Texcoco llaqtamantan kani. Chay llaqtaypa callenkunaqa hallp’allan kaq. Yuyarinillataqmi runakuna huk llaqtakunamanta hamusqankuta, asnopitaq imaymanata apamuqku vendenankupaq. Wakcha familiapin wiñarqani, chaymantapas isqon wawqekunan karqayku ñoqataq qanchiskaq kani. Papayqa qaramanta ruwasqa usut’akunata allichaspan llank’aq, qanchis wataypi kashaqtiymi papayqa wañukapurqan. Mamitaytaq imaymanata ruwaspa uywawaqku.

Abueloyqa violinta tocaq, hinallataq religionpa música tocaqkunaq umalliqnin karqan. Yaqa llapa familiaymi tocaq, mamaymi iglesiaq coronpi takiq tioytaq teatrokunapi takiq pianotapas tocaq. Llapallaykun religioso karqayku. Ñoqaqa sacerdoteq yanapaqninmi karqani, munarqanitaqmi católico religionpi misionero kayta, chaymantapas maqanakuymanta peliculakunatan qhawaq kani, chaymi astawan k’araq sonqoman tukupurqani.

Puebla llaqtapi karqan sacerdotekunaq escuelan, chaypin ñoqapas estudiasharqani. Anchata sacerdote kayta munarqani, ichaqa tukunaypaq kashaqtiyña manaña chay iglesiapi kayta munarqaniñachu. ¿Imarayku? Huk monjan sinchita qhawapayawaq paywan kanayta munaspa, manaña munarqanichu chaypas, sonqoypin yuyaykurqani casarakuy munasqayta. Hinaspapas repararqanin chaypi kaq sacerdotekuna pakallapi millaykunata ruwasqankuta. Chaymi imachus munasqayta saqepurqani.

 Chay qhepaman México nacionpi kaq Conservatorio Nacional de Música nisqapi estudiarqani. Chayta tukuspaymi casarakurqani hinaspa tawa wawayoq kapurqayku. Llank’arqanitaqmi iglesiapi takispa.

Casarakusqaykumantapachan sasachakuypi tarikurqayku. Iskayniykun sinchita celosanakuq kayku, chaymi mana sumaqtañachu kawsapurqayku. Qallariypiqa simillawanmi phiñachinakuq kayku, chay qhepamantaq maqanakuspaña kawsarqayku. Chunka kinsayoq wataña casarasqa kasqaykumantan t’aqanakapurqayku chaymanta divorcianakapurqayku.

Manaraq t’aqanakapushaspaykun Jehová Diospa testigonkunawan tuparqani. Paykunamantan iskay iñiqmasikuna wasiyman hamurqanku, hinaspan Bibliata estudianaykupaq munachiwarqanku. Religionmanta ancha yachayniyoqpaq hinan qhawarikurqani. Chaymi mana kaqta yachachisqankuta reparachinaypaq chaskirqani. Ñoqamantaqa sasa tapuykunata tapurqani, paykunan ichaqa Bibliawanpuni kutichiwarqanku. Hinan reparakurqani mana imatapas yachasqayta. Esposayqa millaytan Testigokunata trataq ñoqataq mana tiempoyoq tarikuq kani, chaymi manaña paykunata chaskirqaniñachu.

Phisqa wata qhepatan hukmanta Testigonkunawan tuparqani. Chay tiempopaqqa Elvirawanmi tiyarqani, payqa sumaqtan Testigokunata chaskiq, chaymi hukmanta Bibliata estudiayta qallarirqani. Chaywanpas sasan karqan ñawpa kawsayniyta saqey.

Jehová Diosta serviytapuni munarqani chaymi kawsayniypi imaymanakunata saqenay karqan. Ñawpaqtan iglesiapi llank’anayta saqenay karqan hinaspa huk llank’anata maskhanay karqan (Apocalipsis 18:4). Chaymantapas Elvirawanmi casarakunay karqan.

Bibliamanta iskay textokuna yanapawarqan sinchi saltaq sonqo kasqayta qonqapunaypaq. Hukninmi Salmo 11:5 texto chaypi nisqan hina Jehová Diosqa cheqnikunmi maqaylla-maqaq runakunata, 1 Pedro 3:7 textoq nisqan hina sichus Dios mañakusqayta uyariwananta munani chayqa esposayta respetowan tratanay. Chay textokunapi yuyaymanaspa Diosmanta mañakurqani yanapawananpaq, hinan pisi-pisimanta manaña saltaq sonqochu kapurqani.

Kunanqa kusisqan familiaywan kawsani allin iñiyniyoq kanankupaqmi yanapashani; ñawpaq esposaypa wawaykunawan sumaqta kanaykupaqmi kallpachakushani.

Huch’uychaymantapachan sacerdote kayta munarqani runakunata yanapanaypaq, kunanmi ichaqa chayraq yachani imaynatas runakunata yanapayman chayta. Familiaytan uywani musicata yachachispa. Anchata Jehová Diosta agradecikuni pacienciawan allin runa kanaypaq yanapawasqanmanta.