Diciembre killapi hallpʼantinpi uywa qaranapi siriykusqata Jesuspa nacimientonta ruwanku. Ichaqa, ¿qholla wawata hinachu Jesusta rikunanchis? . . . * Manan. Chaypaq qhawarisun imas pasarqan Belén llaqtapi uywa michiqkunawan.

Huk angelmi qonqaylla chay michiqkunaman rikhurispa nirqan: “Huk Qespichiq nacepusunkichis, payqa Criston, payqa Señormi”, nispa. Imayna tarinankutapas willarqanmi: “Huk wawan walthanawan walthaykusqa uywa qaranapi siriykusqa kashanqa”, nispa. Chay qhepamantaq huk angelkunapas rikhurimurqanku hinan Jehová Diosta yupaycharqanku.

¿Imaynan sientekuwaq angelkunaq yupaychasqanta uyarispa? . . . Chay uywa michiqkunaqa anchatan kusikurqanku, hinan nirqanku: “¡Hakuchis Belén llaqtata! Hinaspa rikumusun Señor Diospa willawasqanchis imachus kasqanta”, nispa. Chaymi “Mariata Josetawan, wawatapas uywa qaranapi siriykusqata tarirqanku”.

Chay qhepamanqa huk runakunan Belén llaqtaman chayamurqanku. Hinan chay runakunaqa anchata kusikurqanku michiqkunaq willasqanta uyarispa. ¿Kusikunkichu Jesusmanta yachaspa? . . . Llapa Diosta munakuqkunan chhaynata sientekunku. Kunan yachasun imaraykus Jesuspa nacesqanmanta askha runakuna kusikusqankuta. Chaypaqqa María soltera kasqan tiempomantan yachananchis.

Huk pʼunchaymi ángel Gabriel Mariaman visitarqan hinan willarqan wawayoq kananpaq. Chay wawaqa ancha allin reqsisqa kanan karqan, “Ancha Hatun Diospa Churin” nisqa. Hinaspapas willarqanmi wiñaypaq kamachikunanmanta.

Mariaqa manan haykʼaqpas huk qhariwanqa  puñurqanchu chhaynaqa, ¿imaynapin wawayoq kayta atinman karqan? Chaytan Mariaqa angelta tapurqan. Angeltaq nirqan: “Santo Espiritun qanman uraykamunqa, Ancha Hatun Diosmi atiyninwan pʼistuykusunki, chaymi naceq wawaqa Diospaq tʼaqasqa kanqa, Diospa Churin sutichasqataq kanqa”, nispa. Jehová Diosqa wawantan Mariaq wiksanman astamurqan chaypin Jesusqa llapa wawakuna hina wiñarqan. Chay ruwasqanqa huk milagron karqan.

¿Rikurqankichu navidadpi Jesuspa nacimientonta ruwasqankupi “kinsa reykuna” churasqankuta? . . . Chayqa manan cheqaqchu. Chay “kinsa reykunaqa” manan reykunachu karqanku aswanpas chʼaska qhawaypi yachaysapa runakunan, paykunaqa Diospa cheqnisqan ruwaykunatan ruwarqanku. Hinaspapas Biblian nin: “Wasiman haykuspataq wawata rikurqanku maman Mariatawan”, nispa. Paykuna Jesusman visitashaqtinkuqa manan uywa qaranapi sirikusqa qholla wawatachu tarirqanku, aswanpas wiñasqa wawañan karqan chaymi huk wasipiñan tiyarqan Josewan Mariawan.

¿Imaynatan chʼaska qhawaypi yachaysapa runakunan Jesusta tarirqanku? . . . Chay runakunaqa huk chʼaskaman rikchʼakuqtan qatiparqanku. Manaraq Belenman pusashaspan chay chʼaskaqa Jerusalenpi kamachikuq Herodesman pusarqan. Biblian willan Herodesqa Jesús wañuchiy munasqanta. Chhaynaqa, ¿pin chay chʼaskata churamunman karqan? . . . Satanasmi karqan.

Satanasqa qholla wawata hinan Jesusta rikunanchista munan. Ichaqa ángel Gabrielmi Mariata, nirqan: ‘[Jesusqa] kamachinqan kamachikuynintaq mana tukukuq kanqa’, nispa. Jesusqa hanaq pachapi reyña kashan, pisi tiempomantataq mana allin ruwaq runakunata chinkachinqa, chhaynatan Jesustaqa yuyarinanchis chaytan runakunamanpas yachachinanchis.