Ninkun: Testigokunaqa manan jampichikunkuchu, nispa.

 Creesqayku: Testigokunaqa allin tratamientokunatan maskhayku jampichikunaykupaq. Noqaykuña familiaykuña onqoqtinpas, mana yawarllawan operaq allin experienciayoq doctorkunatan maskhayku. Anchatan kusikuyku kay tiempopi medicokuna juj jinamanta jampiy yachasqankumanta. Ñaupaqqa Testigokunallan mana yawarllawan operachikuq kayku. Kunanmi ichaqa askha nacionkunapi juj runakunapas mana yawarllawan operachikushanku. Kunanqa chay tratamientotan ajllakunman yawarpi onqoykunamanta cuidakuq, yawarta cuerponku mana chaskiqtin otaq doctorkunaq pantananmanta cuidakuqpas.

 Ninkun: Testigokunaqa milagrota ruwaspan jampinku, nispa.

 Creesqayku: Jehová Diospa testigonkunaqa manan jayk’aqpas chaytaqa ruwaraykuchu.

 Ninkun: Mana yawarwan operachikuyqa nishutan valen, nispa.

 Creesqayku: Mana yawarllawan tratamientokunaqa aswan pisitan valen. a

 Ninkun: Sapa watanmi askha Testigokuna wawakuna ima wañunku yawarta mana churachikusqankurayku, nispa.

 Creesqayku: Chaytaqa yanqatan rimanku. Cirujanokunan sapa kutilla mana yawarllawan sasa operacionkunata ruwanku. Operankun corazonta, jank’ukunata, tulluta. Cambiankun riñonta, corazonta, jujkunatapas. b Mana yawarllawan operachikuqkunaqa, kuraqpas wawapas ratollan qhaliyanku yawarwan operachikuqkunamantaqa. c Yawarwanña otaq mana yawarwanña juj runata operankuman chaypas, manan pipas yachanmanchu wañunanta kausanantapas.

 Bibliapi Diospa kamachikusqanta respetasqaykuraykun. Antiguo Testamentopi Mosoq Testamentopipas Diosmi kamachikun yawarta mana mijunapaq (Génesis 9:4; Levítico 17:10; Deuteronomio 12:23; Hechos 15:28, 29) Diosmi nin: ‘Kausayqa yawarpin kashan’, nispa (Levítico 17:14). Diosmi kausayta qowanchis, chaymi payta respetasqaykurayku yawarta mana churachikuykuchu.

 Ñaupaqqa manapunin doctorkuna mana yawarllawanqa operayta munaqkuchu. Niqkun: “Manan chayqa atikunmanchu” otaq “wañuyta munaspachá chaytaqa mañakunku”, nispa. Kunanqa manañan chhaynatañachu piensanku. 2004 watapi lloqsimuq medicinamanta revistan nin: “Jehová Diospa testigonkunata imayna jampisqankuta jinan qhepakunaman llapa runakunata jampikunqa”, nispa. d 2010 watapi lloqsimuq medicinamanta willaq revistan nillantaq: “‘Mana yawarllawan operayqa’ manan J[ehová Diospa] t[estigonkunallapaqchu] kanan, llapa runakunatan sapa p’unchaypas chaykunawan operananku”, nispa (Heart, Lung and Circulation).

 Pachantinpin waranqa-waranqanpi doctorkuna yawarta mana usuchiq tratamientokunawan yanapachikuspa mana yawarllawan operanku. Chay tratamientokunaqa wajcha nacionkunapipas kanmi. Chaymi askha runakunaña chay tratamientota chaskishanku.