Dios, ¿rey Davidpi piensanmanchu karqan? Tukuy atiyniyoq Dios, ¿qanpi piensanmanchu? Askha runakunan ninku: “¿Manan ñoqapiqa piensanmanchu?”, nispa. ¿Imaraykun chhaynata ninku?

Wakinmi ninku: “Runakunaqa manan imapaschu kanchis Diospa ñawpaqenpi”, nispa. Chayqa cheqaqmi, “Diospaqqa hatun suyukunaqa unu sut’uy hinallan, balanzapi k’askarayaq ñut’uy-ñut’u hallp’a hinallan” (Isaías 40:15). Huk ateo runan nirqan: “Runakunaqa hatunchakuspan ninku: ‘Diosqa ñoqapiqa piensanmi”, nispa.

Wakinqa kaytañataqmi ninku: “Ñoqaqa manan Diospa yanaparinanpaq hinachu kani”, nispa. Jim sutiyoq runan willakun: “Sapa kutillanmi Diosta mañakuq kani millay genioyta cambiaypi yanapawananpaq. Ichaqa yapamantan kaqllaman urmaykuq kani. Chaymi nirqani: ‘Sinchi millay runachá kani, chaychá Diospas mana yanapariwanchu’”, nispa.

¿Sinchi karupichu Dios kashan runakunamanta? ¿Manachu ñoqanchispi piensan? ¿Imaynatan qhawarin huchayoq runakunata? Biblian kutichin: “Diosqa manan sapankanchismantaqa karupichu kashan”, nispa (Hechos 17:27). Arí, Simin Qelqapin Dios willawanchis qayllallanchispi kashasqanta, sapankanchispi piensasqantapas. Chaytan qatimuq tawa yachachikuykunapi t’aqwirisun.