Puñushankumanpas hinan wañupuqkunaqa mana imatapas ruwankuchu nitaq yuyaykunkupaschu. Kamaqninchismi ichaqa hukmanta kawsarichiyta atin. ¿Imaynapi yachanchis? Diosmi Jesusman atiytan qorqan askha wañusqakunata kawsarichinanpaq (leey Eclesiastés 9:5; Juan 11:11, 43, 44).

Tiempollanpin Jehová Diosqa yuyayninpi kaq llapa wañupuq runakunata mosoq pachapi kawsarichimunqa. Diosninchisqa anchatapunin munashan wañupuqkunata atiyninwan kawsarichiyta (leey Job 14:14, 15).

Kawsarimpuqkunaqa yachanqaku paykunapuni kasqankuta, reqsillanqakutaq familiankuta amigonkunatapas. Ñawpaq cuerponku hallp’amanña tukupurqan chaypas, Diosmi mosoq cuerpota qonqa, ichaqa kaq yuyaynillayoqta kawsarichimpunqa (leey 1 Corintios 15:35, 38).

Yupasqa runakunallan hanaq pachaman rinankupaq kawsarimpunqaku (Apocalipsis 20:6). Kay Hallp’anchismi paraisoman tukupunqa, chaypin yaqa llapa wañupuqkuna kawsarimpunqaku. Mana hayk’aq wañunankupaq suyakuywan (leey Salmo 37:29; Hechos 24:15).