Isabel: Imaynalla señora Sofía. Kusikuni hukmanta tupaspay.

Sofía: Imaynalla señora Isabel

Isabel: Qayninpan parlasqanchispin tapuwarqanki imaynan Dios sientekun ñak’arisqanchista rikuspa. * Chaytaqa unaymantañan yachayta munarqanki riki, astawanqa mamayki accidentakusqanmantapacha. ¿Imaynan mamitayki kashan?

Sofía: Kunanqa allinmi kashan, mayninpin ichaqa mana allinchu sientekun.

Isabel: Chhaynapi tarikuyqa manan facilchu.

Sofía: Ari, chaymi mayninpiqa tapukuni: “¿Hayk’aqkamataq chhaynatari ñak’arisaqku?”, nispa.

Isabel: Allinmi chay hina tapukusqaykiqa, qayninpa parlasqanchispin kayta tapurqayki: “¿Imaraykun Dios atiyniyoq kashaspapas, hinallata qhawan ñak’ariykuna kananta?”, nispa riki.

Sofía: Arí, yuyashanin.

Isabel: Manaraq Bibliawan chay tapuyta kutichishaspa, yuyarisunchis qayninpa rimasqanchismanta.

Sofía: Allinmi kanman.

Isabel: Chaypin yacharqanchis huk runa Diosta kay hinata tapusqanta: “¿Imaraykun hinallata qhawanki ñak’ariykuna kananta?”, nispa. Chay hina tapusqanwanqa Diosqa mana phiñakurqanchu nitaq nirqanchu, “mana iñiyniyoq runa” nispaqa.

Sofía: Chaytaqa manan yacharqanichu.

Isabel: Yachallarqanchistaqmi ñak’ariypi tarikuqtinchis Jehová Diospa sonqon nanasqanta. Biblian nin: “Diosqa Israel runakunaq muchusqanta rikuspa pasaqtapuni llakikurqan”, nispa. * ¿Manachu chay yachasqanchis sonqochawanchis?

Sofía: Arí, sonqochawanchismi.

Isabel: Tukuypitaq yacharqanchis Diosqa tukuy atiyniyoq kasqanta chaymi atin ima ñak’ariytapas tukuchiyta.

Sofía: Chaytan mana entiendenichu. Diosqa tukuy atiyniyoqtaq chayqa, ¿imaraykun hinallata qhawan ñak’ariykuna kananta?

Isabel: Chayta yachananchispaq qhawarisunchis Génesis librota, ¿yuyashankichu Adanmanta Evamanta hark’asqa sach’a rurumantapas?

Sofía: Ari, chaytaqa iglesiaypin yacharqani. Diosmi paykunata nirqan sach’a ruruta ama mikhunankupaq ichaqa manan kasukurqankuchu.

 Isabel: Ari, ichaqa ñawpaqta qhawarisun imas pasarqan manaraq chayta ruwashaqtinku. Chaypin yachasun imaynata ñak’ariy paqarisqanta. Chaypaqqa leesun Génesis 3 capitulota 1-5 versiculokama. ¿Leerqowaqchu?

Sofía: Chaypi nishan: “Mach’aqwayqa Señor Diospa ruwasqan llapan salqa animalkunamantapas aswan yuyaysapan karqan. Hinan warmita nirqan: ‘¡Ahá! ¿Dioschu nirqasunkichis: Aman mikhunkichischu huertapi llapa sach’a ruruta, nispa?’ nispa. Warmitaq mach’aqwayman kutichirqan: ‘Huertapi sach’akunaq ruruntaqa atiykun mikhuyta, huerta chawpipi kaq sach’a rurullatan manaqa, Diosmi niwarqanku: Aman chaytaqa mikhunkichischu, amallataq llamiykunkichispaschu, mana chayqa wañunkichismi’, nispa. Hinaqtinmi mach’aqwayqa warmita nirqan: ‘Manapunin wañunkichischu. Diosqa yachanmi chayta mikhuqtiykichis hina ñawiykichis kicharikunanta, hinaspa Dios hina allinkaqta mana allinkaqta reqsiq kanaykichista’”, nispa.

Isabel: Gracias, kunanqa chay textokunata t’aqwirisunchis. Chaypi nisqan hina huk mach’aqwaymi Evata rimapayasqa. Huk texton sut’inchan manan mach’aqwaypunichu rimasqanta aswanpas Saqra Satanás. * Saqran Evata tapurqan Jehová Diospa kamachisqanmanta. ¿Imatan Dios Adanman Evamanwan kamachirqan? Chayta mana kasukuqtinkuqa, ¿ima pasanan karqan?

Sofía: Wañunankun karqan.

Isabel: Arí. Saqran ichaqa nirqan: “Manapunin wañunkichischu”, nispa. Chaywanmi Diostan tumpasharqan llullamanta

Sofía: Chaytaqa manan hayk’aqpas uyarirqanichu.

Isabel: Chay tumpasqanqa unaypiraq sut’inchakunan karqan. Yachanki, ¿imarayku?

Sofía: Manan yachanichu.

Isabel: Chaypaq kaywan rikch’anachisun. Huk p’unchay hamuspaymi niykiman: “Qanmantaqa aswan kallpasapan kani”, nispa. ¿Imaynatan chay rimasqayta sut’inchawaq?

Sofía: Yaqapaschá iskayninchis aswan llasa q’epita hoqarisunman.

Isabel: Ari, chayta ruwaspan reparasunman mayqenninchis aswan kallpasapa kasqanchista. Chaytaqa ratollan sut’inchakunman, riki.

Sofía: Arí.

Isabel: Ichaqa sichus tumpaykiman: “¿Kay señoraqa manan honradachu nispa chayri?”

Sofía: Chayqa hukniraymi.

Isabel: Honrada kasqaykita sut’inchayqa manan facilchu riki.

Sofía: Ari.

Isabel: Chayta sut’inchanapaqqa tiemporaqmi pasanan, chhaynapi hukkuna honradachus kanki icha manachus chayta yachankuman.

Sofía: Ari, chhaynapunin kanan.

Isabel: Hukmanta qhawasun Génesis librota, Saqra nirqanchu: “¿Ñoqan Diosmanta aswan kallpasapa kani nispa?”

Sofía: Manan.

Isabel: Diosninchispaqqa manan sasachu kanman karqan chayta sut’inchayqa. Satanasmi ichaqa Diosmanta nirqan: “Manan honradochu”, nispa. Kay hinatapas nishanman hinan karqan: “Diosqa llullakushanmi ñoqan cheqaqta nishayki”, nispa.

Sofía: ¿Chaytachu nisharqan?

Isabel: Ari, Diosqa ancha yachayniyoqtaq chayqa repararqanmi tiempowan chay tumpasqanta sut’inchananta. Chaypiraqmi sut’iman horqonan karqan pi llulla kasqanta.

Sofía: Ichaqa Diospa cheqaq rimasqantaqa sut’ichakurqanmi riki Evaq wañupusqanwan.

 Isabel: Ari, ichaqa Saqraqa manan chayllamantachu rimarqan. ¿Imamantawanmi 5 versículo willashan?

Sofía: Sach’a ruruta mikhuqtinkuqa ñawinku kicharikunan karqan.

Isabel: Ari, ‘Dios hina allinkaqta mana allinkaqta reqsinanku’ karqan. Chaywanmi Diosta tumpasharqan allin kaqta runakunamanta hark’ashasqanta.

Sofía: Ahhh . . .

Isabel: Chay nisqanwanmi Diosta tumpashallarqantaq.

Sofía: ¿Imamanta? Manan entiendenichu.

Isabel: Saqran Evaman llapa runakunamanpas nisharqan: “Diostaqa manan necesitankichischu”, nispa. Diosqa chayta sut’inchananpaqqa tiempo pasanantarqami suyanan karqan. Chaymi hinallata saqerqan kay pachata Satanás kamachikunanpaq. Chhaynaqa kay pachata kamachikuqqa Saqra Satanasmi, chayraykun hallp’antinpi ñak’ariy kashan. * Ichaqa kashanmi allin willakuykuna.

Sofía: ¿Allin willakuykuna?

Isabel: Ari, Biblian riman allin willakuykunamanta. Ñawpaqpi nin: Jehová Diosqa manan karupichu kashan ñak’ariq runakunamanta. Rey Davidmanta yachasun, paymi sinchitan kawsayninpi ñak’arirqan, chaywanpas Salmo 31:7 textopi kayta nirqan. ¿Leerqowaqchu?

Sofía: Riki, nishanmi: “Anchatapunin munakuwanki, chaymi q’ochukuspa kusikusaq. Qanmi muchusqaykunata rikurqanki, llakikusqaykunatapas yacharqanki”, nispa.

Isabel: Qhawarisqanchis hina Davidqa nishutan ñak’arirqan, chaywanpas Jehová Diospa khuyapayasqanta yuyarispan sonqon tiyaykuq. Qanri, ¿imayna sientekunki Jehová Dios khuyapayakuq kasqanmanta, ñak’arisqanchista rikumusqanmantapas yachaspa?

Sofía: Sonqoymi thak-niyun.

Isabel: Chaymantapas Jehová Diosqa manan hinallatachu qhawanqa wiñaypaq ñak’arinanchista. Bibliapin niwanchis Jehová Dios pisi tiempomanta Satanaspa kamachisqanta chinkachipunanta. Hinaspapas chinkachinqa lliw ñak’ariykunata, chhaynapin mamitaykipas qanpas manaña ñak’arinkichisñachu. Huk kaq semanapin kay tapuyta kutichisunman, ¿imaraykun mana iskayananchischu pisi tiempomanta Jehová Dios ñak’ariykuna tukuchinanmanta? *

Sofía: Allinmi kanman.