¿Yachayta munawaqchu Diosmanta: pi kasqanta, munasqanta, mana munasqanta, ima yuyaykusqantapas? Jehová Diosmi Bibliapi paymanta willawanchis. Ichaqa manan llapa runakunachu leespa entiendeyta atinku. ¿Imarayku? Munasqan runakunallaman Dios yachachisqanrayku. Chayta yachanapaq qhawarisun Jesuspa nisqanta. (Leey Mateo 11:25.)

Chay texton khaynata qallarin: “Chaypachan Jesusqa Diosmanta mañakuspa nirqan”, nispa. Jesusqa imatachus rikusqanman hinan Diosmanta mañakurqan; chay p’unchaymi Jesusqa Galileapi kinsa llaqtakunata phiñakurqan milagrokuna ruwasqanta rikushaspapas mana iñisqankumanta (Mateo 11:20-24). ¿Imaynapin chay runakuna milagrokunata rikushaspapas mana Jesuspi iñirqankuchu? Rumi sonqo kasqankurayku (Mateo 13:10-15).

Jesusqa yacharqanmi Bibliapi cheqaq yachayta tarinapaqqa Diospa yanapayninta allin sonqoyoq kaytawan necesitakusqanta. Mañakuspan nirqan: “Yayáy, hanaq pachapipas kay pachapipas munaychakuqmi kanki. Kay yachaykunatan yachayniyoqkunamanta yuyayniyoqkunamantawan pakaykurqanki, hinaspan wawakuna hina kaqkunaman sut’incharqanki. Chaymi graciasta qoyki”, nispa (Mateo 11:25). Chaypi nisqan hina wakillanmi Diospa yachaynintaqa chaskinqaku. Diosqa “hanaq pachapipas kay pachapipas munaychakuqmi”, chaymi derechonpi kashan yachayninta wakinmanta pakananpaq wakinman qonanpaqpas. Ichaqa manan wakillanman sayapakuspachu chaytaqa ruwan. Chhaynaqa, ¿imatan runakunapi qhawarin?

Jehová Diosqa huch’uyyaykukuq runakunatan yanapaykun hatunchakuq runakunatan ichaqa mana (Santiago 4:6). Diosqa, hatunchakuq mana piqpa yanapaynintapas munaq ‘yachayniyoqkunamanta yuyayniyoqkunamantawanmi’ yachayninta pakan (1 Corintios 1:19-21). Ichaqa huch’uyaykukuspa, tukuy sonqowan, ‘wawakuna hina’ payman asuykuqkunamanmi siminmanta yachachin (Mateo 18:1-4; 1 Corintios 1:26-28). Diospa Churinqa reqsirqanmi chay runakunata. Religionkunapi askha hatunchakuq yachaysapa umallikunaqa manan yachachisqanta entiendeqkuchu, común runakunan ichaqa allinta entiendeqku (Mateo 4:18-22; 23:1-5; Hechos 4:13). Ichaqa kallarqantaqmi qhapaq allin educacionniyoq runakuna huch’uyaykukuspa payta qatikuqkunapas (Lucas 19:1, 2, 8; Hechos 22:1-3).

Qanri, ¿yachayta munawaqchu Diosmanta? Payqa manan kay pachapi yachayniyoq runakunatachu akllan, aswanmi chay runakunaq pisichasqan runakunata. Sichus tukuy sonqowan Diospa Siminta estudianki chayqa, cheqaq yachaytan allinta entiendenki. Chay yachaymi kawsayniykipi yanapasunki; qhepamantaq aswan allin kawsayta tarinki, chay kawsayqa hamuq tiempopi Diospa prometesqan wiñay kawsaymi (1 Timoteo 6:12, 19; 2 Pedro 3:13). *