Manan pi runapas Diostaqa rikurqanchu (Éxodo 33:20; Juan 1:18; 1 Juan 4:12). Biblian nin: “Diosqa espiritun”, nispa. Runakunaqa manan espíritu kaqkunataqa rikuyta atinkumanchu (Juan 4:24; 1 Timoteo 1:17).

 Ichaqa angelkunaqa atinkun Diosta rikuyta, paykuna espíritu kasqankurayku (Mateo 18:10). Jinaspapas wakin runakunaqa wañupuspan janaq pachaman espíritu cuerpopi ripunku. Chhayna kaqtinqa, paykunapas atinkun Diosta rikuyta (Filipenses 3:20, 21; 1 Juan 3:2).

 Bibliaqa “rikuy” nispaqa nishan Diosmanta willakuyta entiendenamantan (Isaías 6:10; Jeremías 5:21; Juan 9:39-41). Chhaynapin iñiyniyoq runaqa Diosman “sonqonta kicharin”, imaynachus Dios kasqanta rikuspa, imayna sonqoyoqchus kasqantapas valoraspa; chaymi rijch’akun Diosta rikuywan (Efesios 1:18). Qanpas atiwaqmi chay jina iñiyniyoq kayta. Chaypaqmi ichaqa Bibliaq nisqanman jina ruwanayki:

•   Reparay kamasqankunata qhawarispa imayna Dios kasqanta. Payqa munakuq, qoykukuq, yachayniyoq atiyniyoq Diosmi (Romanos 1:20). Chaytan ruwarqan ñaupaq tiempopi junt’aq sonqo runa Jobpas. Payqa Diospa kamasqankunata qhawarispan anchata admirakurqan, chaymi kikin ñawinwanpas rikushanman jina sientekurqan (Job 42:5).

•   T’aqwiriy Bibliaq imatachus Diosmanta yachachisqanta. Biblia kikinmi niwanchis: “Sichus Diosta maskhanki chayqa tarinkin”, nispa (1 Crónicas 28:9; Salmos 119:2; Juan 17:3).

•   Reqsiy Jesusta astawan Diosta reqsinaykipaq. Kay pachapi kashaspan Jesusqa imaymana ruwasqanpi sut’ita rikuchirqan taytan imayna kasqanta. Chaymi payqa nirqan: “Pipas noqata rikuwaqqa janaq pacha Taytatapas rikullantaqmi”, nispa (Juan 14:9).

•   Kasukuy Diospa kamachikuyninkunata, reparaytaq imaynatachus pay bendecisunki chayta. Jesusmi nirqan: “Kusisqan kanku ch’uya sonqoyoqkunaqa, paykunan Diosta rikunqaku”, nispa. Chaymantapas qallariypi nisqanchis jina, wakin runakunaqa janaq pachapin kausarimpunqaku, jinan chaypi Diosta rikunqaku (Mateo 5:8; Salmos 11:7).

 Bibliapi wakin versiculokunapiqa yaqapaschá leesunman wakin runakuna Diosta rikunkumanpas karqan jinata. Ichaqa maypachachus llapan willakuyta leenchis chayqa, sut’itan yachanchis Diostachu mana rikusqankuta aswanpas Diospa rantinpi juj angelta rikusqankuta. Chaymantapas wakinqa juj rijuriypin Diosta rikurqanku. Chaykunamantan kunan astawan yachasun.

 Angelkuna.

Ñaupa tiempopiqa Diosqa angelkunatan kachamurqan runakunaman ima piensasqantapas willananpaq (Salmos 103:20). Yachanapaq, Bibliapin willashan Diosqa Moiseswan raurashaq sach’a ukhumanta rimasqanta. Bibliapin nin: “Moisesqa uyanta pakakurqan, payqa manchakurqanmi cheqaq Diosta rikuyta”, nispa (Éxodo 3:4, 6). Bibliapiqa manan ninchu Moisesqa Diospa uyantan rikurqan nispaqa, aswanpas nishanmi “Jehová Diospa angelnin Moisesman rijurirqan” nispa (Éxodo 3:2).

 Ichaqa Bibliapin nillantaq “Jehová Diosqa uya-uyapuran Moiseswan rimaq” nispa, chaywanqa nishan imaynan juj runa amigontin uya-uyapura rimanman chaytan (Éxodo 4:10, 11; 33:11). Ichaqa Moisesqa manan jayk’aqpas Jehová Diospa uyantaqa rikurqanchu. Chaymi Bibliaqa nillantaq: “Qankunamanmi Diosqa angelkunawan kamachikuy simita qorqasunkichis”, nispa (Gálatas 3:19; Hechos 7:53). Moisespa iñiyninqa jatunkaraymi karqan, chaymi “mana rikuna Diosta rikushanmanpas karqan jinan payqa tukuy imatapas pacienciawan aguantarqan” (Hebreos 11:27).

 Diosqa Abrahanwan rimananpaqpas angelnintan kachamurqan. Yaqapaschá Génesis 18 capitulopi nisqanqa entiendekunman Abrahán Jehová Diosta rikunmanpunipas karqan jinata (Génesis 18:1, 33). Ichaqa manan chhaynachu karqan. Bibliapin nishan Abrahanman “kinsa runakuna” visitasqankuta, chay kinsa runakunaqa angelkunan karqanku. Abrahanqa yacharqanmi chay runakunaqa Diospa kachamusqan angelkuna kasqanta, chaymi payqa Jehová Dioswanpas uya-uyapura parlashanman jinata qhawarirqan (Génesis 18:2, 3, 22, 32; 19:1).

 Rijuriykuna.

Mayninpin Diosqa runakunaq ñawinpi rijurirqan otaq mosqoyninkupi rijurirqan. Yachanapaq, Bibliapin nishan Moiseswan juj israelitakunapiwan “Israelpa Diosninta rikurqanku” nispa, chaywanqa nishan “mosqoypi jina Diosta rikusqankutan” (Éxodo 24:9-11). Juj versiculokunapipas rijurillantaqmi “Jehová Diosta rikurqani alto patapi tiyashaqta” nispa profetakunaq nisqanku (Isaías 6:1; Daniel 7:9; Amós 9:1). Bibliapi tukuy chaykuna nisqanqa juj rijuriypi rikusqankumantan willashan, manan Diosta rikusqankumantachu (Isaías 1:1; Daniel 7:2; Amós 1:1).