¿Imaraykun allinpuni Bibliaq kamachikuyninta kasukuy?

¿MANAÑACHU kay tiempopaq hina warmi-qhari puñuymanta Bibliaq nisqan? Bibliaq nisqanqa tukuy tiempopaqmi. Chaypi kamachikuykunaman hina kawsaqkunaqa kay hina sasachakuykunamantan ayqenku:

▪ Onqoykunamanta

▪ Mana munashaspa wawayoq kaymanta

▪ Warmi-qhari t’aqanakuymanta

▪ Mana allin concienciamanta

▪ Mana allinpaq qhawarikuymanta

Jehová Diosmi Kamawaqninchis chaymi tukuy imaymana qowasqanchiswan kusisqa kawsananchista munan. * Isaías 48:17 textopi nisqan hina Diosqa allinninchispaqmi yachachiwanchis. Chayman hina kawsaqkunaqa khayna allinpin tarikunku:

▪ Diospa allin qhawarisqanmi kanku

▪ Thakpi kawsanku

▪ Esposankuwan, qosankuwan sumaqta kawsanku

▪ Hukkunapas allinta qhawarinku

▪ Paykuna kikinku allin sientekunku

¿Diospa nisqanman hinachu kawsashanchis? ¿Cambiasunmanchu imayna kawsasqanchista? ¿Huchachawasunchu Dios ñawpaqpi imayna kawsasqanchismanta?

Ñawpa tiempo cristianokunapi yuyaykusun. Manaraq Diosta reqsishaspan wakinqa qhelli huchapi, wasanchaypi puriqku, warmiman otaq qhariman tukuspa kawsaqku ichaqa cambiarqankun, allinninkupaqtaq karqan (1 Corintios 6:9-11). Kay tiempopipas chay hinatan askha runakuna cambiarqanku. Chay  runakunaqa warmi-qhari puñuymanta Bibliaq nisqanman hinan kawsayta qallarirqanku hinan ñawpaqpi imayna kawsasqankuta saqepurqanku. Llapallankun yacharqanku chay ruwasqankuqa allinninkupaq kasqanta, Paola sipaspas chaytan yacharqan.

“Thakmi sientekurqani”

Paolan repararqan munasqanman hinalla kawsasqanqa mana cheqaq kusikuytachu apamusqanta. Paymi nin: “Mana concienciayoqmanmi tukupurqani ichaqa p’enqakuqmi kani chhayna kawsasqaymanta manchasqataq kaq kani wiksayoq rikhurinaymanta otaq ima onqoywanpas contagiakunaymanta. Diospiqa creeshallaqmi kani yacharqanitaq millay kawsayniywan sonqonta k’irisqayta. Sonqoypin ancha qhelli sientekuq kani”, nispa.

Tiempowanmi Paolaqa anchata kallpachakurqan chhayna millay kawsayninta saqepunanpaq. Tayta-mamanqa Jehová Diospa testigonkunan karqanku, chaymi paykunaq yanapayninta mañakurqan hinallataq iñiq t’aqamanta umallikunaq yanapaynintapas. Paymi nin: “Anchatan kusikurqani tayta-mamay umallikunapas munakuywan tratawasqankuta rikuspa. Kaq raton thak sientekurqani”, nispa.

Kunanqa iskay wawayoqñan Paolaqa. Paymi nin: “Ñoqa kikiymi wawaykunaman willarqani ñawpaqpi kawsasqaymanta. Entiendenankutan munani chhayna kawsayqa ñak’ariykuna apamusqanta, Bibliaq nisqanman hina kawsaymi ichaqa allinninchispaqpuni. Kunanqa entiendenin mana ñak’arinanchisrayku Jehová Dios kamachikuykuna qowasqanchista”, nispa.

Llapanchismi Diospa kamachikuyninkunata kasukuspaqa allinta kawsasunman. Bibliapunin nin: “Señor Diospa churasqan simikunaqa chaninpunin, sonqotan kusichin. Señor Diospa kamachikuyninqa sut’ipunin, ñawitan kicharin”, nispa. Chaymantapas nillantaqmi:“Kamachikuyniykikunata kasuqqa allin premiotan chaskin”, nispa (Salmo 19:8, 11). *

[Uranpi willakuykuna]

[15 paginapi willakuy]

Bibliaq kamachisqanta mana kasukuqkunaqa ñak’ariykunapin tarikunku

[16 paginapi willakuy]

Diospa kamachikuyninkunata kasukuqkunaqa thakpin kawsanku, casarakuyninkupipas kusisqan kanku