•   Qanqa manapaschá imata ruwanapaqpas nishutaraqchu piensanki, ichaqa yaqapaschá esposaykiqa qosaykiqa imapas allin lloqsinanta munaspa imaymanakunata ruwan.

•   Qanqa tranquilollapaschá kanki pisita rimaq imapaschá kanki, qosayki esposaykipaschá ichaqa alegre rimaysapa ima.

 ¿Phiñakunkichu esposaykiq qosaykiq chhayna kasqanwan? Arí nishanki chayqa qosaykiq esposaykiq chhayna kasqallantan qhawashanki. Chayllatachus qhawanki chayqa manan kusisqachu casado kausayniykichispi kankichis. Bibliapas ninmi: “Jujpa pantasqanta sapa kuti yuyarichiqmi ichaqa allin amigokunata t’aqanachin”, nispa (Proverbios 17:9).

 Qosaykiq o esposaykiq imapipas pantasqallanta qhawanki chayqa, discutiymanmi chayankichis. Chhaynaqa chayllata qhawanaykimantaqa allin ruwasqankunapi piensay.

Kaypin yachasunchis:

•  Allin ruwasqankunapi mastaqa piensay

•  ¿Imaninkun juj casarasqakuna?

•  Kuska parlarinapaq

 Imaña esposaykimanta qosaykimanta mana gustasunkichu chaypas, ima allin ruwasqallanpas gustasunkipunichá. Chaypaq kinsa hermanokunaq willakusqanta yachasun:

 Chelsea nin: “Qosayqa maymanña apuraylla rinayku kashaqtinpas susigowanmi cambiakun, susigowanmi imatapas ruwan, chaywanmi mayninqa renegani. Ichaqa chhaynaña chaypas gustawanmi pacienciakuq kasqan, maytan noqawanpas pacienciakun. Chaymi qosaymantaqa gustawan”, nispa.

 Christopher nin: “Esposayqa tukuy imapas allin lloqsinantan munan, chaypaqmi imaymanata ruwan, chaymi mayninqa pacienciayta tukuwan. Ichaqa chhaynata ruwasqanraykun imapas allin lloqsin”, nispa.

 Danielle nin: “Qosayqa manan apuraychu ima ruwanatapas yanapawan, manapas imapas qokunmanchu jinan susigowan ruwan. Chaymi mayninqa renegani. Ichaqa chhayna pacienciayoq kasqanmi susigowan imatapas ruwasqanmi ñaupaqqa gustawarqan. Payqa imapiña tarikuqtiykupas manan apuraychu imatapas ruwanpacha, chaymi paymantaqa gustawan”, nispa.

 Chelseawan, Christopherwan, Daniellepiwan willakusqankuman jinaqa, qosanchispas esposanchispas imaynachus kasqanku renegachiwasunmanña chaypas chhayna kasqankuqa mayninqa allinmi. Manataq malchu ima ruwasqankupas kashan chayqa, manan chaykuna saqerunankutachu suyananchis.

 Ichaqa Bibliapin willashan imayna kaysi mana allinchu chayta. Wakinqa “k’araq phiñakuqmi” kanku (Proverbios 29:22). Pipas chhayna chayqa, saqepunanmi “tukuy ima sintipakuq kayta, phiñasqa kayta, k’araq phiñakuyta, qaparkachayta, mana respetowan millay rimayta, tukuy ima k’araq simikunatapas” (Efesios 4:31). a

 Ichaqa esposaykiq o qosaykiq ima ruwasqanpas manataq nishu gravechu chayqa, chaymantapas qanllamantaq chhayna kasqan mana gustasunkichu chayqa, pacienciakuy paywan. Bibliapas ninmi: “Qankunapura paciencianakuychis, perdonanakuychis razonwanña pipaqpas phiñasqa kashankichis chaypas”, nispa (Colosenses 3:13).

 Kunanqa yaqapaschá qosaykiq o esposaykiq ima ruwasqanwanpas phiñakunki, ichaqa yaqapaschá antesqa chhayna kasqanqa gustarqasunki. Piensay imakunapichus chhayna kasqan yanaparqasunkichis chaypi. Josephqa casadon, paymi nin: “Esposaykiq mana allin ruwasqallanpi piensayqa juj diamanteq puntachallanta qhaway jinan, llapanta qhawanki chayqa reparankin munay kasqanta”, nispa.

 Ñaupaqtaqa sapankaykichis kay tapuykunapi piensariychis, chaymantataq kuska parlariychis.

•   ¿Esposaykiq qosaykiq ima ruwasqanmi mana gustasunkichu, chay jawachu problemapi tarikunkichis? Chhayna chayqa, ¿mayqenmi chaykuna?

•   ¿Nishu mana allinchu chay ruwasqan, icha qanllapaqchu mana allin kashan?

•   Manaña chay ruwasqan gustasunkichu chaypas, ¿imallapipas chhayna kasqan yanaparqasunkichischu? Chhayna karqan chayqa, ¿iman karqan?