Juchaqa Diospa kamachikuyninkuna contra imatapas munapayasqanchis ruwasqanchis otaq piensasqanchismi (1 Juan 3:4; 5:17). Bibliaq nisqanman jinaqa juchallikuyqa mana allinkunata ruwaymi otaq mana chaninta imatapas ruway (Santiago 4:17).

 Bibliapi hebreo otaq griego rimaykunapi “jucha” simitaqa entiendekun, imaynan juj runa flechata flechaspa juj ladoman flechanman chay jinan kasqanta. Ejemplopaq, Bibliapi willashan ñaupa tiempopi Israel llaqtamanta allinta wark’ayta yachaq soldadokunamanta, paykunaqa wark’aspaqa “mana jayk’aq pantaqmi karqanku”. Juj simipiqa nikullanmantaqmi: “Manan juchallikurqankuchu”, nispa (Jueces 20:16, Nueva Biblia Española). Chhaynaqa, juchaqa Jehová Diospa kamachikuyninkunata mana junt’aspa juj ladoman pantaymi.

 Jehová Diosqa kamaqninchiskasqanraykun derechoyoq kamachikuykunata qowananchispaq (Apocalipsis 4:11). Noqanchistaq sapankanchis imachus ruwasqanchismanta Diosman cuentata qonanchis (Romanos 14:12).

¿Atisunmanchu mana juchallikuspa kausayta?

 Manan, Biblian nin: “Llapa runakunan juchallikuq kanku, chaymi mana atinkumanchu Dios jina ch’uya kaytaqa”, nispa (Romanos 3:23; 1 Reyes 8:46; Eclesiastés 7:20; 1 Juan 1:8). ¿Imaraykun llapa runakuna juchallikuq kanchis?

 Qallariypiqa Adanwan Evawanqa ch’uyan karqanku mana juchallikuq, Diosman rijch’akuqmi karqanku ch’uya (Génesis 1:27). Ichaqa kamaqninchis Jehová Diostan mana kasukurqankuchu jinaspan juchayoq kapurqanku (Génesis 3:5, 6, 17-19). Chay juchatataq juj onqoyta jina wawankunaman contagiapurqanku (Romanos 5:12). Rey Davidmi nirqan: “Juchallantinña nacerqani”, nispa (Salmos 51:5, Diospa Simin Qelqa). a

¿Kanchu sinchi millay juchakuna?

 Ari kanmi, ejemplopaq Bibliapin willashan ñaupa tiempopi Sodoma llaqtamanta runakuna “millay [...] sinchi juchasapakuna” kasqankumanta, chaymantapas juchankupas “sinchi millaypuniña” kasqanmanta (Génesis 13:13; 18:20). Kaypi qhawarisunchis kinsa t’aqapi juchakunata.

1.   Sinchi millay juchakuna. Bibliaq nisqanman jina sinchi millay juchakunaqa kaykunan: qhelli juchapi puriy, santokunata adoray, suwakuy, machay, engañaspa suwakuy, runa wañuchiy, layqa ruwaykuna ima chaykunataqa manapunin ruwananchischu (1 Corintios 6:9-11; Apocalipsis 21:8). Bibliaqa rimallantaqmi mana yuyaypi juchallikuymanta juj juchakunamanta ima, ejemplopaq, mana allinta rimaspa jujkunata k’iriy (Proverbios 12:18; Efesios 4:31, 32). Bibliaqa kallpachawanchismi ima juchatapas amapuni pisipaq jina qhawarinanchispaq, mana jinaqa sinchi millay juchakunamanmi urmasunman (Mateo 5:27, 28).

2.   Yuyaypi juchallikuykuna. Wakin runakunaqa Diospa kamachikuyninkunata mana yachasqankuraykun juchallikunku (Hechos 17:30; 1 Timoteo 1:13). Diospa kamachikuyninkunata mana yachaspa juchallikuyqa manan kaqllachu, yuyaypi Diospa kamachikuyninkunata mana kasukuspa juchallikuywanqa. Ichaqa chaywanpas Bibliaqa manan pisipaqchu ima juchatapas qhawarichin (Números 15:30, 31). Bibliapin yuyaypi juchallikuq runamanta nin: “Millay rumi sonqo”, nispa (Jeremías 16:12).

3.   Sapa kuti juchallikuy. Bibliaqa sut’itan willan juj kutilla juchallikuywan sapa kutilla juchallikuywan mana kaqllachu kasqanta (1 Juan 3:4-8). Jehová Diosqa chinkachinqan yuyaypi, allinta yachashaspa sapakutilla juchallikuqkunataqa (Hebreos 10:26, 27).

 Sinchi millay juchakunata ruwaqkunaqa yaqapaschá sinchi llakisqa tarikunkuman. Ejemploplaq rey Davidmi qelqarqan: “Juchallikusqaykunaqa wasapawanñan, llasa q’epi jinan ñit’iykuwan”, nispa (Salmos 38:4). Ichaqa Bibliapin sumaq suyakuymanta willashan, ninmi: “Mana chanin runaqa ñanninta saqepuchun, millay runapas yuyaykusqankunata wikch’upuchun, Señor Diosmantaq kutirikapuchun, paymi payta khuyapayanqa, Diosninchisman kutirikapuchun, payqa pampachaykuytapunin munashan”, nispa (Isaías 55:7).