DIOSTA ALLINTA REQSIY
Jehová Diosqa bendecinmi serviqninkunata
Askha runakunan ninku: “Diosmanqa manan imapas qokunchu runakunaq allin ruwasqanqa”, nispa. Chhaynata yuyaykuqkunaqa manan Diosta reqsinkuchu, Diosqa ancha chaninpaqmi serviqninkunata qhawarin, chaytan Bibliaqa sutʼita rikuchiwanchis Hebreos 11:6 textopi.
¿Imaynatan Jehová Diosta kusichisunman? Apóstol Pablo nirqan: “Mana iñiyniyoq kaspaqa manan Diospa sonqonman chayaqtapuni ruwayta atinmanchu”, nispa. Chaymi Diosta kusichinapaqqa paypin iñinanchispuni.
Chhaynaqa, ¿imataq iñiyniyoq kayri? Iñiyniyoq runaqa manan iskayanchu Diospa kasqanmanta ichaqa manan chayllawanchu rikuchin iñiyniyoq kasqanta; ¿imarayku? Supaykunapas yachankun Diospa kasqanta (Santiago 1:19). Chaymi Diospi iñisqanchistaqa rikuchinanchis paypa munayninman hina kawsaspa (Santiago 2:20, 26).
Chaymantapas iñiyniyoq runaqa manan iskayanchu Jehová Dios bendecinanmanta. Manataqmi iskayanchu Diospaq tukuy imaymana ruwasqanqa manan yanqapaq kasqanpi (1 Corintios 15:58). Sichus iskayasunman bendeciwananchispi chayqa, manan sonqonpaq hinaqa imatapas ruwasunmanchu (Santiago 1:17; 1 Pedro 5:7). Chayrayku pichus ninman: “Diosqa manan pitapas allinpaqchu qhawarin otaq manan pipas paytaqa kusichinmanchu”, nispa chayqa manan Diosta reqsinchu.
¿Pikunatan Jehová Dios bendecin? Apóstol Pablon nin: ‘Diosqa maskhaqninkunata saminchan [otaq bendecin]’, nispa. Biblia tʼikraqkunata yanapaq libropin kay hinata nirqan: “Griego simipi ‘maskhaqninkuna’ nisqaqa Dios ‘yupaychaymantan’ rimashan manan Dios ‘maskhayllamantachu’”, nispa. Huk libron chay simimanta nillantaq tukuy sonqowan yupaychay kasqanta. Chay hinaqa Diosqa bendecin paypi iñispa tukuy sonqowan yupaychaqkunatan (Mateo 22:37).
Sichus iskayanchis Dios bendeciwananchispi chayqa, manan sonqonpaq hinaqa ruwasunmanchu
¿Ima bendeciontan Dios qowasun? Kay Hʼallpapi wiñay kawsayta, chayta qospaqa qoykukuq ancha munakuq kasqantan rikuchinqa (Apocalipsis 21:3, 4). Hinaspapas kay tiempopi tukuy sonqowan Diosta yupaychaqkunaqa ñan chaskishankuña askha bendicionkunata. Kunanqa Bibliawan santo espirituq yanapayninwan iman kusisqa kawsanku (Salmo 144:15; Mateo 5:3).
Jehová Diosqa ancha chaninpaqmi qhawarin payta yupaychaqkunata. Chay yachayqa anchatan kallpachawanchis payman asuykunapaq. Qanpas kallpachakuwaqmi chhayna iñiyniyoq kanaykipaq.
