¿HAYK’AQLLAPAS sasachakurqankichu kasukunaykipaq? *... Yaqapaschá televisionpi pasamusqanta qhawayta munarqanki ichaqa tayta-mamayki mana munarqankuchu. Chaywanpas mana kasukuspan qhawarqankipuni. Ichaqa chaymantaña allinta yuyaykuspan sonqoykipi mana allinchu sientekushanki. Huk runan chhayna karqan, manan yuyaychasqankuta kasukurqanchu, sutinmi Naamán. Qhawarisun imas yanaparqan kasukunanpaq chayta.

3.000 wata ñawpaqtan Naamanqa Siria ejercitopi umalliqmi. Payqa yachasqan kasharqan soldadonkunata kamachiqtin kusukunankuta. Hinan lepra onqoy hap’irqan. Chay millay onqoyqa aychatan leq’eyachin sinchitachá nananpas.

Israelmanta huk sipaschan esposanpa kamachin karqan. Huk kutinmi chay sipaschaqa patronanman willarqan Eliseo profetamanta, qosanta qhaliyachinanmantapas. Chayta Naamán yacharqospan Eliseowan tupayta munashan. Israel nacionmanmi rin askha regalokunata aparikuspa. Ñawpaqtan Israelpa reyninman rin imarayku hamusqanta willananpaq.

Chayta yachaspa hinan Eliseoqa reyman mensajeta apachirqan Naaman wasinman rinanpaq. Wasinman chayaqtintaq mana Eliseochu chaskiq lloqsimun, aswanpas kamachinta kachaspan Naamanman willachimun Jordán mayupi qanchis kutita bañakunanpaq. ¿Imaynatan Naamán sientekunman karqan?...

 Sinchi phiñasqa kaspan Diospa profetanta mana kasuyta munanchu. Soldadonkunatan nirqan: “Chaypaqqa llaqtaypi mayukunapichá bañakuyman”, nispa. Chayta nispan kutiripun. Kamachinkunan ichaqa yuyaycharqanku, ¿ima nispan yuyaychankuman karqan?... Nirqankun: “Ima sasa ruwanataña profeta kamachisunkiman chaypas, ¿manachu kasukuwaq? Chay hinaqa, ¿imanaqtinmi chay ruwayllata nishasuqtiyki mana kasukuyta munankichu?” nispa.

Chay nisqankuta kasukuspan Naamanqa qanchis kutita chay mayupi bañakurqan. Qanchis kaq kutipi unumanta lloqsiqtinmi ancha musphanapaq karqan: aychanmi qhaliyarqapusqa. ¡Lepra onqoyninmi chinkarqapusqa! Chaymi karupiña kashaspapas (yaqa 50 kilometropiña) profetaq wasinman kutirirqan agradecekunanpaq. Askha qolqe valeq regalokunatan qoyta munan, Eliseon ichaqa mana chaskikuyta munanchu.

Chaymi Naamanqa Eliseota valekun. ¿Imatan valekunman karqan?... Nirqanmi: “Ama hina kaspa, iskay mulaq apanan hallp’ata kay Israelmanta apakusaq”, nispa. ¿Imapaqmi chayta munarqan?... Chay patapi Diospaq sacrificiokunata haywananpaqmi. Hinaspapas chay qhepamanqa manañan huk dioskunata yupaychayta munarqanchu, aswanpas Jehová Diosllatan. Rikusqayki hina, manaña ñawpaqpi kasukurqanchu chaypas, qhepamanqa Diospa nisqantan ruwarqan.

¿Imatan Naamanpa ruwasqanmanta yacharqanki?... Payqa yuyaychasqankutan kasukurqan. Chhaynaqa, mana munashankichu kasukuyta chayqa, cambiawaqmi.