¿Iman umaykiman hamun “tukukuy p’unchay” nisqa rimayta uyariqtiyki? Yaqapaschá huk pastor Bibliata hap’iykuspa mancharisqa uyayoq alto kunkawan rimashasqan. Otaq hanaq pachamanta hatunkaray rumi haykumuspa kay hallp’awan chocasqan. Otaq hallp’antin qhellichakapuqtin kawsay chinkapusqan, otaq huk hatun bombata kachaykamuqtinku hallp’antin chinkapusqan. Chaykunata uyarispan wakin runakuna sinchita manchakunku, wakin burlakunku, wakintaq mana interesakunkuchu.

Biblian nin: “P’uchukaymi chayamunqa”, nispa (Mateo 24:14). Chay p’unchaytan sutichan: ‘Diospa hatun taripay p’unchaynin’ otaq “Armagedón”, nispa (Apocalipsis 16:14, 16). Religionkunaqa imaymanatan ninku tukukuy p’unchaymanta, chaymi runakunaqa imaymanata piensanku otaq manchakunata rimanku chay p’unchaymanta. Biblia ichaqa sut’inta willan chay p’unchaymanta, willallantaqmi cercallapiña kashasqanta, salvakunapaq imakunata ruwasunman chaytapas. ¿Iman tukukuy p’unchay? ¿Imakunan chay p’unchaypi tukupunqa? Chaykunamantan kunan yachasun.

1. HALLP’AQA MANAN NINAPICHU TUKUKUNQA

   Biblian nin: ‘[Diosmi] kay pachata allinta teqsicharqan sayashasqanmanta ama hayk’aqpas kuyurinanpaq’, nispa (Salmo 104:5). Arí, chay textopi huk textokunapipas nisqan hina, kay hallp’aqa manan hayk’aqpas tukukunqachu, manataqmi pipas chinkachinqachu (Eclesiastés 1:4; Isaías 45:18).

2. ÑAN FECHA KANÑA HAYK’AQ CHAYAMUNANPAQ

   Biblia nin: “Chay p’unchayta chay horatawanmi ichaqa mana pipas yachanchu, manan hanaq pachapi kaq angelkunapas, manallataq Churipas, aswanpas Yayallan. Manan yachankichischu hayk’aqchus chaykuna kanantaqa, chayrayku cuidakuychis, makilla kashaychis”, nispa (Marcos 13:32, 33). Arí, chaypi nisqan hina, manan pipas yachanchu hayk’aqchus tukukuy p’unchay chayamunanta, Diosmi ichaqa fechata churanña hayk’aq chayamunanpaq.

3. ¿IMAYNATAN QALLARINQA TUKUKUY P’UNCHAY?

   Biblian nin: “Chaymantataq hanaq pachata kicharisqata rikurqani, hinan yuraq caballo rikhurimurqan, chaypi sillakuqpa sutinqa ‘Hunt’aqkaq Cheqaqkaq’ nisqan kasqa. [...] Chay qhepatataq manchay wak’a animalta kay pacha reykunata, ejercitontintakama rikurqani. Paykunan huñukurqanku caballopi sillaykusqa kashaqwan llapa soldadonkunawan ima maqanakunankupaq”, nispa (Apocalipsis 19:11-21). Chay textopi willasqanqa huk rikch’anachiymi, ichaqa sut’itan willashan Diosninchis angelninkunawan llapa enemigonkunata wañuchinanta.

1. LLAPA GOBIERNOKUNA

   Biblian nin: “Chay reykuna kamachikushaqtinmi, Hanaq Pacha Diosqa mana hayk’aq thunikuq suyuta [gobiernota] sayarichinqa, manataqmi wak suyuqa chayta kamachinqachu, aswanpas llapa suyukunatan ñut’uspa tukunqa, wiñaypaqtaq kanqapas”, nispa (Daniel 2:44). Kinsa  kaq partepi yachasqanchis hina, ‘kay pacha reykunan’ huñukunqaku “caballopi sillaykusqa kashaqwan llapa soldadonkunawan ima maqanakunankupaq”. Ichaqa Diospa gobiernonmi llapankuta atipanqa (Apocalipsis 19:19).

2. GUERRA, CHEQNINAKUY, MANA CHANIN KAYPAS

   Salmo 46:9 textopin nin: ‘Awqa-tinkuykunan [guerrakunan] qollupunqa’, nispa. Biblian nillantaq: “Chanin kawsaqkunaqa kay suyupin tiyanqaku, mana huchallikuqkunapas kaypin kashanqaku, millay runakunan ichaqa kay suyumanta wikch’usqa kanqaku, wasanchaqkunapas chaymanta t’irasqan kanqaku”, nispa (Proverbios 2:21, 22). Apocalipsis 21:4, 5 textopin nillantaq: ‘[Diosmi] lliw imaymanata mosoqta ruwanqa’, nispa.

3. PANTASQATA YACHACHIQ RELIGIONKUNA

   Chay religionkunamantan Biblia nin: “Profetakunan llullakuspa rimanku, sacerdotekunan kamachikunku ima munasqankuman hina [...], ¿imatataq ruwankichis p’uchukay p’unchay chayamuqtinri?”, nispa (Jeremías 5:31). ¿Iman sucedenqa chay religionkunawan? Jesusmi willarqanña imachus sucedenanta, nirqanmi: “Askhan taripay [tukukuy] p’unchaypi niwanqaku: ¡Señor! ¡Señor! ¿Manachu qanmanta willakurqayku, sutiykipi supaykunatapas qarqorqayku, sutiykipi askha milagrokunatapas ruwarqayku? nispa. Chaymi paykunata nisaq: Manapunin reqsiykichischu, qayllaymanta anchhuriychis mana allin ruwaqkuna”, nispa (Mateo 7:21-23).

4. MANA CHANIN RUWAQ MILLAY RUNAKUNA

   Jesusmi nirqan: “Kaykunamantan Diosqa huchachanqa: K’anchaymi kay pachaman hamurqan, runakunataq laqhayaqta aswanta munakurqanku k’anchaymantaqa, ruwasqanku mana allin kasqanrayku”, nispa (Juan 3:19). Diosta kasukuq Noé runaq tiemponpin Diosqa llapa millay runakunata wañuchirqanña. Chaymantan Biblia nin: “Unullawantaqmi ñawpa tiempopi kaq hallp’a pachapas millp’usqa lliw tukukapurqan. Kunan kashaq hanaq pachawan kay pachawanmi ichaqa Diospa kikin siminwan ninapaq waqaychasqa kashan, hinaspan hatun taripay p’unchaypi ninawan ruphaykachisqa kanqa”, nispa (2 Pedro 3:5-7).

Noepa tiemponpin ‘hallp’a pacha’ chinkachisqa karqan, ichaqa ‘hallp’a pacha’ nispaqa millay runakunamantan rimashan, paykunan chinkachisqa karqanku manan kay hallp’achu. ‘Hatun taripay p’unchay’ chayamuqtinpas millay runakunan chinkachisqa kapunqaku. Diospa amigonkunan ichaqa chay p’unchaypi pakaykusqa kanqaku, imaynan Noepas familianpas pakaykusqa karqanku hinata (Mateo 24:37-42).

¡May sumaqchá kawsay kanqa manaña millay runakuna kapuqtin! Tukukuy p’unchaymanta Bibliaq willasqanqa ancha kusikunapaqmi. Ichaqa nishankipaschá: “¿Hayk’aqtaq chay p’unchayri chayamunqa? ¿Imatan ruwanay chay p’unchaypi salvakunaypaq?”, nispa. Chaymantañataq kunanqa Bibliapi yachasun.