Huk gobiernolla kamachiqtinqa allin kawsaytachá runakunapaq apamunman. Kunan tiempopin ichaqa askha runakuna mana imayoq kasqankurayku nishuta sufrinku, hukkunataq qhapaq kanku. Sichus huk gobiernolla pachantinta kamachinman runakunaq imachus necesitasqantapas qonman chayqa, allinkunatachá ruwanman. ¿Atinmanchu runamasinchis chay hina gobiernota rikhurichiyta? (Leey Jeremías 10:23.)

Ñawpaq tiempomantapachan gobiernokunaqa imaymana mana allinkunata ruwarqanku, astawanqa wakchakunata. Wakin gobiernokunataq nishuta ñak’arichirqanku runakunata (Eclesiastés 4:1; 8:9). Jehová Diosmi ichaqa prometewanchis huk sumaq gobiernota, chaypi kamachikuqpas sumaqtan runakunata cuidanqa (leey Isaías 11:4; Daniel 2:44).

Jehová Diosmi chay gobiernopi kamachikunanpaq Jesucristota akllarqan. Payqa allin kamachikuqmi kanqa (Lucas 1:31-33). Kay pachapi kashaspan Jesusqa runakunata khuyapayaspa yanaparqan. Payqa reyñan kapun, chaymi hamuq tiempopi llapa runakunata hukllachanqa, kay pachamantapas ñak’arichiykunata chinkachinqa (leey Salmo 72:8, 12-14).

¿Llapa runakunachu Jesusta chaskinqa reyninta hina? Manan llapankuchu. Jehová Diosmi ichaqa pacienciawan suyashan llamp’u sonqo runakuna payman kutirikunankuta (2 Pedro 3:9). Pisi tiempollamantan Jesusqa millay runakunata wañuchipunqa, thak kawsaytataq apamunqa (leey Miqueas 4:3, 4).