Kaypin Bibliaykiwan tapukuyniykikunaman kutichiykunata tarinki. Munaqtiykiqa Jehová Diospa testigonkunan yanapasunkiman kay tapuykunata t’aqwinaykipaq.

1. ¿Imaraykun Dios akllakurqan huk sutita?

Llapanchismi munanchis sutinchismanta waqyawananchista. ¿Imarayku? Hukkunawan mana pantawananchispaq. Respetowanña niwanchis wiraqocha otaq señora nispa chaypas, manan kaqllachu titulokunawan sutiwanqa. Diospas askha titulokunayoqmi, wakinmi kaykuna: Ancha Hatun “Señor Dios”, “Tukuy-atiyniyoq”, ‘Kamaqninchis’ nisqakuna (Génesis 15:2; 17:1; Eclesiastés 12:1). Ichaqa sutiyoq kaytan munarqan, chhaynapi astawan reqsinanchispaq amigontin kananchispaqwan. Chay sutiqa Jehová nisqan español simipi. (Leey Isaías 42:8.)

Bibliata t’ikraqkunan Diospa sutin churanankutaqa “Señor” otaq “Dios” nispallan churamunku, ñawpa rimanakuypin ichaqa yaqa qanchis waranqa kutita Jehová suti rikhurin. Chaywanmi reparanchis Diosqa sutinmantapuni reqsinanchis munasqanta. (Leey Isaías 12:4.)

2. ¿Imaraykun Diospa sutinta reqsiy ancha importante?

Diospa sutinta seqsiyqa manan Jehová kasqanta yachayllachu, aswanpas paywan amigontin kaymi. Jehová sutiqa “Ñoqan kani ñoqaqa” otaq ñoqan kani munasqay kayta nispa ninanmi. Chaywanmi yachanchis Diosqa imamanpas tukunmanmi munayninta hunt’ananpaq. Sutinta reqsiyqa paypa promesankuna hunt’ananpi confiaymi (Salmo 9:10). Diospa sutinta reqsispa sutinmanta waqyakuqkunaqa paypi confiasqankutan rikuchishanku hinaspa kawsayninkupi ñawpaqman Diosta churanku. Jehová Diostaq chay runakunata pakaykun. (Leey Salmo 91:14.)

  3. ¿Imaraykun Dios munan sutinta reqsinankuta?

Diospa sutinta yachayqa runakunaq allinninkupaqmi. ¿Imaynapi? Amigontin kaytan atinkuman hinaspa wiñaypaq kawsayta suyakunkuman. Chaymi Diosqa munan hukkunaman sutinta willananchista. (Leey Juan 17:3; Romanos 10:13, 14.)

Jesusqa Diospa sutinmantan llapa runakunaman willaq, chaytan ruwarqan Diospa imayna yuyaykusqanta ruwasqantapas reqsichispa, chaymantapas willarqanmi kamachikuyninkunamanta promesankunamantapas. Chay hinatan kay tiempopipas Cristota qatikuqkunapas teqsimuyuntinpi ruwashanku. Llapankun huk nisqalla llank’aspa Diospa sutinpaq huk llaqta kanku. (Leey Hechos 15:14; Juan 17:26.)

4. ¿Imaynatan Dios sutinta ch’uyanchanqa?

Jehová Diosqa sutintan ch’uyanchayta munan sarunchasqankumanta qhellichasqankumanta. Askha runakunan ninku: “Diosqa manan kay pachata kamarqanchu, chaychu payta kasukusunman”, nispa. Wakintaq ninku: “Manan Diosmanqa imapas qokunchu, paymi huchayoq sasachakuyninchiskunamanta”, nispa. Ichaqa chhayna niqkunatan Diosqa chinkachinqa, manaña sutinta sarunchanankupaq. (Leey Salmo 83:17, 18.)

Diosqa Gobiernonwanmi kay pachapi kamachikuqkunata tukuchinqa, hinan thak kawsayta wakmanta apamunqa chhaynapin sutinta ch’uyanchanqa (Daniel 2:44). Pisi tiempollamantan llapa runakuna yachanqaku Jehová Dioslla cheqaq Dios kasqanta. (Leey Ezequiel 36:23; Mateo 6:9.)

¿Imatan ruwanayki? Diosmanmi asuykunayki Simin Qelqata estudiaspa, Diosta munakuqkunawantaq hukllachakunayki. Jehová Diosqa sutin ch’uyanchana tiempo chayamuqtinmi pay sonqo runakunata yuyarinqa (Malaquías 3:16).

Astawan yachayta munanki chayqa ¿Imatapunin Biblia yachachin? nisqa librota qhaway 1 capitulota, chaytaqa Jehová Diospa testigonkunan ruwan.

[18 paginapi foto]

Ñawpa hebreo qelqapi Diospa sutin rikhurin