Kaypin Bibliaykiwan tapukuyniykikunaman kutichiykunata tarinki. Munaqtiykiqa Jehová Diospa testigonkunan yanapasunkiman kay tapuykunata t’aqwinaykipaq.

1. ¿Iman bautizakuy?

Cristianokunaqa Dioswan allinpi kanankupaqmi bautizakunku. Chaymi mana sinchi wawallaraq kashaspaqa bautizakunankuchu, Diosta allinta reqsispa Jesuspa qatikuqninpaq hinaña kaspankun bautizakunanku (Hechos 8:12; 1 Pedro 3:21). Jesuspa qatikuqnin kanankupaqtaq paymanta astawan yachananku chayman hinataq kawsanankupas. (Leey Mateo 28:19, 20.)

Apostolkunaq tiempopiqa askha runakunan Diosmanta Jesusmanta willasqankuta uyarispa hina astawan yachayta munarqanku. Chaytan huk runa ruwarqan, Jesuspa wañusqanrayku salvakunanta yachaspan, chayman hina ruwarqan hinaspa Jesuspa qatikuqnin kapurqan. Kunan tiempopipas, askha sumaq sonqoyoq runakunan chayta ruwanku. (Leey Hechos 8:26-31, 35-38.)

2. ¿Imanaqtinmi Jesús bautizakurqan?

Jesusqa 30 watanpi hinan kasharqan Bautizaq Juan Jordán mayupi bautizashaqtin. Chaytaqa ruwarqan Diospa munayninta ruwananpaqmi (Hebreos 10:7). Bautizakusqanwanmi rikuchirqan runakunaq huchanrayku kawsayninta qonanpaq. Manaraq kay pachaman hamushaspan, hanaq pachapi rikuchirqanña Taytanta munakusqanta kasukusqantapas. (Leey Marcos 1:9-11;  Juan 8:29; 17:5.)

  3. ¿Imanaqtinmi bautizakuna?

Ñoqanchisqa pantaqmi kanchis chaymi mana Jesús hinachu kanchis. Ichaqa Jesuspa kawsaynin qosqanraykun Dioswan allinpi kasun (Romanos 5:10, 12; 12:1, 2). Yaqapaschá Diospa wawankuna kapusunman (2 Corintios 6:18). ¿Imatan chaypaq ruwasunman? Sapallanchispin Diosman mañakuypi qokunanchis, chaypin prometekunanchis paypa munayninta ruwanallapaqña kawsananchista. Chay qhepamantaq, Diosman qokusqanchita llapa runakuna yachanankupaq bautizakunanchis. (Leey Mateo 16:24; 1 Pedro 4:2.)

4. ¿Imaynatan bautizakunaykipaq preparakuwaq?

Jehová Diospa testigonkunaqa Diosmanta yachay munaqkunamanmi Bibliamanta yachachinku. Bibliata estudiaypas huñunakuykunaman riypas yanapasunkin Diosta astawan munakunaykipaq iñiyniykipas qaqa kananpaq. Chaykunan yanapasunki allin sonqoyoq kanaykipaq. Munakuypas iñiypas yanapasunkin Jehová Diosta servinaykipaq prometekusqaykita hunt’anaykipaqpas. (Leey Juan 17:3; Hebreos 10:24, 25.)

Astawan yachayta munanki chayqa ¿Imatapunin Biblia yachachin? nisqa librota qhaway 18 capitulota, chaytaqa Jehová Diospa testigonkunan ruwan.