¿Imatan ruwana pacha chhaphchiy otaq ima sasachakuypas kaqtin?

Astawantaq pacha chhaphchiykuna, lloqllakuna, tutuka wayrakunapas yapakamushan chayqa, ¿imatan ruwasunman? Chaykunataqa qatimuqpi yachasunchis.

Ayqekunan. Biblian nin: “Yuyayniyoqqa mana allin kaqtan reparan hinaspan pakakun, pisi yuyayniyoqkunan ichaqa pasallanku hinaspan k’irisqa rikukapunku”, nispa (Proverbios 22:3). Chay yuyaychaytaqa kasukunallanchistaqmi lloqllakuna, pacha chhaphchiykuna, hatun wayrakunapas manaraq hatariqtin. Sichus willakamunqaku: “Volcan t’oqyamunqa, tutuka wayra chayamunqaña otaq unu hunt’aykamunqa”, nispa chayqa, allinchá kanman wasinchista otaq imanchistapas saqerparispa karuman ayqekuyqa, chhaynapi salvakunanchispaq.

Wakin runakunaqa sasachakuy cheqaskunamantan karuman ripunkuman. Huk kamachikuqmi nirqan: “Pachantinpiqa pisi cheqaskunallapin pacha chhaphchiykuna hukkunapas kan, chaykunallapin qhepamanpas sucedenqa”, nispa. Chay cheqaskunaqa kanman lamar qocha qayllanpi otaq maypis sucedenpuni pacha chhaphchiykuna, lloqllakuna, hukkunapas chaypi otaq chaykunaq qayllanpi. Sichus chay cheqaskunamanta karunchakuwaq chayqa, manañapaschá chay sasachakuykunapi tarikuwaqchu.

¿Imatan ñawpaqmanta ruwana? Imaymanataña ruwawaq chaypas qonqayllan ima ñak’ariypipas tarikuwaq. Ichaqa sichus ima ruwayta yachankiña chayqa chaymi yanapasunki. Chayqa tupallantaqmi Proverbios 22:3 textoq nisqanwan. ¿Ñachu mochilayki kanña? Huk libroq nisqanman hina, hampikunata, botellapi unuta, mana ismuq mikhuykunata, documentokunata iman mochilapi churana. Wasipi kaqkunatan yachachina imatas ruwananku ima sasachakuypas kaqtin.

Dioswan hukllachasqalla kay. Chay ruwayqa imapi tarikuqtinchispas yanapawasunmi. Biblian Diosmanta nin: “Khuyapayakuq Yayan, tukuy imapi sonqochakuq Diostaq. Diosmi tukuy llakikuyniykupi sonqochawanku”, nispa. Huk texton nillantaq: “Pisipaqkunata sonqochaq Diosmi”, nispa (2 Corintios 1:3, 4; 7:6).

Diosqa interesakunmi serviqninkuna imayna tarikusqankupi. Munakuq kasqanraykun payqa imaymanawan kallpachawanchis (1 Juan 4:8). Hukninmi Diosmanta mañakuy. Manan ñak’ariyninchista chinkachinanpaqchu mañakusun ichaqa mañakusunmanmi  espiritunta chaymi yanapawasun Simin Qelqamanta sonqochaq textokunata yuyarinanchispaq, thakpi kananchispaqpas. Kamachiq David hina nisunman: “Manchakuy wañuy llanthu wayq’onta purispaypas, manan ima mana allintapas manchakunichu ñoqawan qan kashasqaykirayku, tawnaykin hark’aykuwan, varaykin waqaychawan”, nispa (Salmo 23:4)

Iñiqmasikunaq yanapaynin. Ñawpa tiempopin profeta Ágabo sutiyoq cristiano rimarqan “kay pachapi manchay yarqay kananmanta”. “Chay yarqaymi Roma rey Claudio tiemponpi hunt’akurqan”, Judea llaqtapi cristianokunatapas muchuchirqanmi. Chayta yachaspan huk llaqtapi tiyaq cristianokuna “sapankanku imachus kapusqanman hina wawqe-panakunaman yanapayta apachinankupaq rimanakurqanku” (Hechos 11:28, 29). Chaytan munakuyniyoq kasqankurayku apachirqanku.

Kunanpas Diospa kamachinkunaqa kaqllatataqmi ruwanku ima sasachakuy kaqtinpas. Jehová Diospa Testigonkunaqa paykuna pura yanapanakusqankuraykun reqsisqa kanku. 2010 watapi 27 febrero killapi Chile nacionpi pacha chhaphchiy kaqtinmi, iñiqmasikuna yanaparqankupacha. Karlaq wasintan unu millp’urqapusqa, paymi nin: “Paqaristinmi huk llaqtakunamanta iñiqmasikuna hamurqanku yanapawaqniyku. Jehová Diosmi paykunawan sonqochawarqanku. Diospa munasqan waqaychasqataq sientekurqani”, nispa. Chayta qhawarispan mana iñiq abuelon nirqan: “¡Iglesiaypiqa manan hayk’aqpas chaytaqa rikurqanichu!” nispa. Chaymi Testigokunawan Bibliamanta estudiayta qallarirqan.

Sasachaykunapi tarikuqtinchisqa Diosta munakuq runakunawan kasqanchismi anchata kallpachawanchis. Chhayna kaqtinpas, ¿hayk’aqllapas lloqllakuna, pacha chhaphchiykuna, manchay wayrakuna, huk sasachakuykunapas tukukunqachu? Qhawarisun Bibliaq nisqanta.

[6 paginapi foto]

¿Preparasqachu mochilayki kashan ima necesitasqaykita apanaykipaq?

[7 paginapi foto]

Manan ñak’ariyninchista chinkachinanpaqchu mañakusun ichaqa mañakusunmanmi Diospa santo espiritunta

[7 paginapi foto]

Cristianokunaqa sasachaykunapi tarikuspankun yanapanakunku

[7 paginapi foto]

“Diospa munasqan waqaychasqataq sientekurqani”