JESUSPA kawsarimpusqanqa manan yanqa rimayllachu karqan ñoqanchispaqqa. Chaymi apóstol Pablo khaynata nirqan: “Cristoqa wañusqanmanta kawsarimpurqanmi. Paymi wañukapuqkunaq kawsarimpunan qallariyqa karqan. Imaynan wañuyqa huk runallawan kay pachapi qallarirqan, ahinallataqmi huk runallawan wañusqakunaq kawsarimpuyninpas qallarirqan. Imaynan Adanwan hukllachasqa kaspa llapa runa wañunku, chay hinallataqmi Cristowan hukllachasqa kaspa llapa kawsarimpunqa”, nispa (1 Corintios 15:20-22).

Jesusqa 16 Nisán killapi 33 watapin kawsarimpurqan. Chay p’unchaypin judío runakuna cosechankumanta ñawpaq rikhuriq rurunta Jehová Diosman haywarqanku Jerusalén templopi. Apóstol Pablon Jesusta suticharqan “qallariy” otaq ñawpaq rikhuriq nispa, chaywanmi rikuchisharqan askha runakuna wañuymanta kawsarimpunankuta.

Jesuspa kawsarimpusqanmanta apóstol Pabloq khaynata nirqan: “Imaynan wañuyqa huk runallawan kay pachapi qallarirqan, ahinallataqmi huk runallawan wañusqakunaq kawsarimpuyninpas qallarirqan”, nispa. Adan huchallikusqanmanta ñoqanchispas huchayoq kaspa wañunchis. Jesusqa ch’uya kawsayninta ñoqanchisrayku qospan huchamanta wañuymantapas kacharichiwarqanchis. Chaytan Romanos 6:23 textopi willan: “Huchaq pagayninqa wañuymi, Diospa qokuyninmi ichaqa Señorninchis Jesucristopi wiñay kawsay”, nispa.

Jesús kikinpunin willawanchis wañusqanpas kawsarimpusqanpas allinninchispaq kasqanta. Nillarqantaqmi: “Pipas paypi iñiqqa wiñay kawsayniyoq kananpaq. Diosqa anchatapunin runakunata munakurqan, chaymi sapan Churinta kachamurqan, pipas paypi iñiqqa ama wañunanpaq, aswanpas wiñay kawsayniyoq kananpaq”, nispa (Juan 3:14-16).

¡May allinchá kanqa wiñay kawsaypi manaña nanaypas ñak’ariypas kaqtinqa! (Apocalipsis 21:3, 4.) ¡Chayta yachaspaqa anchatan kusikunchis! Huk yachaysapan runa khaynata nirqan: “Aya p’ampanakunaqa pisi tiempolla kawsasqanchistan yuyarichiwanchis, kawsarimpuytaq pisi tiempolla wañusqa kasqanchista”, nispa. Chayraykun Jesuspa kawsarimpusqanqa kawsayta qowanchis, chaymantaqa mana iskayasunmanchu.