Jehová Diospa testigonwan rimaspa ¿Jesuschu Dios?

JEHOVÁ DIOSPA TESTIGONKUNAQA anchatan munanku Bibliamanta runakunawan rimayta. ¿Bibliaq imapas yachachisqantachu mana entiendeshanki? ¿Testigokunaq imapas creesqankumantachu yachayta munanki? Chhayna kaqtinqa, paykunata tapukuy. Anchatan kusikunqaku qanwan rimaspa.

Qhawarisun imaynatas Testigokuna runakunawan parlarinku chayta, chaypaqmi Carmen sutiyoq Testigo, señora Susanawan parlarinqa.

¿Iñinkuchu Jesuspi Jehová Diospa testigonkuna?

Susana: Iglesiaymanta pastormi niwan: “Testigokunaqa manan Jesuspi iñinkuchu”, nispa. ¿Cheqaqchu chay?

Carmen: Jesuspiqa iñiykun. Paypi iñispallan salvakuytaqa atisunman.

Susana: Ñoqapas chaytan yuyaykuni.

Carmen: Kaqllatamá yuyaykusqanchis. Sutiymi Carmen, ¿qanpari?

Susana: Susana.

Carmen: Anchatan kusikuni Susana qanta reqsispay. Yaqapaschá tapukushanki, Jesuspi iñinkutaq chayqa, ¿imaraykutaq runakunari ninku manan Jesuspiqa iñinkuchu nispa? ¿Munawaqchu yachayta?

Susana: Arí, munaymanmi.

Carmen: Iñiykuña Jesuspi chaypas, manan Jesusmanta tukuy nisqankupichu creeyku.

Susana: ¿Imaynataq chayri?

Carmen: Wakinmi ninku: “Jesusqa allin runallan”, nispa. Ñoqaykun ichaqa mana chhaynatachu qhawariyku.

Susana: Ñoqapas manan chhaynatachu qhawarini.

Carmen: Chaypipas kaqllatan yuyaykunchis. Hinaspapas Jesús Taytanwan imayna kawsasqanmanta willasqallanpin creeyku, mana nisqanpiqa manan.

Susana: ¿Imayna?

Carmen: Askha religionkunan yachachinku Jesusqa Dios kasqanta. Yaqapaschá qantapas chhaynata yachachirqasunkiku.

Susana: Arí, pastorniyqa ninmi Jesuswan Dioswan kaqlla kasqanta.

Carmen: ¿Ima nirqanmi Jesús pay kikinmanta? ¿Allinchu kanman Bibliawan paymanta yachay?

Susana: Riki, Bibliaqa manan llullakunmanchu.

¿Imatan Jesús yachachirqan?

Carmen: Chhaynaqa Bibliata leesun. Qhawarisun Juan 6:38 textota. Jesusmi nirqan: “Hanaq pachamantaqa uraykamuni, manan munayniyta ruwanaypaqchu, aswanpas kachamuwaqniypa munayninta ruwanaypaqmi”, nispa. Sichus pay Dios kanman chayqa, manan chaytaqa ninmanchu karqan.

Susana: Imaynataq chayri.

 Carmen: Jesusqa manan munayninta ruwananpaqchu hanaq pachamantaqa uraykamurqan.

Susana: Cheqaqtan chaytaqa nishanki, payqa kachamuqninpa munayninta ruwananpaqsi uraykamusqa.

Carmen: Arí, sichus Jesús Dios kanman chayqa, ¿pitaq hanaq pachamantari kachamunman karqan? ¿Imaraykutaq kasukunanri munaynintapas ruwananri karqan?

Susana: Entiendeshaykiñan. Ichaqa iskayashaniraqmi Jesús mana Dios kasqanmanta.

Carmen: Hukkutinpi Jesuspa nisqanta qhawariypas allinmi kanman. Chayman rikch’akuqtan Juan 7:16 textopi nillantaq. ¿Leeruwaqchu?

Susana: Riki. Ninmi: “Hinan Jesusqa paykunata nirqan: ‘Yachachikuyniyqa manan ñoqaqchu, aswanpas kachamuwaqniy Diospan’”, nispa.

Carmen: Gracias. Chaypi nisqanman hina, ¿yuyaykusqantachu Jesús yachachirqan?

Susana: Manan. Kachamuqninpa yachachisqantas.

Carmen: Arí. Chhaynaqa, ¿pitaq Jesustari kachamurqan? ¿Pin willarqan ima yachachinanta? ¿Jesusmanta aswan importantechu kanman karqan chay willaqnin? Hinaspapas kachamuqqa aswan atiyniyoqmi kamachisqa kaqmantaqa.

Susana: ¡Riki! Manan hayk’aqpas chay textotaqa leerqanichu.

Carmen: Juan 14:28 textopi Jesuspa nisqanpi yuyaykullaytaq, nirqanmi: “Uyariwarqankichisñan: Risaqmi, hinaspan qankunaman kutimusaq, nispa nisqayta. Munakuwaspaykichisqa q’ochukuwaqchismi —Yayaman risaq— nisqaymantaqa. Yayaqa ñoqamanta aswan kurakmi”, nispa. Kaypi nisqanman hina, ¿imaynatan Jesús Taytanta qhawarisqa?

Susana: Paymanta aswan kurak kasqantan. Diostan paymanta aswan importantepaq qhawarirqan.

Carmen: Arí. Leellasuntaq Mateo 28:18 textota. Kaypin Jesús qatikuqninkunaman nirqan: “Diosmi qowarqan tukuy atiyta hanaq pachapipas kay pachapipas”, nispa. Nirqanchu, ñawpaqmantapuni atiyniyoq kasqanta.

Susana: Manan, aswanpas chaskisqanmantan nishan.

Carmen: Jesús Dios kanman chayqa, ¿imaynapitaq astawan atiyta chaskinman karqan? ¿Pitaq chaytari qonman?

Susana: Chaypi yuyaykusaq... Allinta yuyaykunapaqmá chayqa.

¿Pitan Jesús rimapayarqan?

Carmen: Hinaspapas sichus Jesús Dios kanman chayqa, kay ruwasqanmi mana tupanmanchu karqan.

Susana: ¿Ima ruwasqan?

Carmen: Bautizakushaspa ruwasqan. Bibliapi qhawasun Lucas 3:21, 22 textota. ¿Munawaqchu leeyta?

Susana: Riki. “Manaraq carcelpi kashaspan Juanqa llapa runata bautizarqan, chaymantataq Jesustapas bautizallarqantaq. Jesús mañakushaqtintaqmi hanaq pachaqa kicharikurqan, hinan Santo Espirituqa paloma hina rikch’ayniyoq pay pataman uraykamurqan. Huk kunkataq hanaq pachamanta nimurqan: ‘Qanmi munakusqay Churiy kanki, qanmi anchata kusichiwanki’”.

Carmen: ¿Imatan Jesús ruwarqan bautizakushaspa?

Susana: Mañakushasqas.

Carmen: Arí. Jesús Dios kanman chayqa, ¿pimanmi mañakusharqan?

Susana: Cheqaypaq. Pastorniytapuni tapusaq.

Carmen: Chaymantapas, unumanta Jesús lloqsirqamuqtin, huk kunkan hanaq pachamanta uyarikurqan, ¿ima nirqanmi chay kunka?

Susana: Jesús munasqan Churin kasqanta, ancha kusichisqantapas.

 Carmen: Arí. Jesús Dios kanman chayqa, ¿pin chaykunata hanaq pachamanta nimushanman karqan?

Susana: Manan hayk’aqpas chaypiqa yuyaykurqanichu.

¿Imaraykun Jesús Taytaymi nispa nin, Diostaq Churiymi nispa?

Carmen: Hinaspapas Jesusqa Diostan Taytay nispa nirqan. Bautizasqa kashaqtintaq hanaq pachamanta huk kunka nimurqan Churiy nispa. Jesús kikinpunitaq nirqan Diospa Churin kasqanta. Sichus rimayta munawaq huk runa kikichallan huk runawan kasqanta, ¿pikunamantan rimashawaq?

Susana: Wawqentin runakunamantan.

Carmen: Riki. Yaqapas mellizokunamanta. Ichaqa Jesusqa Diostan nirqan Taytay nispa, pay kikintataq nikurqan Churi kasqanta. Chhaynaqa, ¿imatan Jesús nisharqan?

Susana: Jesusqa rimasharqan Dios aswan atiyniyoq paymanta kasqantan aswan kurak kasqantawan.

Carmen: Arí. Sut’ipunin wawqentinmanta otaq mellizokunamanta niwasqaykiqa. Sichus Allin Yachachiq Jesús Dioswan kikichallan kasqankuta niyta munanman karqan chayqa, sut’itachá ninman karqan wawqentin otaq mellizo kasqankuta.

Susana: Riki.

Carmen: Aswanpas nirqanmi Taytantin Churintin kasqankumanta.

Susana: Sut’itan nishanki.

¿Imatan Jesuspa ñawpa qatikuqninkuna yachachirqanku?

Carmen: Tiempochayki kashanraq chayqa, astawanmi Jesusmanta sut’inchasunman.

Susana: Allinmi kanman.

Carmen: Sichus Jesús Dios kanman chayqa, qatikuqninkunapas sut’itapunin ninkuman karqan.

Susana: Riki, ninkumanmi karqan.

Carmen: Bibliapiqa manan ninchu paykuna chayta yachachisqankutaqa. Aswanpas Filipenses 2:9 textopin Jesuspa ñawpa qatikuqnin Pablo nirqan: “Chayraykun Diospas paytaqa anchatapuni hatunchaykurqan, hinaspan payman sutita churarqan lliw sutimantapas qollana kaqtapuni”, nispa. Chaytan Dios ruwarqan Jesús wañukapusqan qhepata. Chay textoq nisqan hina, ¿imatan Dios ruwarqan?

Susana: Jesustas hatunchasqa.

Carmen: Arí. Sichus manaraq wañupushaspa Jesús Dioswan kaqlla kanman karqan, chay qhepamantaq Dios hatunchanman chayqa, Diosmanta aswanraqmi kapunman. ¿Kanmanchu pipas Diosmanta aswan hatun?

Susana: Manan kanmanchu.

Carmen: Kaykuna yachasqanchisman hina, ¿Jesús Dioschu? ¿Chaytachu Biblian nin?

Susana: Manan. Aswanpas nishanmi Diospa Churin nispa.

Carmen: Arí, ichaqa manan chayraykuchu Jesustaqa pisichayku. Aswanpas prometesqa Mesías kaspan Dios sonqo runakunarayku wañurqan chhaynapi salvakunankupaq, chaypin iñiyku.

Susana: Ñoqapas chaypin iñini.

Carmen: Chhaynaqa tapukunanchismi imaynatas Jesusta agradecekusunman ñoqanchisrayku wañusqanmanta. *

Susana: Chaytan ñoqapas tapukuni.

Carmen: Munaqtiykiqa, huk p’unchay kutimusaq chay tapuyta Bibliawan kutichinaypaq. ¿Wasipichu kanki kay p’unchayta hina?

Susana: Arí, kaypin kasaq.

Carmen: ¡Allinmi chayqa! Chhaynaqa tupananchiskama.

[Uranpi willakuy]