¿Imatan Jesús kutichinman karqan?

¿Allinchu kanman religionta politicatawan chaqruy? Allin sonqoyoq runakunan yuyaykunku: “Religionqa manan politicapi chaqrukunallanchu aswanpas yanapakunanmi sasachakuykunata allichananpaq”, nispa. Wakinmi ichaqa ninku, religionqa manapuni politicawan chaqrukunanta. ¿Ima ninkin chaymanta? ¿Chaqrukunanchu religión politicawan?

ASKHA runakunan Jesucristomanta ninku: “Manan pipas Jesús hinaqa Diosmanta yachachirqanchu”, nispa. ¿Ima ninmanmi karqan religionta politicawan chaqruymanta tapuqtinchis? ¿Yacharqankichu kay pachapi kashaspa chay tapuyman kutichisqanta? Payqa willarqanmi imachus yuyaykusqanta ruwayninwantaq rikuchirqan. Orqo patapi yachachispan nirqan maykama qatikuqninkuna llaqtankupi ima ruwaykunapipas yanapakunankumanta. Wakinmanta yachasun.

 Hukkunaq sonqonmanmi chayanan

Kay pachata imayna qhawarinankumantan Jesús qatikuqninkunata nirqan: “Qankunan kay pachapi runakunapaq kachi kankichis, kachitaqchus q’aymayapunman chayri, ¿imapaqñataq valenman? Manan imapaqpas valenmanñachu, aswanpas hawaman wikch’unallapaqñan, hinaspa runakunaq sarusqan kananpaq. Qankunan runakunapaq k’anchay kankichis. [...] Chay hinata k’anchayniykichis runakunaq ñawpaqenpi k’anchachun, allin ruwasqaykichista rikuspa, hanaq pachapi kaq Yayaykichista yupaychanankupaq”, nispa (Mateo 5:13-16). ¿Imaraykun qatikuqninkunata kachiwan k’anchaywan rikch’anachirqan?

Jesusqa qatikuqninkunatan nirqan llapa runakunapaq kachi kanankuta, Diosta reqsiy munaqkunapaqtaq k’anchay kanankuta. Chaymi nisunman, Jesusqa manapunin qatikuqninkunata nirqanchu runakunamanta t’aqakunankupaq.

Mana chhayna kaqtinri, ¿imaynatan kachi mikhuykunata waqaychanman mana kuska kashaspa? ¿Imaynatan huk lámpara k’anchanman mana laqhayaqpi kashaspa? Chaymi Jesusqa mana hayk’aqpas nirqanchu qatikuqninkuna huk cheqasman astakunankuta otaq paykunalla huk llaqtata hatarichinankutapas. Nitaqmi nirqanchu huk wasipi wisq’asqa tiyanankutachu. Kachi allin kananpaqqa mikhuykunawanmi chaqrukunan, k’anchaytaq laqhayaqpi kanan. Chhaynallataqmi cristianokunapas, runakunawanmi kashananku kawsayninkupi yanapanankupaq.

“Manan kay pachamantachu kanku”

Kaypi nisqan hina cristianokunaqa allintan reparananku politicaman chaqrukuymanta. ¿Imarayku? Manaraq wañupushaspan Jesusqa qhatikuqninkunapaq Diosmanta mañapurqan: “Manan kay pachamanta paykunata horqonaykipaqchu mañakuyki, aswanpas saqramanta paykunata waqaychanaykipaqmi. Manan kay pachamantachu kanku, ñoqapas manallataqmi kay pachamantachu kani”, nispa (Juan 17:15, 16). Chhaynaqa, ¿imaynatan cristianokuna huk runakunata yanapankuman kay pachaq afanakuyninwan mana chaqrukuspa? Manaraq chay tapuymanta yachashaspa kinsa tapuykunamanta yachasunchis.

• ¿Ima nirqanmi Jesús politicamanta?

• ¿Imatan ruwananku kay tiempopi cristianokuna?

• ¿Imaynapin llaqtaykiq allinninpaq cristianokunaq yachachisqan?

[4 paginapi willakuy]

Jesusqa manan munarqanchu runakunamanta ayqekunankuta