‘Rimasqaytan hunt’anku’

“Qankunachus rimasqayta hunt’ankichis chayqa, cheqaqtapunin yachachisqaykuna kankichis. Cheqaqkaqtan reqsinkichis, chay cheqaqkaqtaqmi kacharichisunkichispas.” (JUAN 8:31, 32.)

¿Imamantan Jesús rimasharqan? Yachachisqanmantan, nirqanmi: “Rimasqayta hunt’ankichis”, nispa. Ichaqa, chay yachachikuyninqa Jehová Diospan karqan. Chaymi nirqan: “Manan ñoqaqa kikillaymantachu rimani, aswanpas kachamuwaqniy Yayan kamachiwarqan imaynatachus rimanayta imatachus ninaytapas”, nispa (Juan 12:49). Diosmanta mañakuspan Jesús nirqan: “Simiykiqa cheqaq-kaypunin”, nispa. Chaymi yachachispaqa, Diospa nisqanman hinapuni yachachiq (Juan 17:17; Mateo 4:4, 7, 10). Chhaynaqa, ¿imaynatan cheqaq cristianokuna Jesuspa yachachisqanman hina kawsanku? Diospa Siminta ‘cheqaqpaq’ qhawarispa, chaypi nisqanman hina Diosta yupaychaspa, chayman hina kawsaspapas.

Ñawpa cristianokunaq ruwasqanku. Apóstol Pablopas Jesús hinan ancha chaninpaq Diospa Siminta qhawarirqan. Chaymi nirqan: “Diospa Simin Qelqakunaqa llapallanmi Diospa yuyaychasqan”, nispa (2 Timoteo 3:16). Hinaspapas iñiq t’aqapi yachachiq qharikunatan nikurqan “cheqaq yachachikuyta” yachachinankupaq (Tito 1:7, 9). Cristianokunatapas nikullarqantaqmi: “Makilla cuidakuychis, paqtan pipas q’otusunkichisman yanqa mana valeq yuyaykunawan, llulla yachachikuykunawan ima, paykunaqa manan Cristoq yachachisqantachu yachachinku, aswanpas runakunaq yachachikuynillantan kay pachata kamachiq espiritukunaq yachaynintawan yachachinku”, nispa (Colosenses 2:8).

¿Pikunan chay hinata kunan ruwashanku? Constitución dogmática sobre la divina revelación nisqa libropin nin: “Iglesiapi yachachikuykunaqa manan Diospa Siminmantapunichu. Chaywanpas sapankatan [Diospa siminta hinallataq Iglesiaq yachachikuynintapas] iñiywan respetowan qhawarikunan”, nispa. Chaytan 1965 watapi horqomurqanku Católica Iglesiapi umalliqkuna, Catecismo de la Iglesia Católica libropitaqmi qelqamurqanku. Toronto (Canadá) llaqtapi religionta umalliq warmin huk revistapi nirqan: “¿Imanaqtinmi iskay waranqa wata ñawpaqpi yachachikuykunaman hina kawsananchis? Chaykunaqa chay watakunapin ‘yanaparqan’. Ñoqanchispas allinkunatan yuyaykunchis, Jesuspa nisqanman hina otaq Bibliaq nisqanman hina tupachiqtinchismi ichaqa pisichasqan kapun”, nispa (Maclean’s).

Jehová Diospa testigonkunamantan huk revista nin: “Testigokunaqa Bibliaq nisqanman hinan Diosta yupaychanku chayman hinataqmi kawsankupas”, nispa (New Catholic Encyclopedia). Huk kutinmi Canadá nacionmanta runa, predicaqnin Testigota nirqan: “Qankunataqa reqsiykichisñan”, nispa. Hap’isqan Bibliata qhawachispataq nirqan: “Hap’isqayki libron willan pí kasqaykichista”, nispa.