¿IMARAYKUN ISKAYANKU? Askha runakunan llakipi kaspa mayta munanku Diospa kallpachananta. Ichaqa ninkun: “Diosqa manan ñoqataraqchu yanapawanan”, nispa. Raquelmi nirqan: “Runakuna sinchi llakipi kasqankuta yuyarispan sasachayniyta pisipaq qhawarini, hinan Diosmanta manaña mañakunichu”, nispa.

¿IMANINMI BIBLIA? Llapa runakunan huchayoqña nacenchis. Chaymi mana Diospa kamachikusqanman hinapunichu imatapas ruwanchis. Chaywanpas Diosqa ‘ñoqanchista munakuwaspanchismi Churinta kachamurqan wañusqanwan huchanchista pampachananpaq’ (1 Juan 4:10). Jesuspa sacrificakusqanwanmi Dios huchanchista pampachawanchis, conciencianchista ch’uyanchan, hamuq tiempopitaq thak kawsayta wiñay kawsaytawan qowasun. * Ichaqa manan huk runakunallapaqchu chay sacrificiota qorqan, aswanpas qanpaqwanmi, ¿imaynapi chayta yachanchis?

Apóstol Pablopas Jesuspa sacrificakusqanmanta anchata agradecekuspan nirqan: ‘Diospa Churinmi [...] munakuwarqan, chaymi ñoqarayku wañurqan’, nispa (Gálatas 2:20). Pablo manaraq iñiq kashaqtinmi Jesusqa wañupurqan, chaywanpas Pabloqa chay sacrificiotan Diospa regalonta hina qhawarirqan.

Jesuspa sacrificakusqantan Diosqa qanmanpas huk regalota hina qosunki. Chaywanmi payqa rikuchin ancha chaniyoqpaq qhawarisqasuykita. Chay regalon ‘wiñaypaq sonqochasunki, allin suyakuytapas qosunki’, yanapasunkitaq ‘allin rimaypi ruwaypipas’ allinta takyanaykipaq (2 Tesalonicenses 2:16, 17).

Jesusqa yaqa 2.000 wata ñawpaqtaraqmi kawsayninta sacrificiopi qorqan. Chhaynaqa, ¿imaynapin yachanchis kunanpas Dios ñoqanchispi interesakusqanta?