Llullakuyqa mana cheqaq kaqta rimaymi. ¿Hayk’aqllapas llullakurqankichu? *... Diosta munakuq wakin kurak runakunapas llullakurqankun. Paykunamantan karqan Jesuspa huknin apostolnin, sutinmi Pedro. ¿Yachayta munankichu imarayku llullakurqan chayta? Uyariy kay willakuyta.

Jesusta hap’isqanku qhepamanmi, sacerdotekunaq umallinpa wasinman aparqanku. Kuska tuta masñan kashan, chayllamanmi Pedroqa mana reparachikuspalla wasi tapioman haykuspa nina yawrasqan ladopi tiyaykuspa q’oñikun. Nina yawraq k’anchaywan Pedrota rikuspan huk warmi kamachi asuykuspa nirqan: “Qanpas Galilea provinciamanta Jesuswanmi kasharqanki riki”, nispa. Pedrotaq mancharikuspa negakurqan.

Chay qhepamanmi huk warmi kamachi nillarqantaq: “Kay runaqa Nazaret llaqtamanta Jesuswanmi kasharqan”, nispa. Hukmanta Pedroqa negakurqan. Chaymanta hukñataq asuykuspa nirqan: “Qanpas paykuna t’aqamantapunin kanki”, nispa.

Pedroqa manchasqa kashan, chaymi kinsa kutita llullakuspa nin: “Manapunin chay runataqa reqsinichu”, nispa. Chayllamanmi huk gallo waqarqan, chaymi Pedroqa yuyarirqan Jesuspa kay nisqanta: “Manaraq gallo waqashaqtinmi kinsa kutita negawanki”, nispa. Chaymi Pedroqa hawaman lloqsispa khuyayta waqaykurqan.

¿Qanpas chay hinapi tarikuwaqchu?... Kaypi yuyaykuy, escuelapi kashanki chayllamanmi compañeroykikuna Testigokunamanta khaynata rimayta qallarinku: “Testigokunaqa manan banderata yupaychankuchu”, nispa. Huknin nin: “Paykunaqa manan nacionninkurayku maqanakunkuchu”, nispa. Hukpas  nillantaq: “Paykunaqa manan cristianokunachu kanku, chaymi mana Navidadta festejankuchu”, nispa. Chayllamanmi huknin nisunkiman: “Qanpas Testigon kanki riki”, nispa. ¿Imatan ruwawaq?...

Chayta allinta kutichinaykipaqqa allin preparasqa kanayki. Apóstol Pedropas mana preparasqachu kasharqan, chaymi mancharikuspa llullakurqan. Ichaqa sinchitan llakikurqan chaymi Jehová Diosqa pampacharqan.

Apostolkunaq tiemponpi Ananiasmanta Safiramanta rimasunchis; paykunapas llullakurqankun. Diosmi ichaqa mana paykunata pampacharqanchu, ¿imarayku? Chaymanta yachasunchis.

Jesús hanaq pachaman ripusqanmanta ñan chunka p’unchayña pasan. Karu llaqtakunamata Jerusalén llaqtaman hamunku Pentecostés fiestata ruwanankupaq paykunamanta yaqa 3.000 runakuna hina bautizakunku. Cristianoman tukupuspan astawan yachanankupaq qhepakuyta decidekunku. Chaymi Jesuspa discipulonkuna llapa pisichikuqkunaman yanapanku.

Ananías esposanpiwan hallp’ankuta venderqanku chayllaraq bautizakuqkunata yanapanankupaq. Chay qolqeta apostolkunaman apaspan nirqanku: “Chhaynallapin vendemuyku”, nispa; ichaqa llullakusharqanku. Apóstol Pedron Diospa yanapayninwan chay llullakusqankuta sut’incharqan, hinan Ananiasman nirqan: “Manan runakunamanchu llullakunki, aswanpas Diosmanmi”, nispa; chaymi Ananiasqa kaqpachan wañurqan. Yaqa kinsa horamanta hinataq Ananiaspa warmin Safiraqa haykurqan imachus kasqanta mana yachaspa kaqllatataq llullakuspa wañupullarqantaq.

Chay willakuykunamanta yachayqa anchatan yanapawanchis. Arí, llapallanchismi cheqaqtapuni rimananchis. Ichaqa llapanchismi pantanchis astawanqa wayna-sipas kaspa. ¡Maytan kusikunchis Jehová Dios munakuwasqanchismanta Pedrota hinataqmi pampachawasun! ¿Imaninkin chaymanta?... Yuyariy cheqaqllatapuni rimananchis kasqanta. Sichus hayk’aqllapas llullakusun chayqa, Diospa pampachayninta mañakunanchis. Pedropas chaytan ruwarqan. Sichus kallpachakusun cheqaqllatapuni rimananchispaq chayqa Diosmi allinpaq qhawariwasun.