Kaypin Bibliaykiwan tapukuyniykikunaman kutichiykunata tarinki. Munaqtiykiqa Jehová Diospa testigonkunan yanapasunkiman kay tapuykunata t’aqwinaykipaq.

1. ¿Ima Gobiernotan Jesús chaskirqan?

Diosmi rey Davidman prometerqan mirayninmanta huk kamachikuq hamuspa Diospa Gobiernonpi wiñaypaq kamachikunanta. Chay mirayqa Jesusmi, paymi kay tiempopi hanaq pachapi Rey hina kamachikushan. (Leey Salmo 89:4; Lucas 1:32, 33.)

David waynachallaraq kashaqtinmi Diosqa akllarqan Israel llaqtata kamachinanpaq. Qhepamanqa churin Salomontan akllarqan Jerusalenpi kaq “Diospa kamachikuy tiyananpi” kamachinanpaq (1 Crónicas 28:4, 5; 29:23). Salomón wañukapusqan qhepamanqa askha reykuna Jerusalenmanta kamachirqanku. Yaqa llapankun ichaqa mana kasukuq karqanku. Chaymi Jehová Dios Babiloniaq ejercitonwan 607 watapi manaraq Jesús hamushaqtin (m.J.h.) chaypi kamachikuq reyta presota apachirqan. Chaymantapachan manaña Davidpa mayqen mirayninpas Jerusalén llaqtapi kamachikurqanñachu. (Leey Ezequiel 21:27.)

2. ¿Hayk’a tiempon pasanan karqan Diospa Gobiernonpi huk rey kananpaq?

Jerusalén thunichisqa kasqan qhepallamanmi Jehová Dios profeta Danielman willarqan huk rey akllananmanta, chay reytaq hanaq pachamanta kamachikamunan karqan. Ichaqa, ¿hayk’aqmantan kamachikuyta qallarinan karqan? (Leey Daniel 7:13, 14.)

Chay tapuypa kutichiyninqa profeta Danielpa willasqan rikhuriypin kashan. Imaynan Jerusalenpi gobierno tukuchisqa kananpaq Dios kamachirqan, chay hinatan rikhuriypiqa Dios kamachirqan hatun sach’ata wit’unankupaq. Chaymantataq profetizarqan chay sach’a “qanchis watapi” wiñamunanmanta. Bibliapi kinsa wata kuskan tiempoqa 1.260 p’unchaykunawan tupan, chaymi qanchis wataqa 2.520 p’unchaykunaman yupakun (Apocalipsis 12:6, 14). Askha profeciakunapin p’unchaykunata watakunapi yupakun (Números 14:34). Chhaynaqa, 2.520 watakuna pasaqtinraqmi Diospa Gobiernon reyniyoq kanan karqan. (Leey Daniel 4:10-17.)

  3. ¿Hayk’aqmi Jesús kamachikuyta qallarirqan?

Diosqa 1914 watapin Jesusta Rey kanapaq churarqan, chayqa karqan Jerusalén llaqta thunikusqanmanta 2.520 watakuna hunt’akuqtinmi. Rey kaspan Jesusqa Satanasta supayninkunatawan hanaq pachamanta wikch’uyamurqan, chaytan ñawpaqta ruwarqan (Apocalipsis 12:7-10). Chaykuna pasasqantaqa manan runakunaqa rikurqankuchu, ichaqa chay hawa kay pachapi imaymana pasasqanqa rikukurqanmi (Apocalipsis 12:12). 1914 watamantapacha imaymana pasasqanmi rikuchin Jesús chay watapi kamachikuyta qallarisqanta. (Leey Mateo 24:14; Lucas 21:10, 11, 31.)

4. ¿Imaynapin Jesús Rey kasqan allinniykipaq?

Chay profeciakuna hunt’akusqanta rikuyqa yanapasunkin Diospa Siminpi confianaykipaq, hinallataq pisi tiempomanta Jesús rey hina llapa runakunaq ñak’ariyninta chinkachinanpipas. (Leey Salmo 72:8, 12, 13; Daniel 2:44.)

Astawan yachayta munanki chayqa ¿Imatapunin Biblia yachachin? nisqa librota qhaway 215-218 paginakunata, chaytaqa Jehová Diospa testigonkunan ruwan.

[18, 19 paginakunapi lista]

(Imaynapuni kasqanta yachanaykipaq, qelqata qhaway)

Octubre

607 m.J.h. ← 2.520 watakuna → 1914 J.h.q.

1000 m.J.h. | 1 m.J.h. | 1 J.h.q. | 1000 J.h.q. | 2000 J.h.q.

← 606 watakuna 3 killapiwan →← 1.913 watakuna 9 killapiwan →

Jerusalenpi kamachikuqkunaq tukupusqan

Sumay: 606 watakuna 3 killapiwan + 1.913 watakuna 9 killapiwan = 2.520 wata

Diosmi Jesusta hanaq pachapi Reyta churan