Diospa gobiernonqa manan cristianokunaq sonqonpichu kashan. a Bibliaqa sut’itan willashan Diospa gobiernon maypis kashan chayta, ninmi: “Janaq pacha gobierno”, nispa (Mateo 4:17). Chaymantapas Bibliaqa willanmi Diospa cheqaq gobiernon janaq pachamanta kamachikamushasqanta. Chayta kaypi astawan yachasunchis.

•   Diospa gobiernonpiqa kanmi kamachikuqkuna, runakuna, leykunapas. Chaymantapas Diosqa gobiernonwanmi munayninta janaq pachapipas kay pachapipas ruwachinqa (Mateo 6:10; Apocalipsis 5:10).

•   Diospa gobiernonqa kay pachapi kaq “llapa llaqtakunata, jatun suyukunata, imayna rimaytaña rimaqkunatan” kamachinqa (Daniel 7:13, 14, Diospa Simin Qelqa). Diospa gobiernonpi kamachikuqtaqa manan runakunachu ajllan, aswanpas Diosmi ajllarqan jinaspa churarqan kamachikuq kananpaq, autoridadtapas qorqan kay jallp’api tiyaq llapa runakunata kamachinanpaq (Salmos 2:4-6; Isaías 9:7).

•   Hinaspapas Jesusmi nirqan junt’aq sonqo apostolninkunata paywan janaq pacha gobiernopi kanankupaq. ¿Imapaqmi paykuna rinanku karqan? Jesusmi nillarqantaq: “Tronokunapi tiyanaykichispaq”, nispa. Chaywanmi nisharqan paywan kuska kamachikamunankupaq (Lucas 22:28, 30).

•   Chaymantapas Diospa gobiernonqa Dios contra kaq runakunantan chinkachipunqa (Salmos 2:1, 2, 8, 9; 110:1, 2; 1 Corintios 15:25, 26).

 Chhaynaqa qhawarimusqanchis jina Diospa gobiernonqa manan runakunaq sonqonpichu kashan nitaq sonqonchispichu apanchis. Aswanpas Bibliaqa yachachishan “Diospa gobiernonmanta allin willakuykunata” yachaspa sonqonchispi mana allin kaqkunata cambiananchismantan (Mateo 13:19; 24:14).

¿Imaraykun Jesús nirqan: “Diospa gobiernonqa qankuna chaupipin kashan”, nispa?

 Wakin Bibliakunapin Lucas 17:21 textopi khaynata nin: “Diospa gobiernonqa qankuna ukhupin kashan”, nispa (Biblia Americana San Jerónimo). Chaymi wakin runakunaqa ninku: “Diospa gobiernonqa sonqonchispin kashan”, nispa. Kay versiculota allinta entiendenapaqqa ñaupaqtan yachananchis Jesús imaraykus, pikunamansi nisharqan chayta.

 Chay kutipiqa fariseokunamanmi chaytaqa nisharqan, paykunaqa religionpi umalliqkunan karqanku, Jesustaqa cheqnikurqankun, wañuchiyta iman munarqankupas (Mateo 12:14; Lucas 17:20). Chhaynaqa Jesús nisharqanchu, ¿chay millay runakunaq sonqonpin Diospa gobiernonqa kashan nispa? Manan. Aswanpas paykunatan nirqan: “Sonqoykichistaq ichaqa junt’a kashan iskay uya kaywan mana allin ruwaykunapiwan”, nispa (Mateo 23:27, 28).

 Juj Bibliakunapin Lucas 17:21 textota aswan sut’ita entiendechin. El Nuevo Testamento original nisqa Bibliapin nin: “Diospa gobiernonqa ladoykichispiña kashan”, nispa. Traducción del Nuevo Mundo de las Santas Escrituras (con referencias) nisqa Bibliapitaq nin: “Diospa gobiernonqa qankuna chaupipin kashan”, nispa. Chhaynaqa, ¿imaynapin Janaq pacha gobierno fariseokunaq ladonpi kasharqan? Chay kutipiqa Jesusqa paykunawanmi kasharqan, jinaspapas Diosqa ajllarqanña Jesusta gobiernonpi kamachikunanpaq (Lucas 1:32, 33).