Pachantinpi askha runakunan jw.org direccionwan yanapachikushanku. Askha runakunan agradecekusqankuta qelqarqanku Jehová Diospa testigonkunaq principal oficinanman, qatiqninpin kashan mayo 2014 watakama chay agradecimientota apachisqanku.

“Wawayqa wawakuna uywana wasimantan kutimuq compañeronkunaq lapizninta, pukllananta, lentesninta ima apariykukuspa. Askha kutipin nirqayku: ‘Chay ruwasqaykiqa suwakuymi, chayqa manan allinchu’, nispa; chaywanpas kaqllatan ruwasharqan. Huk kutinmi jw.org nisqamanta horqorqayku ‘Suwakuyqa manan allinchu’ nisqa videota. Chayqa wawaypaq hinapunin kasqa. Chayta qhawasqan qhepamanmi wawayqa nirqan ‘kutichipusaq llapa apamusqaykunata’ nispa. Chayraqmi entienderqan suwakuyta Dios huchachasqanta. ¡Anchatan yanapawarqanku internetpi chay direccionqa!” (D. N., África)

“Wawaykunaqa anchatan munanku jw.org nisqaman haykuyta. Chaymantan horqonku videokunata, chaykunan yanapan honrado kaymanta Bibliaq yachachisqanta kasukunankupaq. Huk yachachikuykunapas kashanmi, chaykunan yanapanqa hatunña kaqtinku allin runa kanankupaq” (O. W., las Antillas)

“Sinchitan qellakuq kani estudiayta, escuelamanta lloqsipuytaraqmi munarqanipas. Ichaqa huk kutinmi jw.org nisqapi leerqani ‘¿Lloqsipunaychu escuelamanta?’ nisqa yachachikuyta. Chaypin yacharqani escuelaman riy allin kasqanta, kurakña kaqtiy allin kanaypaq yanapawanantapas” (N. F., África)

“Escuelapi allinta comportakunaypaqmi yanapawarqan jw.org nisqapi wayna-sipaskunapaq consejokuna. Yanapawarqanmi mana distraekuspa estudianaypaq” (G., África)

“Llank’aqmasiymi willawarqan ‘wawaytan nishutapuni escuelanpi molestanku, astawanqa huk compañeranmi’ nispa. Wawanqa escuelanman riytapas manchakapusqaraqsi, huk kutinsi askha p’unchaykuna mana ripusqachu. Hinan willarqani jw.org nisqapi ‘¿Imaynatan mana maqanakuspalla defendekuwaq?’ nisqa videomanta, chayqa kashan ‘Dibujokunawan yachanapaq’ nisqa seccionpin. Pipas molestawaqtinchisqa asi-asirikuqmi kananchis, chaytan chaypi willashan. Chaytan payqa wawanman willasqa, wawanqa manañas manchasqañachu escuelaman ripusqa. Compañerankunapas manañas molestapusqakuñachu, amigan imaraqsi kapusqakupas” (V. K., Europa oriental)

“Anchatan agradecekuykichis jw.org nisqapi ‘Imaraykun k’irikuyta munani’ nisqa yachachikuymanta. Askha watakunañan k’irikuq kani. ‘Ñoqallachá chhaynaqa kani, willakuqtiyqa manachá pipas entiendewanmanchu’ nispan niq kani. Chaypin willarqan hukkunapas k’irikuq kasqankuta, chaymi anchata yanapawarqan. Thak sientekuspaymi nirqani ‘kunanqa yachanin entiendewasqankuta’ nispa” (Australia nacionmanta huk sipas)

“Wayna-sipaskunaqqa kanmi imaymana problemanku, chaykunapaq yanapaykunatan tarini jw.org nisqapi. Chaypin yacharqani ‘¿Imatan ruwawaq millaykunata rimaqtinku?’ nisqa temamanta, ñoqataqa askha kutipin molestawarqanku warmi-qhari puñuymanta millaykunata rimaspa, chaypin yacharqani mana molestawanankupaq ima ruwanayta” (T. W., las Antillas)

“Huk wayna wawayqa manan thak kayta atinchu. Payqa huk raton huk hina kashan huk ratotaq huk hina; manan yachanichu huk ratoman imayna kananta. Chaymi paywan rimayqa sasa. Huk kutinmi haykurqani jw.org nisqapi ‘Casarasqakunapaq tayta-mamakunapaqwan’ nisqaman, chaypi yachachikuykunaqa necesitasqaypaq hinapunin karqan, yacharqanin wawaywan imayna rimayta. Paytapas chay direccionman haykuyqa yanaparqanmi; kunanqa willawanmi llakikuyninkunata, allinkuna pasasqantapas” (C. B., África)

“Wawaykuta munayta yachachinaykupaqmi jw.org nisqaqa yanapawanku. ‘Dibujokunawan yachanapaq’ nisqapin kan ‘¿Imaynan kanku allin amigokuna?’ nisqa, chay videon wawaykunata yanaparqan allin amigokuna imayna kasqankumanta yachanankupaq, allin amigokunayoq kayta yachanankupaqpas. Mayninpiqa wawaykuna necesitashasqanku ratopin chaypaq hina yanapaykuna lloqsimun. Chaypiqa askha yanapaykunan kan” (E. L., Europa)

“Soqta watañan casarasqa kashayku. Sapankapas hukniraymi kanchis, hukniraytan piensanchis, hukniraytan rimanakunchispas, casarasqakunaqa chaymanmi yachanakunanku. Chayraykun jw.org nisqapi ‘Uyariyta yachay’ nisqa temata rikuspay leeytapuni munarqani. Chaypin yachachishan uyariq kayta. Llapantan leerqani chaymantataqmi esposaytapas nirqani leenanpaq. Chaypi nisqanman hina kawsanaykupaqmi kallpachakushayku” (B. B., las Antillas)

“Huk wata hinañan Jehová Diospa testigonkunata reqsishani, gracias niykichismi jw.org nisqamanta. Imaymanatan yachashani, yachashanin allin tayta kayta, allin qosa kayta..., kunanqa manañan millay caracterniyoqñachu kapushani. Chay direccionpi yachachikuykunan yanapawarqan esposaywan mana t’aqanakunaypaq” (L. G., las Antillas)

“Gracias niykichismi jw.org nisqamanta, chayraqpas kawsarirqoyman hinaraqmi sientekushani. Makiwan rimay americano nisqa videokunan yanapawarqan aswan allinta makiywan rimanaypaq. Ñawpaqpiqa manan kallpachakuqchu kani ima ruwanaypaqpas, kunanmi ichaqa imakuna ruway atisqaypi piensani, chaypaqmi yanapawarqan ‘Kunanqa rimasqay simipin Bibliata rikuni’ nisqa video” (J. N., África)

“jw.org nisqapi yachachikuykunaqa qorimantapas aswan valorniyoqraqmi. Ñoqaqa mana uyariq wayna-sipaskunatan yanapashani. Makiwan rimay simipi askha yachachikuykuna kasqanmi yanapawan aswan allinta makiywan rimanaypaq. Hinaspapas chaypi kaq yachachikuykunawanmi hukkunata yanapani amigonkuwanpas familiankuwanpas aswan allinta kawsanankupaq” (K. J., las Antillas)

“Ñoqaqa ñawsan kani, ñoqataqa anchatan yanapawashan jw.org nisqa. Mana chay dirección kaqtinqa hayk’a killakunapiraqchá chayamuwanman qelqakunaqa. Chaypi yachachikuykunan yanapawarqan familiaywan aswan allinta kawsanaypaq; kunanqa aswan valorniyoqpaqmi qhawarikuni. Hinaspapas mana ñawsa amigoykuna hinan ñoqapas tiempollanpi qelqakunata chaskini” (C. A., Sudamérica)

“Wakinqa manan leeyta yachankuchu braille nisqata, wakintaqmi ichaqa mana aypankuchu braille nisqapi qelqakunata rantikunankupaq, paykunatan anchata yanapan jw.org nisqa. Chaypiqa askha grabasqa yachachikuykunan kashan, chaykunan ñawsakunata yanapan hukkuna hina imaymanata yachanankupaq. Chay direccionqa imaymana clase runakunapaqmi, manan pitapas marginanchu. Chaykunan yanapawanku ñawsakuna valorasqa sientekunaykupaq” (R. D., África)

“Wakin religionkunaq internetpi direccionninkupiqa sasa entiendena palabrakunan tarikun, religiosokunaq entiendenanpaq hina palabrakuna, jw.org nisqapi yachachikuykunan ichaqa facil-llata entiendenapaq. Chaypiqa manan filosofía nisqa yachachikuykunamantachu riman. Huk religionkunapiqa sasatan yachachinku imachus iñiy kasqanta, sasa tariyta hinan qhawarichinkupas; jw.org nisqapin ichaqa mana chhaynachu” (A. G., Asia)

“Mana imayoq hinan qhawarikurqani jw.org nisqamanta manaraq yachashaspaqa. runakunaqa laqhayaqpi hinan kashanku Diosmanta cheqaqta mana yachasqankurayku, ichaqa huk focotapas hap’ichishayman hinan sientekuni chay direccionman sapa haykuspay. Chaypin leeni otaq uyarini Biblia imatachus yachachisqanmanta, chaypin tarini tapukuyniykunaq kutichiyninta” (J. C., las Antillas)

“Ñoqaqa Sudamérica selvapin tiyani, internetpi Bibliamanta yachachisqaykichismantan anchata agradecekuykichis, mana chaywanqa chinkasqa hinachá kashayman” (M. F., Sudamérica)