Juj runas pakallapi pornografía nisqata qhawashasqa, chaytas esposan yacharusqa. Payqa unaytas perdonta mañayukun, “manañan chayta qhawasaqchu” ninsi. Juj tiempoqa manas qhawanchu, chaymantaqa jujmantas chayman urmallantaq, jujmantas phiñachinakuy qallarillantaq.

 Qanpas yaqapaschá chhaynapi tarikushanki. Chhaynapichus tarikushanki chayqa, allintan entiendenayki imaynatas esposaykiq sonqonta k’irishanki chayta. Yachanaykin imaynatas chaytaqa jujpaqkama saqepuwaq chaytapas. a

Kaypin yachasunchis

•  Imakunan pasan chayta qhawaqtiyki chayta

•  Imatan ruwanayki chayta saqenaykipaq chayta

•  ¿Imatan ruwawaq qosayki chayta qhawaqtin?

 Pornografía nisqata qhawanki chayqa casado kausayniykitan chinkachiwaq. Parejaykin manaña qanpi confianmanchu, sonqo k’irisqataq tarikunman. b

 Mayqen qosapas pornografía nisqata qhawanqa chayqa yaqapaschá esposanqa tarikunqa:

•   Traicionasqa. Chaymanta rimaspan Sarah sutiyoq hermana nin: “Qosaypas sapa ratun traicionawashanman jinan tarikuq kani”, nispa.

•   Mana munasqa. Chaymanta rimapan juj señora willakurqan imaynas qosan pornografía nisqata qhawaqtin mana valeqpaq jina, mana munasqa jina qhawarikuq chayta.

•   Manan confianñachu. Chaymanta rimaspan Helen nin: “Manañan qosaypiqa confianichu”, nispa.

•   Sinchi llakisqa. Chaymanta rimaspan Catherine nin: “Qosaypa imachus ruwasqanta rikuspan sinchita llakikuq kani, sonqoyraqmi t’impuriq”, nispa.

 Kaypi piensay: Bibliaq nisqanman jinaqa qosaqa munakunanmi esposanta (Efesios 5:25). Ichaqa chay mana allinkunata qhawaspachus esposaykita ñak’arichishawaq chayqa, ¿munakushawaqchu payta?

 Manan facilchu pornografía nisqata saqeyqa, chaymanta rimaspan Stacey nin: “Qosayqa atillarqanmi cigarro saqeyta, marihuana saqeyta, machaytapas saqerqanmi. Pornografía nisqa qhawaytan ichaqa mana faciltachu saqeyta atishan”, nispa.

 Chhaynapi tarikushanki chayqa qatimuq yuyaychaykunan yanapasunki chay millay ruwaykuna qhawayta jujpaqkama saqepunaykipaq.

•   Allintan yachanayki imaynas pornografía qhawayqa mana allinchu chayta. Chay millay ruwaykunata qhawaq runakunaqa paykunallapin piensanku, aychankuq munaynillanpin piensanku, chhaynapin munakuyta chiriyachipunku, manataqmi allinchu kanku casado kausaypipas. Chaymantapas pipas chayta qhawaqqa casado kausayta paqarichiq Jehová Diostan mana respetashanchu.

   Bibliapin nin: “Casado kausaytaqa lliulla ancha allinpaq jap’ichunku”, nispa (Hebreos 13:4).

•   Manan jujkunatachu tumpanayki chaykuna qhawasqaykimantaqa. Manan ninaykichu: “Esposay aswan munakuq kanman chayqa manachá chaykunataqa qhawaymanchu”, nispaqa. Chay ruwasqaykimanta esposaykita tumpawaq chayqa manan allinchu kanman. Jujpi sintirachisunki chayqa yapamantan chay qhawayman jaykullankitaq.

   Bibliapin nin: “Sapankan pruebamanqa churakun imachus munasqanwan tentasqa kaspa sonqonta suwachikuspa”, nispa (Santiago 1:14)

•   Esposaykimanqa manan imatapas pakanaykichu. Kevin sutiyoq runan nin: “Sapa p’unchaymi esposayman willani imaynas chay p’unchay riwarqan chayta. Ima mana allinña rijuriwaran chaypas qhawallarqanichu icha juj ladotachu qhawapurqani chaykunatapas willanin. Chaykunata willaqtiyqa paypas manan imatapas pakashayman jinachu kan”, nispa.

   Bibliapin nin: “Tukuy imapitaqmi honrado kaytapas munayku”, nispa (Hebreos 13:18).

•   Makilla kashay. Unayña saqepurqanki chaykuna qhawayta chaypas makilla kashay, paqtapas qonqay jujmanta chayman urmawaq. Ñaupaqpi rimamusqanchis Kevinmi nillantaq: “Chunka watañan mana qhawarqanichu chay pornografiata, noqaqa ñachá atipaniña nisharqanin. Ichaqa chayllapin kashasqa, mijunanman phawaykuq león jinan noqapi puñushasqa”, nispa.

   Bibliapin nin: “Pipas “qaqatan sayashani” niqqa allinta cuidakuchun, paqtataq urmanman”, nispa (1 Corintios 10:12).

•   Tentasqa kashanki chayqa chayllapi sayay. Mayninqa jamusunkipunin mana allin piensaykunaqa, mana allin munaykunapas ichaqa qanmantan kanqa chaywan apachikunkichus icha aguantankichus chayqa. Aguantallanki chayqa sonqoykiq mana allin munasqanqa chinkaripullanqan, juj ruwaykunapi piensanki chayqa aswan ratullan chinkapunqa.

   Bibliapin nin: “Sapankaykichismi yachanaykichis cuerpoykichis kamachiyta, chhaynapi ch’uya kanaykichispaq allin qhawarisqa kanaykichispaqwan. Ama Diosta mana reqsiq waj nacionkunamanta runakuna jinaqa kaychischu, paykunaqa mana aguantakuspan sinchita warminayachikunku qharinayachikunku ima, manan chaykunawanqa amikunkupaschu”, nispa (1 Tesalonicenses 4:4, 5).

•   Karunchakuy chay mana allinkunaman apaq ruwaykunamanta. Querer no es poder nisqa libropin nin: “Ima sasamanpas jaykurushanki chayqa ninatapas jap’iykachiwaq jinan, gasolinawan jich’aykunallañan faltanqa llapanta ruphaykachinapaqqa”, nispa.

   Bibliapin nin: “Ama mana allinqa munaychakuwachunchu”, nispa (Salmos 119:133).

•   Allichakullanqan imapas. Unaypaschá pasanan kanqa esposayki qanpi jujmanta confiananpaqqa, askha wata imapaschá pasanan kanqa. Wakin casarasqakunaqa allichapurqankun chay problemankuta jinaspa jujmanta sumaqta kausapurqanku.

   Bibliapin nin: “Pipas munakuqqa pacienciakuqmi”, nispa (1 Corintios 13:4).