Cheqaq cristianokunaqa allin runakunan kanku

¿IMA iskay ruwaykunan karqan Jesuspa predicayninpi? Hukninmi: Jesusqa runakunaq sonqonta cambiananpaqmi kallpachakurqan manan politicatachu. Qhawarisun Orqo Patapi yachachisqanmanta. Manaraq qatikuqninkunata kachiwan k’anchaywan rikch’anachishaspan, uyariqninkunaman sut’incharqan “huch’uyyaykukuspa Diosta maskhaqkunaqa” kusisqa kasqankuta. Ichaqa manan paykunallachu aswanpas ‘llamp’u sonqoyoqkuna, [...] ch’uya sonqoyoqkuna, [...] thak-kaypi kawsanapaq allipunachiqkunapas’ kusisqan kananku karqan (Mateo 5:1-11). Jesusqa munarqanmi qatikuqninkuna kaykunata entiendenankuta: Allintan entiendenanku karqan Diospa kamachikusqankunaman hina imas allin imataq mana allin kasqanta, hinaspa Diosta tukuy kawsayninkuwan servinankutapas.

Iskaypitaq: Jesusqa ñak’ariqkunatan khuyapayarqan chaymi yanaparqan. Chaywanpas manan ñak’ariykunata tukuchinanpaqchu hatarirqan (Mateo 20:30-34). Hampirqanña onqosqakunata chaypas, onqoykunaqa manan chinqarqanchu (Lucas 6:17-19). Sonqocharqanña pisichasqakunata chaypas, manan chinkarqanchu mana chanin ruwaykunaqa. Yarqaypi kaqkunataña mikhuchirqan chaypas, kaqllan yarqayqa kasharqan (Marcos 6:41-44).

Runakunatan cambian llakikuyninkutapas pisiyachin

¿Imaraykun Jesús runakunaq imayna sonqoyoq kasqanta cambiaypi yuyaykurqan llakikuyninkuta yanapaypipas? ¿Imanaqtinmi mana yuyaykurqanchu institucionkuna cambiaypi ñak’ariykunata hukpaqkama tukuchiypipas? Payqa allintan yacharqan Diospa Gobiernollan chaykuna tukuchinanta (Lucas 4:43; 8:1). Huk kutinmi qatikuqninkuna munarqanku astawan onqosqakunata hampinanta, chaymi payqa nirqan: “Hakuchis qaylla llaqtakunata, chaypipas Diospa siminta willamunaypaq, chaypaqmi kay pachamanqa hamurqani”, nispa (Marcos 1:32-38). Runakunaq ñak’ariyninpiña yanaparqan chaypas, manan chay ruwayllamanchu qokurqan, aswanpas Diosmanta cheqaq kaqta predicaywan yachachiywanmi paypaqqa aswan importante karqan.

Jehová Diospa testigonkunapas Jesuspa ruwasqanta hinan Bibliamanta yachachishanku. Hinaspapas tukuy atisqankutan ruwanku runamasinkuta yanapanankupaq. Ichaqa manan ñak’ariykunata, mana chanin ruwaykunata tukunankupaqchu hatarinku, paykunaqa allintan yachanku Diospa Gobiernollan chaykuna tukuchinanta (Mateo 6:10). Aswanpas Jesuspa yuyaykusqanta hinan yuyaykunku chaymi runakunaq sonqonta cambiaypi kallpachakunku manataq institucionkunatachu. Runakunaq sasachakuyninqa manan politicachu aswanpas imayna kawsasqankun.

Allin runakuna

Jehová Diospa testigonkunaqa cristiano kaspan allin runa kanku. Chayraykun kamachikuqkunata respetanku qelqankupi predicacionninkupipas  chayta ruwanankupaq hukkunata kallpachanku. Ichaqa, kamachikuqkuna Diospa mana munasqanta kamachiqtinkuqa ‘Diostan ñawpaqtaqa kasukunku, manan runakunatachu’ (Hechos 5:29; Romanos 13:1-7).

Hinaspapas Jehová Diospa testigonkunaqa wasin-wasinta rispan Bibliamanta mana qolqellapaq yachachimunku. Chhaynapin millonninpi runaq sonqonman chayaspa cambiachirqanku. Sapa watanmi askha runakuna qhelli kawsayninkuta saqepunku, cigarro pitayta, drogakuyta qolqepaq pukllaytapas. Chay runakunan allinman tukupunku, tiyasqanku cheqaspipas allin qhawarisqa kapunku Bibliamanta yachasqankurayku.

Bibliamanta yachayqa familiakunatan hukllachan. Paykunapuran respetanakuyta yachanku, warmi-qharin sumaqta parlarinku, tayta-mamakuna wawankuwan, wawakunataq paykunapura. Allin takyasqa familiakunaqa allin takyasqa llaqtakunatan hatarichin.

¿Ima ninkin kaykunata leespa? ¿Allinpaqchu Biblia qhawarin religionwan politicawan chaqrukunanta? Manapunin riki. Chhaynaña kaqtinpas cristianokunaqa allintan yanapakunanku llaqtankupi. ¿Imaynata? Jesuspa nisqan hina runakunaq ñawpaqenpi k’anchay, kachi hina kaspa.

Cristoq nisqanman hina kawsaqkunaqa paykuna kikinkuq allinninkupaqmi, familiankupaq llaqtankuq allinninpaqwan. Sichus yachayta munanki Bibliamanta yachachisqankuta chayqa, tiyasqayki cheqaspi Jehová Diospa testigonkunata tapuy. *

[Uranpi willakuy]

[10 paginapi willakuy]

Jesusqa runakunaq sonqonta cambiananpaqmi kallpachakurqan manan politicatachu

[11 paginapi willakuy]

Jehová Diospa testigonkunaqa cristiano kaspan allin runa kanku