Jesuspa vidanmanta estudiaq runakunaqa allintan yachanku payqa cheqaqpuni kasqanta. Jesusmanta jinallataq cristianokunamantapas askha qelqakunan willaran apostolkunaq tiemponpi, chay qhepamanpas. Chaymi juj importante libro chaykunamanta willaspa niran: “Chay ñaupa librokunapipas Jesusmanta willakushan chayqa, manan nisunmanchu “Jesusqa cuentollan karan” nispaqa. Manan ni cristianokunaq contranpi kaqkunapas iskayaqkuchu Jesús cheqaq kasqanmantaqa. 1800 watapi jinan chayraq wakin runakuna pantasqata piensaspa iskayayta qallariranku, chhaynan karan askha watakuna. 1900 wata pasaytapas askha wataraqmi wakin runakunaqa iskayaranku Jesús cheqaq kasqanmanta”, nispa (Encyclopædia Britannica, edición de 2002).

 2006 watapin Jesús y la arqueología nisqa libropi nillarantaq: “Kunan tiempopiqa manan mayqen allin estudiaqpas ninmanchu ‘manan Jesusqa karanchu’ nispaqa, paykunaq nisqanman jinaqa kunanqa askhatas yachakun Jesuspa imakuna ruwasqanmanta, imakuna yachachisqanmantapas”, nispa.

 Jesusmanta Bibliaq willasqanqa cheqaqmi. Bibliapin willashan pikunas ñaupa tayta-mamankuna karan chaymanta, pikunas familian karan chaymantapas (Mateo 1:1; 13:55). Willashanmi Jesuspa tiemponpi kausaq gobernantekunamantapas (Lucas 3:1, 2). Llapa chaykunata estudiaspan chay runakunaqa allinta yachanku Jesusmanta willakuyqa cheqaq kasqanta.