Familiapaq allin yachachikuykuna

¿Imaraykun iskayninku Dios sonqo kayta wiñachinanku?

Enrique: * “Casarakuspaymi esposaywan kuska Biblia estudiayta qallarirqayku. Estudiasqaykupi tukuy yuyaywan kanantan munarqani ichaqa manan qasilla kayta atiqchu. Imamantapas sapa tapuqtiytaq “arí, manan” nispalla kutichiwaq. Chhaynataqa manan estudiaykumanchu.

Liliana: “18 wataypi kashaspan Enriquewanqa casarakurqani. Kuskan estudiaq kayku ichaqa imapi pantasqallaytan rikuchiwaq imaynatas aswan allin esposa kayman chaytawan, chaykunan sonqoyta k’iriwaq pisikallpayachiwaqpas.

¿IMA sasachakuymi Enriquewan Lilianawan karqan? Iskayninkupas allin kaqtan munarqanku. Dios munakuqmi karqanku, entiendeqkutaqmi kuska Biblia estudianankuta. Chaywanpas Biblia estudiasqanku hukllachananmantaqa t’aqanachisharqanmi. Kuskan estudiaqku ichaqa manan iskayninkumantachu Dios sonqo kayninkuta wiñachisharqanku.

Ichaqa, ¿imataq Dios sonqo kayri? ¿Imaraykun casarasqakuna Dios sonqo kayninkuta kuska wiñachinanku? ¿Ima sasachakuykunan kanman? ¿Imaynatan chaykunata atipankuman?

¿Imataq Dios sonqo kayri?

Dios sonqo kayqa Diospa munasqanman hina kawsaymi (Judas 18, 19). Apóstol Pabloqa sut’itan reqsirqan pin Dios sonqo runa pitaq mana chayta. Pabloq nisqanman hinaqa aychanta kusichiq runaqa paypa munasqallantan maskhan. Yuyaykusqanman hinallan imatas ruwan manataq qhawarinchu Diospa nisqanta (1 Corintios 2:14; Gálatas 5:19, 20).

Dios sonqo runan ichaqa Diospa kamachikuyninkunata hap’ikun. Jehová Diostan amigonta hina qhawarin pay hina kananpaqtaq kallpachakun (Efesios 5:1). Chaymi hukkunata tratan munakuywan, sumaq sonqowan pacienciawan  ima (Éxodo 34:6). Diostapunin kasukun manaña paypaq hina kashaqtinpas (Salmo 15:1, 4). Canadá nacionmanta Daríon 35 wataña casarasqa, paymi nin: “Ñoqaq entiendesqayman hinaqa, Dios sonqo runaqa imata rimaspapas ruwaspapas yuyaykunmi imaynatas Dios qhawarin chayta”, nispa. Esposan Juliataq nin: “Dios sonqo warmiqa sapa p’unchaymi kallpachakun Santo espirituq rurunman hina kawsananpaq”, nispa (Gálatas 5:22, 23).

Chhaynaqa, ¿casarasqaraqchu kana Dios sonqo kasqanchista yapanapaq? Manan. Bibliaq nisqan hina sapankanchismi Diosta reqsinanchis pay hina kananchispaqtaq kallpachakunanchis (Hechos 17:26, 27).

¿Imaraykun iskayninku Dios sonqo kayta wiñachinanku?

Sapankanchistaq Dios sonqo kasqanchista wiñachinanchis chayqa, ¿imaraykun casarasqakuna kuska chayta ruwananku? Kaypi yuyaykuy: iskay runakunan huk huertayoq kanku. Hukninmi tarpuna tiempopi tarpuyta munan huknintaq chaymantaña ruwayta munan. Hukninmi hallp’a abonayta munan huknintaq mana munanchu. Hukninmi mana samayuspa llank’ayta munan huknintaq mana imatapas ruwayta munanchu hinaspa huertapi imallapas rurunanta suyan. Yaqapaschá huertaqa imallatapas rurunqa ichaqa iskayninkumanta llank’ankuman chayqa aswan allintan rurunman.

Chhaynallataqmi casarasqakunawanpas. Sichus huknillanpas Dios sonqo kayninta wiñachinqa chayqa allintan kawsanqaku (1 Pedro 3:1, 2). Ichaqa aswan allintan kawsanqaku sichus kuska Diosta servinqaku paypa nisqanman hinataq imatapas ruwanqaku chayqa. Rey Salomonmi nirqan: “Aswan allinmi iskay runa huk runallamantaqa”, nispa. ¿Imarayku? “Aswan allintan llank’asqankumanta chaskinqaku. Hukkaqchus urman chayqa hukkaqninmi sayarichin” (Eclesiastés 4:9, 10).

Iskayniykichischá Dios sonqo kayniykichista wiñachiyta munashankichis. Imaynan huk huertapi mana samayuspa llank’anku allinta rurunanpaq hinata. Qhawarisun iskay sasachakuykunata imaynatas chaykunata atipasun chaytapas.

ÑAWPAQKAQ SASACHAKUY: “Manan tiempoyku kanchu”. Chayllaraq casarasqa Susy nin: “Qosayqa 7 horas tutatan llank’anaymanta pusanpuwan, wasiman chayaqtiykutaq mana imapas ruwasqachu. Manan imanakuyta atiykuchu: yachaykun iskayniyku Biblia estudianaykuta ichaqa nishu sayk’usqa kaspaykun samamullaytaña munayku”, nispa.

¿Iman yanapasunkichisman? Sapankaykichismi imaynapi tarikusqaykichisman hina yanapanakunaykichis. Susy willakun imatas ruwarqanku chayta, paymi nin: “Eduardowanmi decidirqayku tutallamanta hatarinaykupaq chhaynapi manaraq llank’anaman rishaspa Bibliamanta huk textota leespa t’aqwinaykupaq. Hinaspapas payqa wasipi huk ruwaykunawanmi yanapawan chhaynapi tiempoyku kananpaq”, nispa. ¿Allinchu chhayna kallpachakusqanku karqan? Eduardon nin: “Susywan kuska Bibliamanta rimasqaykuqa yanapawarqankun sasachakuykunata atipanaykupaq chhaynapi kusisqa kanaykupaq”, nispa.

Bibliamanta rimasqaykichismantapas huk ratollapas kuskan Diosmanta mañakuwaqchis, chayqa allinniykichispaqmi kanqa. 16 wata casarasqa Ramonmi nin: “Esposaywanmi huk tiempo sinchi sasachakuypi tarikurqayku chaymi sapa tuta Diosmanta mañakunaykupaq decidikurqayku, chaypin willaq kayku imachus llakichiwasqankuta. Chay ruwasqaykun yanapawarqanku sasachakuyniykuta atipanaykupaq yapamanta kusisqa kawsanaykupaqpas”, nispa.

KAYTAN RUWAWAQCHIS. Ch’isinta huk ratollapas rimaychis ima allinkuna chay p’unchaypi kasusqaykichismanta hinaspa chaykunamanta Diosman graciasta qoychis. Hinaspapas qhawariychis ima sasachakuykunapaqmi  Diospa yanapayninta maskhanaykichis chayta. Ichaqa manan chay rimasqaykichispiqa imapi hukniykichis pantasqantachu rimanaykichis. Mañakuspaykichistaq imapis iskayniykichis allinyanaykichis kashan chayta mañakuychis. Ichaqa ruwayniykichiswan rikuchinaykichis cheqaqpaqpuni cambiay munasqaykichista.

ISKAYKAQ SASACHAKUY: “Hukniraymi kayku”. Tonyn nin: “Manan leey gustawanchu estudiaypas sasan ñoqapaqqa”, nispa. Esposan Natalian ichaqa leenpuni. Paymi nin: “Anchatan gustawan leey, yachasqaymanta rimaypas. Yaqapaschá qosaywan Bibliamanta rimaqtiyku pisipaq sientechini”, nispa.

¿Iman yanapasunkichisman? Llallinakuspa otaq qhawanakuspa kanaykichismantaqa yanapanakuychis. Esposaykiq otaq qosaykiq allinkuna ruwasqanta qhawariy hinaspa chaykunamanta kusa niy. Tonyn nin: “Nishutapuni esposay Bibliamanta rimay munasqanmi mayninpi sayk’uchiwaq, chaymi mana paywan estudiayta munaqchu kani. Ichaqa entiendewanmi. Kunanqa kuskan Bibliata estudiayku, reparanin manaña manchakusqayta. Hinaspapas kunanqa gustawanmi paywan estudiay, chaykunamanta rimaymi kusisqa thakpi kawsachiwanku”, nispa.

Askha casarasqakunan reparanku allinpuni kuska Bibliamanta estudiay kasqanta. Ichaqa imapin qan allinyanayki kashan chaypi yuyaykuy ama esposaykiq otaq qosaykiq ruwananpichu (Gálatas 6:4). Sichus ima sasachakuypas mana allinta hukniykichista sientechiqtinqa ama estudiasqaykichis ratochu chaymanta rimaychis aswanpas hukpiña. ¿Imaraykun chayta ruwanaykichis?

Familiaykiwan mikhushaspa, ¿hanpikuwaqchu q’eyachasqa k’iriykita? Manapunichá. Sichus chayta ruwawaq chayqa manañan mikhuyta munanqakuchu. Jesusqa mikhunawanmi rikch’anachirqan Diosmanta yachayta paypa munaynin ruwaytapas (Mateo 4:4; Juan 4:34). Sichus sapa kutin Bibliata estudiaspa sonqoykipi k’irikunata hampikuyta qallarinki chayqa, manañan esposayki otaq qosayki estudiayta munanqañachu. Mayninpiqa rimananchispunin kanqa ima sasachakuymantapas. Ichaqa hukpiña chaykunamantaqa rimana (Proverbios 10:19; 15:23).

KAYTAN RUWAWAQCHIS. Esposaykiq otaq qosaykiq allin kayninkuna gustasqasuykimanta qelqay. Chaykunamanta hukpi estudiaspaykichistaq esposaykita otaq qosaykita niy chhayna kasqanmanta kusikusqaykita.

Tarpusqanchistan cosechasun

Sichus casarasqakuna kuska Dios sonqo kayninkuta wiñachinqaku chayqa ancha sumaqtan kawsanqaku. Biblian nin: “Imatachus runaqa tarpunqa chayllatataqmi cosechanqapas”, nispa (Gálatas 6:7).

Enriquewan Lilianawanmi chay textoq nisqanta entienderqanku. 45 watakunañan casarasqa kashanku, chaypin yacharqanku Dios sonqo kayninkuta iskayninkumanta wiñachisqankuqa allinninkupaq kasqanta. Enriquen nin: “Esposaytan huchachaq kani mana allin kawsasqaykumanta. Tiempowanmi ichaqa entienderqani ñoqapas kallpachakunay kasqanta”, nispa. Lilianan nillantaq: “Diosta munakusqaykun yanapawarqanku ancha sasachakuypi tarikuqtiyku. Llapa kay watakunan kuska Bibliata estudiarqayku Diosmanta mañakurqayku ima. Qosaypa kallpachakusqanta rikuspan astawan munakuni”, nispa.

[Uranpi willakuy]

YUYAYMANANAPAQ TAPUYKUNA

▪ ¿Hayk’aqmi esposaywan otaq qosaywan kuska Diosmanta mañakurqayku?

▪ ¿Imatan ruwayman esposay otaq qosay Bibliamanta ñoqawan kuska estudiananpaq?