Jehová Diospa testigonkunaqa Bibliaq nisqanman jinan imatapas ruwayku, chaymantapas Bibliapi kamachikuykunaqa lliupa allinninpaqmi (Isaías 48:17, 18). Bibliapiqa Diospa kamachisqankunan kashan manan runaqchu, chaymi noqaykuqa chayman jinapuni imatapas ruwayku. Chaymi kunan yachasun piwanpas lloqsiymanta o parejayoq kaymanta Bibliaq imachus yachachisqanta. a

•   Casarakuyqa manan juj ratollapaqchu (Mateo 19:6). Chaymi noqaykuqa mana comunllatachu qhawariyku piwanpas lloqsiytaqa. Pipas piwanpas lloqsiyta munan chayqa casarakuypi piensaspan chaytaqa ruwanan.

•   Pipas nishu jovenllaraq kanman chayqa manan piwanpas lloqsinanraqchu. Bibliapin nin: “Pipas mana atinmanchu cuerpon kamachiyta, manataq nishu waynallapasraqchu kanman chayqa, casarakullachun”, nispa (1 Corintios 7:36). Chhaynaqa, pipas casarakunanpaqqa ñan allin yuyayniyoqña kanan.

•   Pipas piwanpas reqsinakuyta munashanman chayqa libren kashanan casarakunanpaq. Wakinqa yaqapaschá esposankumanta o qosankumanta divorciakuranku, ichaqa manachus mayqenninkupas jujwan pantaran chayqa manan librechu kashankuman wajmanta piwanpas casarakunankupaq (Mateo 19:9).

•   Juj cristianoqa iñiqmasinwanmi casarakunan (1 Corintios 7:39). ¿Ima ninantaq chayri? Juj Testigoqa bautizasqa testigollawantaqmi casarakunan, manan pipas Bibliata respetaq runallawanchu (2 Corintios 6:14). Ñaupa tiempomantapachañan Diosqa kamachiran chayta (Génesis 24:3; Malaquías 2:11). Kunan tiempopi allinta estudiaq runakunapas yachankun chayqa allin kasqanta. b

•   Wawakunaqa tayta-mamankutan kasukunanku (Proverbios 1:8; Colosenses 3:20). Sichus juj joven tayta-mamanwan kuskallaraq tiyashanman chayqa, kasukunanmi paykunaq kamachisqanta. Yaqapaschá paykunaqa ninqaku jayk’a watayoq kaspachus casarakunqaku chayta, piwan reqsinakuyta munaqtinpas yaqapaschá ninqaku imaynatas chayta ruwanan chayta.

•   Bibliaq nisqan jina, “sapankan q’epintaqa apanqa” (Gálatas 6:5). Chhaynaqa, sapanka Testigon yachakunan ñachus parejayoq kaytaña munashan icha manaraqchus chayta, pitas munakunqa chaytapas. Ichaqa Bibliaq nisqanman jinan chaykunataqa ruwanan. Chaykunata ruwanankupaq libreña kanku chaypas, wakinqa allin yuyaywan imatapas ruwayta munaspan allin iñiyniyoq hermanokunamanta consejota mañakunku (Proverbios 1:5).

•   Runakunaqa imaymana juchakunatan ruwanku piwanpas reqsinakuspankuqa. Wakinqa manaraq casarakushaspan camamanña apanayukunku jinaspa imaymanakunata ruwanku, wakinqa mana ruwanakunataraqmi ruwankupas, chaytan nikun “qhelli jucha” nispa. Llapa chay ruwaykunaqa prohibisqan kashan Bibliapiqa (1 Corintios 6:9-11). Kaypi piensasun, yaqapaschá pipas piwanpas reqsinakushasqan tiempopi paykunapura llaminayukunkuman, much’anayukunkuman ima, jinapitaq cuerponkuq apasqan astawanraq imatapas ruwayta munankuman, chhayna ruwaykunaqa manan gustanchu Diosmanqa, manaña más cosaskunata ruwarankuchu chaypas millaypaqmi Diosqa qhawarin chay ruwaykunataqa (Gálatas 5:19-21). Wakinqa qhelli simikunatan rimanku, chaykunapas prohibisqan kashan Bibliapiqa (Colosenses 3:8).

•   Bibliaq nisqan jina, sonqoqa traicioneron (Jeremías 17:9). Yaqapaschá piqpa yuyaynintapas tutayachinman, jinaspa yuyaypi chay runaqa ima mana allin ruwaykunatapas ruwanman. Chaymi pipas piwanpas lloqsishan chayqa mana sapallankuqa maypipas qhepakunankuchu, aswanmi jujkunawan compañachikunanku o paykunawan kuska lloqsinanku. Chhaynapin mana ima mana allinpipas tarikunqakuchu (Proverbios 28:26). Chaymantapas juj cristianoqa manan internetpichu parejata maskhanan, ¿imarayku? Manataq allintachu reqsinman chay runata chayqa manan allinchu kanqaku, chayraykun. (Salmo 26:4).