Bibliaq yanapayninwan cambianku

¿IMAN tabaco llank’aq runata yanaparqan chay llank’ayninta saqepunanpaq religionninta cambiananpaqpas? ¿Iman huk sinchi machaq warmita yanaparqan trago ukyayninta saqepunanpaq? Paykunaq willakusqankuta leey.

“Anchatan kusikuni kay hatun familiapi kaspa” (DINO ALI)

1949 WATAPIN NACERQAN

AUSTRALIA NACIONMANTA

TABACO LLANK’AQ

ÑAWPAQPI KAWSASQAY: Tayta-mamayqa 1939 watapin Albania nacionmanta astakurqanku Australia nacionman (Queensland), Mareeba llaqtapin tiyarqanku. Chaypin tiyallarqankutaq Italia, Servia, Bosnia, Grecia nacionkunamanta askha runakuna, sapankapas imaymana costumbreyoq, rimayniyoq creenciayoq ima. Mareeba llaqtapiqa tabacotan llank’aqku, chaymi tayta-mamaypas tabaco llank’aypi kapurqanku.

Pisi tiempomanqa kurak panaymi nacerqan hinallataq iskay wawqeykuna, chay qhepamanñan ñoqa nacerqani. Huk watachallayoq kashaqtiymi papayqa sonqon sayapuqtin wañukapurqan. Mamayqa hukmantan casarakurqan, chaymantan tawa qhari wawankuna karqan. Llapaykun padrastroypa tabaco llank’asqan chakrapi tiyarqayku.

Waynachallaraq kashaspaymi wasiymanta ripurqani, yaqa 20 más wataypi kashaspaytaq Saime sutiyoq sipaswan casarakurqani. Musulmán religionniyoqtaq karqayku chayqa, chay Iglesiapin casarakurqayku. Llapa tioykunapas primoykunapas Islam religionniyoqmi karqanku. Ñoqaqa Corán nisqa librotan leeq kani profeta Mahomamanta willaq librotapas, ichaqa Bibliatapas leeqmi kani. Corán libropiqa Bibliapi profetakunamantan willan chaymi yanapawaq paykunata astawan reqsinaypaq.

Jehová Diospa testigonkunaqa wasiykutan hamullaqku. Ñoqamanpas esposaymanpas anchatan gustawaqku saqewasqanku revistakunata librokunata leey. Hinaspapas Bibliapi imaymana yachachikuykunamantan sumaqta parlariq kayku. Ima tapuytapas yachachikuytapas  Bibliawanmi kutichiwaqku manan yuyaykusqankuman hinachu, chaymi anchata admirachiwaq.

Jehová Diospa testigonkunaqa invitawaqkun Bibliata estudianaypaq huñunakuykunaman rinaypaqpas, ichaqa manan munaqchu kani. Tabaco chakrayoqmi kayta munarqani askha wawakunayoqtaq. Ichaqa manan hayk’aqpas tabaco chakray karqanchu, wawaykunan ichaqa phisqa karqan.

BIBLIAQ YANAPAYNINWAN CAMBIAPUNI: Isqon wataña Jehová Diospa testigonkunata reqsirqayku chaypas, religionniypi yachasqaykunataqa manan cambiarqanichu. Ichaqa chaskikushallarqaykun apamuwasqanku qelqakunata. Sapa domingonmi esposaywan leeq kayku waqaychaqtaqmi kaykupas. Chay qelqakunaqa anchatan yanapawarqan chaykunapi iñisqayrayku hukkuna harq’apakuwaqtinku.

Huk kutinmi evangelistakunaq pastornin mat’ipayawarqan religionninmanta kanaypaq. Esposaypa kurak turanpas mamaymanta wawqeypas chay religionpiñan kasharqanku. Ñoqatapas reqsisqaykunan anchata rimapayawaqku religionninkupi kanaypaq. Wakinqa Jehová Diospa testigonkunaq contranpi willaq qelqakunataraqmi qowaqkupas. Ñoqataq llapankuta tapuq kani iñisqankumanta Bibliapi qhawachiwanankuta, ichaqa manan sut’inchawayta atiqkuchu.

Tukuy chaykuna niwasqankuqa astawanmi kallpachawarqan Testigokunaq saqewasqanku qelqakunawan Bibliata t’aqwinaypaq. Chaypiñan allinta repararqani Bibliapi yachasqayman hina ruwanay kasqanta.

Manaña Bibliamanta yachachiwasharqankuchu chaypas, huñunakuykunamanmi riyta qallarirqani. Qallariypiqa manchasqan riq kani sinchi manchali kasqayrayku, ichaqa ancha munakuq runakunawanmi chaypi reqsinakurqani gustawarqantaqmi chaypi yachachisqanku. Testigo kanaypaqmi decidikurqani, chaymi Jehová Diospa munayninta ruwanaypaq 1981 watapi bautizakurqani.

Q’otochikunaypaqña esposay yuyaykurqan chaypas, manan hark’awarqanchu bautizakunayta. Chaywanpas bautizakusqay p’unchaypiqa chaypin kasharqan. Bibliamanta tukuy imaymana yachasqaymantaqa rimapayashallarqanin. Yaqa huk wata bautizakusqay qhepallamanmi, vacacionniykumanta carroykupi hampushaqtiyku esposayqa niwarqan Testigo kay munasqanta, chaymi mancharikuymanta yaqalla carreteramantapas lloqsirqoni. 1982 watapin bautizakurqan.

Bibliaq nisqanman hina kawsayqa sasan karqan. Tabaco llank’ayniytan saqepurqani Bibliaq yachachikuyninkuna contra kasqanrayku (2 Corintios 7:1; Santiago 2:8). Bibliaq nisqaman hina llank’anata tariyqa sasan karqan. Hinaspapas wakin familiaykuqa askha watakunan manaña visitamuwarqankuchu. Ichaqa Bibliaq nisqanman hinan kallpachakuq kayku munakuywan tratanaykupaq. Qhepamanqa manañan cheqnipakuwaqkuchu.

 KUNAN KAWSASQAY: Imaymana sasachakuykunapin tarikurqani: manchali kasqaywan, qolqe mana kasqanwan, familiaykunawanpas. Ichaqa pacienciawanmi Jehová Dios yanapawarqan chay sasachakuyniykunata atipanaypaq. Kunanqa iñiq t’aqapi umallin kani sapa huñunakuykunapin yachachinay. Chay ruwaypiqa sasachakushaniraqmi khatatatanin k’akuykachaspataqmi rimanipas. Jehová Diosmanta mañakusqaymi ichaqa anchata yanapawan chay sumaq llank’ayta hunt’anaypaq.

Esposaywanqa aswan kusisqan kawsayku huk hinallataqmi kaykupas. Manaña allintachu wawakunata uywarqayku chaypas, tukuy atisqaykutan kallpachakurqayku Bibliamanta yachachinaykupaq (Deuteronomio 6:6-9). Kurak kaq wawayqa esposanpiwanmi misionero kanku.

Pisi tiempollaraq Testigokunaq huñunakuyninkuman risqayku qhepamanmi kay rikusqayta mana qonqanichu. Carroyta sayarachispan qhawarirqani huñunakuyman chayamuq askha Testigokunata, hinan familiayta tapurqani: “¿Imatan rikushankichis?” nispa. Chaypin imaymana clase runakunata rikurqayku, paykunaqa Australia, Albania, Croacia nacionkunamantan karqanku huk rimayniyoq costumbreyoq ima. Ichaqa huk hinallan kusisqa kasharqanku. Anchatan kusikuni kay hatun familiapi kaspa, chay familiaqa manan Australia nacionllapichu kan aswanpas hallp’antinpin (1 Pedro 5:9).

“Ñañayqa manan hayk’aqpas saqerpariwarqanchu” (YELENA VLADIMIROVNA SYOMINA)

1952 WATAPIN NACERQAN

RUSIA NACIONMANTA

SINCHI MACHAQ WAÑUCHIKUYTAN MUNARQANPAS

ÑAWPAQPI KAWSASQAY: Krasnogorsk llaqtachapin nacerqani, chayqa Moscú llaqtaq qayllallanpi kashan. Tayta-mamayqa profesorkunan karqanku. Ñoqaqa allin estudianten karqani takiq kanaypaqmi estudiarqanipas. Chhayna kasqaywanqa qhepamanmi allinpuni kayman karqan.

Casarakusqay qhepamanqa huk ladomanmi astakapurqayku, chay tiyasqaykupiqa millay qhelli simikunantan rimaqku, machaqku tabacotapas fumaqku. Chay hinapi kawsayqa manan allinniypaqchu karqan. Fiestakunamanqa takiqllan riq kani guitarrata tocaspa. Runakunan ichaqa machanaypaq, cigarrota fumanaypaq invitawaqku. Pisi tiempollapin machaqman tukupurqani.

Trago ukyasqayqa wañuymanmi apawasharqan. Yuyayniyta hap’ikuqtiytaq manaña yarqaypas hap’iwasqañachu. Chaymi wañuchikuyta munarqani. Kunanqa kusikunin mana wañusqaymanta.

Chhaynaña karqani chaypas, ñañaymi sapa kutillan visitamuwaq. Payqa Jehová Diospa  testigonmi kasqa, chaymi Bibliamanta willawaq sasachakuyniykunapi yanapawananpaq. Ñoqaqa manan Bibliamanta yachayta munarqanichu, chaymi mana munarqanichu hamunanta. Ichaqa manan hayk’aqpas ñañayqa saqerpariwarqanchu. Pacienciawan munakuywan qhawariwasqanmi kallpachawarqan Biblia estudianaypaq.

BIBLIAQ YANAPAYNINWAN CAMBIAPUNI: Biblia estudiayta qallarispaqa machayniyta saqepunaypaqmi decidikurqani. Huk vecinoymi machasqa maqaykuwarqan chaymi hospitalman waqtay p’akisqata, huknin ñawiy k’irisqata apawarqanku. Hospitalpi kasqayqa manaña machaynaypaqmi yanapawarqan.

Chay tiempopiqa mañakushallarqanin. Lamentaciones 3:55, 56 textopi nisqanmi anchata yanapawarqan, chaypin nin: ‘Señor Diosníy, ukhu t’oqomantapachan waqyakamurqayki: Uyariway yanapayniyki mañakamusqayta [...]. Uyariykuway waqyakamusqayta’, nispa.

Jehová Diosqa kutichimuwarqanmi mañakusqayta. Anchatan kallpachawarqan mana machanaypaq. Mayninqa yaqa-yaqallan atipawaq, ichaqa manan hayk’aqpas macharqaniñachu.

Bibliata estudiasqayman hinan yacharqani qosayta familiapi umallinanpaq yanapanay kasqanta (1 Pedro 3:1, 2). Ñawpaqpiqa ñoqan qosayta kamachiq kani chaymi sasa karqan chayta kasukuy. Chaymi Jehová Diospa yanapayninta anchata mañakuq kani. Sasachakurqaniña chaypas pisi-pisimantan sumaq esposa kapurqani.

Manaña qosayman Biblia estudiay interesaqchu chaypas, anchatan kusikuq cambiasqaywan. Tabaco fumayta saqepunaypaq decidikuqtiymi niwarqan: “Fumayta saqepunki chayqa, Bibliata estudiasaq”, nispa. Chay p’unchaymantapachan iskayniyku manaña fumarqaykuñachu.

KUNAN KAWSASQAY: Qosayqa niwasqanman hinan Biblia estudiayta qallarirqan. Kunanqa sapa p’unchaymi kuska Bibliata leeyku, chaypi yuyaymanaspataq chayman hina kawsanaykupaq kallpachakuyku.

Admirakunapaqmi Bibliaq cambiachiwasqan familiaypi sumaqta kawsakapusqaykupas. Maytan Jehová Diosta agradecekuni llaqtanman pusamuwasqanmanta (Juan 6:44). Ñañaytapas anchatan agradecekuni mana saqerpariwasqanmanta. Bibliaqa cambianpunin runakunata.

[11 paginapi willakuy]

Entienderqanin Bibliapi yachasqayman hina ruwanaypaq

[13 paginapi willakuy]

Ñañaypa pacienciawan munakuywan qhawariwasqanmi kallpachawarqan Biblia estudianaypaq