¿Diospa castigonchu?

2011 watapi marzo killapin Japón llaqtapi sinchi pacha chhaphchiy hinallataq lamar qochaq phoqchirqamusqan qhepaman, huk allin reqsisqa político nirqan: “Sonqoymi nanawan chay sasachakuypi ñak’ariqkunamanta, ichaqa Diospa castigonchus hina chayqa”, nispa.

2010 watapi enero killapi Haití nacionpi 220.000 runakuna pacha chhaphchiypi wañurqanku, chaymi televisionpi predicaq runa nirqan: “Saqrawan rimanakusqankuraykun chayqa sucederqan, chaymi Diosman kutirikunanku”, nispa.

Manila llaqtapin (Filipinas) 79 runakuna sarunakuspa wañurqanku, chaymi huk católico cura nirqan: “Diosmi mana sienteq mana uyarikuq conciencianchisman chayayta munan”, nispa. Huk periódico willarqan: “Pachakmanta iskay chunka hukniyoq runakunan lloqllakunata, hatun wayrakunata hukkunatapas Diospa phiñakuyninta hina qhawarinku”, nispa. Chaykunan llaqtantinta sasachakuyman apan.

ÑAWPA tiempomantañan runakunaqa ninku: “Pacha chhaphchiykunawan, tutuka wayrakunawan lloqllakunawan hukkunapiwanmi Diosqa millay runakunata ñak’arichishan”, nispa. 1755 watapi Lisboa llaqtapi pacha chhaphchiy, lamar qocha phoqchirisqan nina ruphaykuypi ima 60.000 runakuna wañurqanku. Chay qhepamanmi yuyaysapa Voltaire runa tapukun: “¿Lisboa runakuna Londres, París runakunamanta aswan huchasapachu karqanku?” nispa. Millonninpi runakunan tapukunku: “¿Dioschu ñak’arichishan millay runakunata chaykunata apamuspa?” nispa. Chaymi askha nacionkunapi runakuna ninku: “Diospa munayninmi chayqa”, nispa.

Chaykunata yachaspan tapukunchis: “¿Runakunata ñak’arichinanpaqchu Dios chaykunata apamun? Ñak’ariykunaq kasqan, ¿Diospa castigonchu?” nispa.

Wakin runakunaqa Bibliapi kaq willakuykunata qhawarichispan Diosta tunpanku pacha chhaphchiykunawan, lloqllakunawan otaq hukkunawanpas runakuna castigasqanta (Génesis 7:17-22; 18:20; 19:24, 25; Números 16:31-35). Ichaqa chaykunamanta yachaymi sut’inchawasun imaynatas Dios millay runakunata castigan chayta. Ñawpaqtaqa manaraq castigashaspan willachirqan. Iskaypitaq, Diosqa manan millay runakunawan allin runakunawan kuskataqa wañuchirqanchu. Huchankumanta mana kutirikuqkunata willachisqanta mana uyarikuqkunatawanmi wañuchirqan. Kinsapitaq, Diosqa salvarqanpunin mana huchayoqkunata (Génesis 7:1, 23; 19:15-17; Números 16:23-27).

Manan Dioschu apamun pacha chhaphchiykunata lloqllakunataqa. Chhaynaqa, ¿imarayku chaykuna yapakushan? ¿Imatan ruwasunman chhayna sasachakuypi tarikuspa? ¿Hayk’aqllapas tukukunqachu? Qatimuqpi yachasun.