Noqaykuq yachasqaykuman jinaqa Diosqa manan munanchu pipas fiestakunanta, chaymi mana fiestakuykuchu. Manaña Bibliapi ninchu: “Aman fiestakunkichischu” nispa chaypas, willanmi imaynatas Dios chaykunata qhawarin chayta. Chaymi kunan tawa yachachikuyta yachasun.

1.   Falso religionkunan fiestakuqku. Juj libroq nisqan jina, ñaupa tiempo runakunaq piensasqanman jinaqa, runakunaq fiestanku p’unchaypis “mana allin espiritukuna jamuq chay fiestapi kaqkunata mana allinta ruwaq”, chaysi “runakunaqa fiestayoqta compañaqku allin p’unchaytapas qoqku chhaynapi chay espiritukunamanta cuidasqa kanankupaq”. Chaymantapas waj libroq nisqan jina, ñaupa tiempopiqa naceqkunamantas juj listata ruwaqku chhaynapi “chaypa yanapayninwan horóscopo nisqata ruwanankupaq”, chaytaqa “ruwaqku layqa ruwaykunaman jinas”. Chay libropin nillantaq: “Lliu runakunaq piensasqanman jinaqa velakunaqa fiestayoq runa imatapas mañakusqanta qonanpaqsi kashan”, nispa.

    Bibliapin ichaqa prohibisqa kashan ima layqa ruwaypas, suerte qhawaypas chaykuna jina ima ruwaykunapas (Deuteronomio 18:14; Gálatas 5:19-21). Chaykunata ruwasqankurayku iman Jehová Diosqa ñaupa Babilonia llaqtatapas castigaran (Isaías 47:11-15). Noqaykuqa manan chay fiestakuna o costumbrekuna imaynachus paqarimusqanpichu mastaqa piensayku, ichaqa manapunin jinataqa qhawaykumanchu layqa ruwaykunamanta Bibliaq imachus nisqantaqa.

2.   Ñaupa cristianokunaqa manan fiestakurankuchu. Juj libroq nisqan jina, ñaupa cristianokunaqa “falso religionpa costumbrenta jina, mana allin ruwayta jinan fiestakuytaqa rikuqku”. Chaymantapas Bibliaq willasqanman jinaqa Jesuspa yachachisqanman jinan apostolkunaqa imatapas ruwaranku, chaymi kunan tiempo cristianokunapas paykunaq ruwasqanta jina imatapas ruwananchis (2 Tesalonicenses 3:6).

3.   Cristianokunapas kamachisqan karanku juj fiestata ruwanankupaq, ichaqa manan piqpa nacesqan fiestata ruwanankupaqchu aswanpas Jesuspa wañusqanta yuyarinankupaqmi (Lucas 22:17-20). Chaymantapas Bibliapipunin nin: “Aswan allinmi wañukapuy p’unchay nacemuy p’unchaymantaqa” nispa (Eclesiastés 7:1). Jesusqa wañupunan p’unchaykaman tukuy sonqowan Diosta serviran, chaymi Diosqa allinta paytaqa qhawariran, chayraykun Jesuspa nacenan p’unchayta yuyarinamantaqa wañusqan p’unchayta yuyarina karan (Hebreos 1:4).

4.   Diosta serviqkunaqa manapunin fiestakurankuchu, fiestakunkuman karan chayqa willanmanchá karan Bibliapiqa. Icha, ¿qonqarankuchu Bibliata qelqaqkuna Dios serviqkunaq fiestakusqankumanta qelqayta? Manan qonqankumanchu karan, Bibliapiqa willanmi iskay runakunaq fiestakusqankumanta, paykunan ichaqa Diosta mana serviq runakuna karanku, millaykunataqmi fiestanku p’unchaypiqa pasaranpas (Génesis 40:20-22; Marcos 6:21-29).

 Manan. Testigokunapas lliu tayta-mamakuna jinan munakuyku wawaykuta, chaymi paykunaman ima p’unchaypas qoshallayku regalokunataqa, chaymantapas noqaykuqa ruwaykun fiestakunata chhaynapi wawakunapas chaypi kusirikunankupaq. Dios jinan noqaykuqa imatapas ruwayta munayku, payqa imay ratopas qoshallanmi allin cosaskunata serviqninkunaman (Mateo 7:11). Chaymi Testigokunaq wawankuqa mana imatapas pierdekushankuman jinachu kanku. Wakin wawakunaq imachus nisqankuta yachasun:

•   Tamin kashan 12 watanpi, paymi nin: “Noqaqa mana suyakusqay p’unchaypi regalota qowaqtinkun astawanqa kusikuni”, nispa.

•   11 watayoq Gregorian nillantaq: “Tayta-mamayqa manan nacesqay p’unchaypichu imatapas qowanku, juj p’unchaykunan paykunaqa qonqaylla ima regalotapas qowanku, chaymi noqamanqa gustawan”, nispa.

•   Ericmi kashan 6 watachanpi, paymi nillantaq: “Juj erqekunaqa pastel-llatan mijunku takinku imallan. Manan noqamanqa chhayna fiestakunaqa gustawanchu, wasiypiqa allin fiestakunatamá ruwayku”, nispa.