¿Imaraykun Testigokuna mana kutipakunkuchu runakuna imamantapas tumpaqtin?

QALLARIY

Bibliata kasukuspankun Testigokunaqa mana runaq llapa rimasqankumanchu kutichinku. Bibliapin nin: “Millay runata phiñariqqa pisichasqan rikukunqa”, nispa (Proverbios 9:7, 8; 26:4). Chaymi piwanpas discutishanaykumantaqa Diospa munaynin ruwayman yuyayta churayku (Salmos 119:69).

Ichaqa Bibliaq nisqan jina “kanmi upallakuna tiempo, rimana tiempopas” (Eclesiastés 3:7). Chaymi noqaykuqa normalta rimayku Diosmanta yachay munaq runakunawanqa. Ichaqa manan munaykuchu piwanpas yanqa discutiytaqa. Aswanmi munayku Jesús jina kayta, ñaupa cristianokuna jina kayta ima.

Jesusqa Pilatoq ñaupanpi imaymanamanta tumpashaqtinkupas manan ima nispapas niranchu (Mateo 27:11-14; 1 Pedro 2:21-23). “Rajrapun, machaqmi” nishaqtinkupas manan payqa kutipakuranchu. Aswanmi payqa “runaqa imatapas allinta ruwasqanwanmi rikuchinqa yachayniyoq kasqanta”, nispa nisqanman jina imatapas ruwaran (Mateo 11:19). Mayninpin ichaqa mana manchakuspa k’amiqnin runakunawan rimaq (Mateo 15:1-3; Marcos 3:22-30).

Discipulonkunatapas: “Kusisqa kaychis noqarayku runakuna k’amisuqtiykichis, qatikachasuqtiykichis, llullakuspa tukuy mana allin kaqta contraykichispi rimaqtinkupas”, nispan kallpacharan (Mateo 5:11, 12). Chaymantapas Jesuspa nisqan jina pipas yanqamanta tumpawasqankun yanapawallankutaq Diosmanta jujkunaman yachachinaykupaq. Chaykunapi tarikuqtiykun Jesusqa promesanta junt’an, paymi niran: “Noqan yachayta qosaykichis, yanapasaykichistaqmi imaynatachus rimanaykichispaqpas, chhaynapin contraykichispi kaqkunaqa mana ima niytapas atisunkichischu”, nispa (Lucas 21:12-15).
Apóstol Pablon llapa cristianokunata kallpacharan ama piwanpas discutinankupaq. Paypa nisqan jina “chaykunaqa yanqa ruwaykunan, manataqmi imapaqpas valenchu” (Tito 3:9; Romanos 16:17, 18).
Apóstol Pedron kallpacharan piwanpas rimaspaqa allin yuyaywan rimanapaq (1 Pedro 3:15). Paypa nisqan jina mayninpiqa allinta kausaymi masta valen imapas rimasqamantaqa. Paymi niran: “Diosqa munan allin kausasqaykichiswan mana yuyayniyoq runakunaq yanqa thautisqankuta ch’inyachinaykichistan”, nispa (1 Pedro 2:12-15).