuspunin kamachirqan: “Rispa llapa suyu runakunata yachachimuychis, yachachisqaykuna kanankupaq, hinaspa Yayaq, Churiq, Santo Espirituq sutinpi paykunata bautizamuychis. Qankunaman lliw kamachisqaykunata paykunaman yachachimuychis”, nispa (Mateo 28:19, 20). Chay textopi nisqan hina bautizakuyta munaqqa Jesustan reqsinan, yachachisqan kanan, yupintataq qatikunan. Chaytaqa manan huk huch’uy wawaqa ruwayta atinmanchu.

Chhaynaña kaqtinpas runakunan ninku: “Bautizakuymanta Jesuspa kamachisqanqa llapanchispaqmi huch’uy wawakunapaqpas”, nispa. Luterano Richard P. Bucher pastormi nirqan: “Llapankun bautizasqa kananku wawakunapas. [...] Mana hinaqa manan huchankumanta panpachasqachu kanqaku wiñaypaqtaqmi ñak’arinqaku”, nispa. Chay nisqankuqa manan tupanchu Jesuspa kinsa yachachiyninkunawan.

Hukninkaq, Jesusqa manan hayk’aqpas yachachirqanchu huch’uy wawakuna bautizaymanta. ¿Imaraykun chaymanta yachay allinpuni? Jesusqa allintan qatikuqninkunaman yachachirqan imatas ruwananku Diosta servinankupaq chayta. Chaymi Diospa yachachiyninkunata yapa-yapamanta allinta entiendechirqan (Mateo 24:42; 25:13; Marcos 9:34-37; 10:35-45). Chhaynaqa, ¿imaraykun mana huk kutillatapas wawakuna bautizakunankumanta rimarqanchu? ¿Qonqapurqanchu? Manan. Sichus wawakunaq bautizakuynin importante kanman chayqa, willanmanmi karqan.

Iskaykaq, Jesusqa manan hayk’aqpas yachachirqanchu wañuqkuna ñak’arichisqa kanankumantaqa. Aswanpas Eclesiastés 9:5 textoq nisqanpin iñirqan, chaypin nin: “Kawsashaqkunaqa yachankun wañukapunankuta, wañukapuqkunan ichaqa mana imatapas yachankuchu”, nispa. Chaypi nisqan hina wañuqkunaqa manan infiernopichu, purgatoriopichu, limbopichu nitaq maypichu ñak’arishanku. Chayraykun wañuytaqa puñuywan rikch’anachirqan (Juan 11:1-14).

Kinsakaqpitaq yachachirqan, “aya p’ampanakunapi lliw kaqkuna” kawsarimpunanta (Juan 5:28, 29). Chaypiqa waranqanpi mana bautizasqa runakunapas kawsarimpunqakun. Hinaspan Diospa kamachikuyninkunamanta yachanqaku wiñaypaqtaqmi kay pacha sumaq paraisoman tukuqtin kawsanqaku (Salmo 37:29). *

Pisillapi: Bibliaqa manan maypipas ninchu: “Huch’uy wawakunata bautizananku” nispaqa.

[Uranpi willakuy]