Jobmanta Biblia nin: “Hunt’aq runa, chanin runa karqan”, nispa (Job 1:1). Lotmantapas nin: ‘Chanin runa’, nispa (2 Pedro 2:8). Davidmantapas nillantaq: “[Diospa] ñawpaqenpipas chaninta ruwarqan”, nispa (1 Reyes 14:8). Qatimuqpi astawan paykunamanta yachasun. Chaypin yachasun paykunapas pantaq runa kasqankuta, imatan paykunamanta yachasunman chayta, huchayoq kaspapas imaynatan Diospa sonqonta kusichisunman chaytawan.

Jobqa imaymana llakikuykunapin tarikurqan, chaymi nirqan: “Diosmanqa manan imapas qokunchu payta kasukusqay mana kasukusqaypas”, nispa. Chhayna yuyaykusqanqa manan allinchu karqan (Job 9:20-22). Hinaspapas Jobqa chanin runapaqmi qhawarikurqan. Chaymi hukkunaqa payta uyarispa nirqanku: “Kay runaqa Diosmantapas aswan chaninpaqmi qhawarikun”, nispa (Job 32:1, 2; 35:1, 2).

 Lotqa manan usqhayllachu Diospa kamachisqanta kasukurqan. Sodoma Gomorra llaqtakunaqa sinchi qhelli kawsaypi karqanku, chaymi Lotpas “sonqonpi llakikuspa kawsarqan” chay runakunaq kawsayninta rikuspa (2 Pedro 2:8). Diosmi nirqanña chay llaqtapi kaq runakunata wañuchinanta, chaymi Lotpas familianpas usqhaylla lloqsinanku karqan chay llaqtamanta. Paykunan ichaqa mana usqhaychu lloqsirqanku. Hinan Diospa kachamusqan angelkuna Lot-ta familiantawan makinkumanta hap’ispa llaqta hawaman pusamurqanku (Génesis 19:15, 16).

Davidpas sonqonpa munasqanwan aysachikurqan, chaymi casarasqa warmiwan pantarqan. Ichaqa manan chayllatachu ruwarqan, huchanta pakananpaqmi chay warmiq qosanta wañuchinankupaq kamachirqan (2 Samuel, 11 capítulo). Chaymi Biblia nin: “Davidpa chay ruwasqanmi ichaqa Señor Diospa ñawpaqenpi mana chaninchu karqan”, nispa (2 Samuel 11:27).

Chay kinsa runakunaqa pantarqankun, chaywanpas paykunaqa huchankuta saqespa Diosman kutirikurqanku hinaspa sonqomantapacha Diosta kasukuyta munarqanku. Pantaq runakunaña karqanku chaypas Biblian paykunamanta nin: “Iñiyniyoq runakuna”, nispa. Qatimuqpi paykunamanta astawan yachasun.

Llapallanchismi pantaq runa kanchis, ichaqa, ¿imatan ruwasunman? (Romanos 3:23.) Huchanchista saqespa Diosman kutirikunanchis, hinaspa tukuyta ruwananchis Dioswan allinpi kananchispaq.

 ¿Imatan Jobpas, Lotpas, Davidpas ruwarqanku Dioswan allinpi kanankupaq? Jobqa sumaq sonqo karqan, chaymi rimasqanmanta pesapakurqan Jehová Dios yuyayninman kutichiqtin (Job 42:6). Lotqa Dios hina millakurqan Sodoma Gomorra llaqtakunapi millay kawsayta. Ichaqa mana usqhayllachu kamachisqanta kasukurqan. Chaywanpas kasukurqanmi. Chaymi chay llaqtapi tukuy kaqninta saqespa lloqsimpurqan mana qhepata qhawarikuspa. David, Diospa kamachikuynintaña p’akirqan chaypas chay huchanmanta pesapakuspa Diosmanta perdonta mañakurqan (Salmo 51).

Diosqa yachanmi huchayoq runa kasqanchista. Chaymi Diosqa chay kinsa runakunata chaninpaq qhawarirqan ñawpaqpi pantarqankuña chaypas. Diosqa “reqsiwanchismi imayna kasqanchista, yuyarikuwanchismi ñut’u hallp’a kasqanchista” chaymi atinallanchista imatapas kamachiwanchis (Salmo 103:14). Chhaynaqa, ¿ima ruwananchistan munan?

Diosta kusichinapaqqa yuyarisun Davidpa nisqanta: “Churíy Salomón, reqsikuy taytaykiq Diosninta, hinaspa serviy tukuy sonqowan”, nispa (1 Crónicas 28:9). ¿Imaynatan tukuy sonqowan Diosta servisunman? Chaypaqqa Diosta munakunanchis, kallpachakunanchis reqsinanchispaq, kamachikuyninta kasukunapaqpas. Ichaqa mana ch’uya runaraqchu kananchis chaykunata ruwanapaq. Tukuy sonqowan Diosta serviqkunaqa munankun Diospa nisqanman hina kawsayta. Job chhayna runa karqan, chaymi Diosqa paymanta nirqan: “Hunt’aq runa, chanin runa”, nispa, Lot-tapas nirqan: ‘Chanin runa’, nispa. Davidtapas nirqan: ‘Ñawpaqeypin chaninta ruwarqan’, nispa. Ñawpaqpi pantaqña karqanku chaypas, Diosmi allinpaq paykunata qhawarirqan.

Sichus umanchisman millay piensaykuna hamun, p’enqakunapaq hina imatapas rimarunchis otaq mana allinta ruwarunchis chayqa, ama pisipasunchu. Aswanpas Diospa kinsa serviqninkunata yuyarisun. Jehová Diosqa yachanmi pantaq runa kasqanchista. Chhaynaña kaqtinpas payqa munanmi kasukuq kananchista payta munakunanchistawan. Chaykunata ruwaqtinchisqa atisunmi Diospa sonqonta kusichiyta.