Jesusqa ‘Diospa Churin kasqanta’ (Juan 1:49). Diospa churin nisqanwanmi yachanchis Jehová Dios tukuyta kamasqanta Jesustapas kamasqanta (Salmos 36:9; Apocalipsis 4:11). Bibliaqa willanmi Jehová Diosqa taytanchis kasqanta, ichaqa manan runakuna jinachu wawayoq kaqtinku

 Bibliaqa nillantaqmi angelkunapas Diospa wawankuna kasqankuta (Job 1:6). Yachachillantaqmi ‘Adanpas Diospa wawan’ kasqanta (Lucas 3:38). Bibliapin willallantaq Jehová Diospaqqa Jesús ancha munakusqan wawan kasqanta ¿imarayku? Pay kikinpuni kamasqanrayku.

•  ¿Janaq pachapichu Jesús kausaran manaraq kay allpaman jamushaspa?

•  ¿Imatan Jesús janaq pachapi ruwaran manaraq kay allpaman jamushaspa?

 Arí. Jesús manaraq runa jina kay allpapi naceshaspaqa janaq pachapin espíritu cuerpopi kausaran. Paypunin niran: “Janaq pachamanta uraykamurani”, nispa (Juan 6:38; 8:23).

 Jehová Diosmi Jesustaqa ñaupaqta kamaran. Jesusmantan Biblia nin:

•   “Paymi ñaupaqta kamasqa karan” (Colosenses 1:15).

•   Jesustan “ñaupaqta Dios kamaran” (Apocalipsis 3:14).

 Biblian willaranñan Mesías ñaupaqmanta kausasqanta, chay profecian Jesuspi junt’akuran (Miqueas 5:2; Mateo 2:4-6).

 Janaq pachapiqa sumaq llank’ayniyoqmi karan. Jesusqa chay llank’aynimanta niran: “Yayáy, ladoykipi kachispa jatunchaway, manaraq kay pachapi runakuna kashaqtin jatunchasqa kasqay jatunchaywan”, nispa (Juan 17:5).

 Jesusqa Papantan yanaparan tukuy imaymana kamaypi. Jesusqa taytanwan kuskan ‘llank’aranku’ (Proverbios 8:30). Jesusmanta, Biblia nin: “Paywanmi janaq pachapi tukuy ima kaqkuna, kay pachapi tukuy ima kaqkunapas kamasqa karan”, nispa (Colosenses 1:16).

 Diosqa Jesuswan kuskan tukuy imatapas kamaran angelkunata cielopi kaqkunata kay pachapi kaqkunatapas (Apocalipsis 5:11). Dioswan Jesuswan kuska tukuyta kamasqankuqa comparakun imaynatachus juj arquitectowan wasita ruwaq runawan llank’asqankumanmi. Arquitectoqa imaynatachus wasita ruwakunanpaqmi qhawarin, wasita ruwaq runataq arquitectoq kamachisqanman jina ruwan.

 Jesustaqa simi nispan nikullantaq. Jesustan manaraq kay allpaman jamushaqtin nikullarantaq ‘simi’, nispa (Juan 1:1). Jehová Diosqa Jesuswanmi angelninkunaman willachiran kamachikuyninkunata imachus ruwanankutapas.

 Runakunawan rimananpaqpas Jesuswanmi willachiran kamachikuyninkunata, yaqapaschá Jehová Diosqa Adanmanpas Evamanpas Jesuswan willachiran kamachikuyninkunata Edén huertapi kashaqtinku (Génesis 2:16, 17). Israelitakunata ch’aki pampanta pusaq angelqa yaqapaschá Jesús kallarantaq, jinaspa paypa nisqanta kasukunanku karan (Éxodo 23:20-23). a