Chay manchay ñak’ariy tiempoqa sinchi manchakuymi kanqa, llapa runakunan mana jayk’aq ñak’arisqankuta ñak’arinqaku. Bibliaq willasqanman jinaqa chaykunaqa pasanqa “tukukuy p’unchaykunapin”, chaytan nikullantaq “tukukuy tiempo” nispa (2 Timoteo 3:1; Daniel 12:4). Chay tiempomanta rimaspan Marcos 13:19 textopi nin: “Chay p’unchaykunaqa ñak’ariy p’unchaykunan kanqa, chhayna ñak’ariyqa manan karqanchu kay pacha runakunata Dios kamasqanmantapacha ni kunankamapas, nitaq qhepamanpas kanqachu”, nispa (Daniel 12:1; Mateo 24:21, 22).

¿Imakunan pasanqa chay manchay ñak’ariy tiempopi?

•   Falso religionkunan ch’usaqman tukuchisqa kanqa. Llapa pantasqa religionkunan falso religionkunan juj ratullapi ch’usaqman tukuchisqa kanqa (Apocalipsis 17:1, 5; 18:9, 10, 21). Llapa gobiernokunan Naciones Unidas nisqawan chayta ruwanqaku, paykunaqa Diospa munayninman jinan chayta ruwanqaku (Apocalipsis 17:3, 15-18). a

•   Cheqaq religionmanmi phawaykunqaku. Askha nacionkunan cheqaq religionman phawaykunqaku, ch’usaqmanmi tukuchiyta munanqaku. Chay nacionkunatan Ezequiel libropi sutichakun “Magogmanta kaq Gog”, nispa. Ichaqa Diosmi chay ruwanankuta jark’anqa, manan munanqachu llaqtanta chinkachinankuta (Ezequiel 38:1, 2, 9-12, 18-23).

•   Kay pachapi llapa tiyaqkunan juzgasqa kanqaku. Jesusmi lliuta juzganqa, llapa “runakunatan t’aqanqa, imaynan michiqpas ovejakunata cabrakunamanta t’aqan jinata” (Mateo 25:31-33). Payqa sentenciataqa orqomunqa “wayqenkunata” apoyarqankuchus icha manachus chayman jinan. Chay wayqenkunaqa kanku pikunachus paywan kuska janaq pachapi gobiernanqaku chay runakunan (Mateo 25:34-46).

•   Jesuswan kuska gobiernamuqkunan juñusqa kanqaku. Janaq pachaman rinankupaq ajllasqa iñiqkunan samapunqaku, jinaspa espíritu cuerpopi kausarichisqa kanqaku Jesuswan kuska gobiernamunankupaq (Mateo 24:31; 1 Corintios 15:50-53; 1 Tesalonicenses 4:15-17).

•   Armagedón guerran aparikunqa. Bibliapiqa chay Armagedón guerrataqa “tukuy atiyniyoq Diospa jatun p’unchaynin guerra” nillantaqmi, chaymantapas “Jehová Diospa p’unchaynin” nillantaqmi (Apocalipsis 16:14, 16; Isaías 13:9; 2 Pedro 3:12). Chay guerrapin ch’usaqman tukuchisqa kanqaku pikunatachá Cristo sentenciarqan paykuna (Sofonías 1:18; 2 Tesalonicenses 1:6-10). Kay pachapi llapa politicapas ch’usaqmanmi tukuchisqa kanqa, chaytan Biblia tupanachin qanchis umayoq manchay phiña animalwan (Revelación 19:19-21). Qhaway“¿Qué representa la bestia de siete cabezas del capítulo 13 de Apocalipsis?” nisqata.

¿Iman pasanqa chay manchay ñak’ariy qhepata?

•   Satanaswan supaykunawan iman wisq’asqa kanqaku. Juj ancha atiyniyoq angelmi paykunata “chinkay-chinkay ukhuman” wijch’uykunqa (Apocalipsis 20:1-3). ¿Ima ninantaq chayri? Paykunaqa wañusqapas kashankuman jinan kanqaku. Chaymantapas chayqa juj carcelwanmi tupanachikullanmantaq. Chhaynataq kanqa chayqa Satanasqa manañan pitapas engañanqachu (Apocalipsis 20:7).

•   Waranqa wata kamachikuymi qallarinqa. Chaymantapachaqa Diospa gobiernonpi kamachikuqmi waranqa watapaq kamachikuyta qallarinqa, chaypiqa imaymana munay bendicionkunatan runakunaqa chaskinqaku (Apocalipsis 5:9, 10; 20:4, 6). Kay pachapiqa manchay ñak’ariyta kausashaqlla pasamuq “mana piqpa yupay atinan ancha askha runakunan” kashanqaku, paykunaq rikushasqanmi waranqa wata kamachikuyqa qallarinqa (Apocalipsis 7:9, 14; Salmos 37:9-11).