Estelaqa, * wawankunawanmi iglesianman riq, paymi pastorninta valekurqan Bibliaq yachachisqanta entiendechinanpaq. Ichaqa manan yanaparqanchu, chaymi manaña ripurqanñachu. Paymi nin: “Religionniymanta qelqamuwaspankun nimuwarqanku, ‘manaña huñunakuyman hamunkichu chaypas qolqetaqa apachimuwallayku’ nispa. Chaypin repararqani qolqellaypi interesakusqankuta”, nispa.

Angelinaqa Diospi iñiqpunin karqan, paymi nin: “Religionniypiqa huñunakusqaykupin kinsa kutita platota pasaqku qolqeta churanaykupaq, sapa pasasqankupitaqmi qolqe churanaykuta suyaqku. Qolqetaqa mañakushallaqkupunin, chayta rikuspaymi nirqani ‘Diospa espiritunqa manan paykunapi kanchu’”, nispa.

Yuyaykuy wakin religionkuna reqsisqaykipi. ¿Qolqetachu runakunamanta mañashallanku? ¿Chhayna ruwasqanku Bibliaq nisqanman hinachu kashan?

Jesusmi cristiano religiontaqa paqarichirqan, paymi nirqan: “Gratisllan chaskirqankichis, gratisllataqmi qonkichispas”, nispa (Mateo 10:8). Bibliapi yachachikuykunaqa manan vendenapaqchu, llapa runan chaymantaqa gratislla yachanan.

¿Imaynatan ñawpa cristianokuna iñiq t’aqapi gastokuna ruwasqankuta pagaqku?

Sapankan ‘imaynatachus sonqonpi yuyaykusqanman hina qoq, manan llakisqachu, nitaq kamachisqa hinapaschu. Diosqa kusisqa qoqtan munakun’ (2 Corintios 9:7). Apóstol Pablopas nirqanmi: “Tuta-p’unchaymi makiykuwan llank’arqayku, Diosmanta allin willakuykunata qankunaman willaspa ama mayqenniykichistapas gastachinaykupaq”, nispa (1 Tesalonicenses 2:9). Payqa karpakunatan ruwaq kawsananpaq (Hechos 18:2, 3).

Huñunakusqanku Wasikunaqa manan qhapaq wasikuna hinachu. ¿Ima qolqewanmi ima ruwayninkutapas aparinku? Manan platokunatachu pasanku, nitaqmi qelqankuchu qolqeta mañanankupaq. Aswanpas sonqonpa munasqanman hinan qolqeta qoy munaqqa huk cajaman churanman Huñunakusqanku Wasipi, manataqmi alabakuspachu churanan.

Kay revistakunata ruwaypas qolqepaqmi. Chaywanpas manan qolqeta mañanankupaqqa chaypiqa lloqsimunchu. Aswanpas chay qelqakunaqa Bibliamanta runakuna yachanankupaqmi.

¿Ima ninkin? ¿Chay ruwasqanku tupanchu Jesuspa nisqanwan ñawpa cristianokunaq ruwasqankuwanpas?