Jehová Diospa testigonkunaqa respetaykun gobiernokunata, respetaykutaqmi jujkunaq banderata napaykusqankuta, juramentota ruwasqankuta, himno nacionalta takisqankutapas.

 Ichaqa chay ruwaykunaqa manan Bibliaq nisqanman jinachu kashan, chaymi Jehová Diospa testigonkunaqa mana chay ruwaykunapi participaykuchu. Noqaykuqa maytan agradecekuyku jujkuna imaynachus piensasqaykuta respetaqtinku, chaymi noqaykupas jujkunaq ruwasqankutaqa respetayku.

Kay yachachikuypin kaykunamanta yachasun:

•  ¿Imaninmi Biblia bandera napaykuymanta, himno nacional takiymantapas?

•  ¿Imatan ruwayku sichus gobiernokuna chaypi participanaykupaq obligawaqtinku?

•  Jehová Diospa testigonkunaqa manan gobiernokuna contraqa sayariykuchu nitaq chayta ruwanankupaq tanqaykuchu

 Chaypaq Bibliapi iskay textota allinta t’aqwirisun.

•   Jehová Diosllatan yupaychananchis. Biblia nin: “Jehová Diosniykitan adoranki pay sapallantataqmi servinkipas”, nispa (Lucas 4:8). Runakunaqa banderata napaykuspapas himno nacionalta takispapas nacionninkuta imamantapas astawan servinankupaqmi juramentota ruwashanku. Chaymi Jehová Diospa testigonkunaqa mana chay ruwaykunapiqa participankuchu.

   Jehová Diospa testigonkunaqa allintan yachayku bandera napaykuyqa banderata yupaychay jina kasqanta, chayqa idolota yupaychay jinan kanman, chay ruwaytaqa Bibliaqa juchachanmi (1 Corintios 10:14). Ñaupa tiempopi imachus pasasqanta estudiaq wakin runakunan ninku: “Banderaqa juj ídolo jinan”, nispa. Carlton Hayes runan nirqan: “Sapanka nacionmi banderayoq kanku, llapa runapaqpas nacionninkuq banderanqa importanten, chaymi yupaychanku” nispa. a Chaymantapas Daniel Mannix runan nillarqantaq: “Ñaupa tiempopi cristianokunaqa manan Roma reyman sacrificiokuna jaywayta munarqankuchu, chayqa kaqllan kunan tiempopi banderata napaykuywan”, nispa. b

  Jehová Diospa testigonkuna manaña banderata napaykuykuchu chaypas, manan banderataqa llik’iykuchu kanaykuchu ni ima mana allintapas ruwaykuchu.

•   Diospaqqa llapa runapas igual-llan kanchis (Hechos 10:34, 35). Bibliaq nisqanman jinaqa “Diosqa juj runallamantan llapa runata ruwarqan” (Hechos 17:26). Chaymi Jehová Diospa testigonkunaqa mana mayqen nacionmanpas mayqen ayllumanpas sayapakuykuchu nitaq pisichaykuchu. Noqaykuqa may nacionmantaña may llaqtamantaña kayku chaypas llapankutan respetayku (1 Pedro 2:17).

 Jehová Diospa testigonkunaqa manan mayqen gobierno contrapas kaykuchu. Diosmi permitirqan gobiernokunaq kananta (Romanos 13:1-7). Chaymantapas cristianokunaqa yachaykun autoridadkunata kasukunayku kasqanta (Lucas 20:25).

 Ichaqa, ¿imatan ruwasunman sichus juj gobierno Diospa kamachisqan contra imatapas ruwananchispaq niwaqtinchis? Mayninpiqa juj solicitudtan apachisunman orqomusqanku leykunata cambianankupaq. c Manaña chay cambiokunata ruwayta munankumanchu chaypas noqanchisqa respetowanmi chay gobiernokunata qhawarinanchis, ichaqa kamachikuq “Diostan ñaupaqtaqa kasukunchis runakunata kasukunanchismantaqa” (Hechos 5:29).

 Jehová Diospa testigonkunaqa manan politicapipas ni ima ch’aqwaypipas participaykuchu, manan nacionniykuta imamantapas ñaupaqta servinaykupaq juramentota ruwaykuchu, manan banderatapas napaykuykuchu, nitaq himno nacionaltapas takiykuchu. Chaytaqa ruwayku manan gobiernokuna contra kasqaykuraykuchu, aswanpas Bibliaq nisqanta kasukusqaykuraykun.