Jehová Diospa testigonkunaqa Bibliata kasukusqaykuraykun mana politicapiqa participaykuchu. Manan imatapas ruwaykuchu politicapi imapas cambiananpaq, manataqmi ima partidopaqpas ni ima candidatopaqpas votaykuchu. Manan noqaykumantaqa pipas candidatoqa kanchu, manataqmi ima cambiokuna aparikunanpaqpas imatapas ruwaykuchu. Ichaqa, ¿imaraykun mana chaykunata ruwaykuchu? Bibliapiqa imaymana razonkunan kan mana chaykunata ruwanaykupaq, chaykunamanta kunan yachasun.

•   Noqaykuqa Jesuspa ejemplontan qatikuyku, payqa manan participaqchu politicapiqa (Juan 6:15). Chaymantapas paypa nisqan jina, discipulonkunapas “manan kay pachamantachu” kananku karan. Chaymi noqaykuqa mana apoyaykuchu ima partidotapas (Juan 17:14, 16; 18:36; Marcos 12:13-17).

•   Noqaykuqa Diospa gobiernontan apoyayku, chay gobiernomantan rimaykupas, Jesuspunin niran: “Diospa gobiernonmanta allin willakuykunan pachantinpi willasqa kanqa”, nispa (Mateo 24:14). Chay gobiernota apoyasqaykuraykun noqaykuqa mana participaykuchu politicapiqa, may nacionpiña tiyayku chaypas manapunin ima partidotapas yanapakuykuchu. Aswanmi noqaykuqa Diospa gobiernonmanta willanaykupaq kamachisqa kashayku (2 Corintios 5:20; Efesios 6:20).

•   Ima partidomantapas kaykuman o ima partidotapas apoyaykuman chayqa, manachá faciltachu pi runawanpas rimaykuman. Chaymi noqaykuqa tukuy ima rimasqaykupipas, tukuy ima ruwasqaykupipas Diospa gobiernollanpi confiasqaykuta rikuchiyku. Chaymantapas chay gobiernollan kay pachapi tukuy ima mana allintapas allichanqa (Salmo 56:11).

•   Chaymantapas, politicapi participaykuman chayqa manachá atiykumanchu llapa iñiqmasiykunawan juj yuyaylla kausayta (Colosenses 3:14; 1 Pedro 2:17). Yachasqanchis jinapas, politicapi participaq religionkunaqa t’aqanasqan kashanku (1 Corintios 1:10).

 Respetaykun autoridadkunataqa. Manaña politicapi participaykuchu chaypas, respetaykun autoridadkunataqa. Bibliapipunin nin: “Autoridadkunataqa lliu runan kasukunan”, nispa (Romanos 13:1). Chaymi noqaykuqa kasukuyku autoridadkunaq orqomusqan leykunata, pagaykun impuestokunatapas. Kasukuykun runakunaq allin kausanankupaq orqomusqanku ima kamachikuytapas. Manataqmi jayk’aqpas autoridadkunaq contranpiqa imatapas ruwaykuchu, aswanmi noqaykuqa Bibliaq nisqan jina paykunapaq Diosmanta mañapuyku; religionmanta ima decisiontapas ruwananku kaqtinmi astawanqa chayta ruwayku (1 Timoteo 2:1, 2).

 Llapa runapas libren kanku politicapi participananpaq mana participananpaqpas, chaymi noqaykuqa mana pitapas jark’aykuchu. Elección kaqtinpas manan imatapas ruwaykuchu chaykuna aparikunan contraqa, manataqmi jark’aykuchu votay munaq runakunatapas.

 ¿Chayraqchu politicamanta t’aqakushayku? Manan. Ñaupa tiempomantapachan apostolkunapas cristianokunapas manapuni politicapiqa participaqkuchu. Paykunamantan juj libropi nin: “Paykunaqa yacharankuña autoridadkunata kasukunanku kasqanta chaypas, manan chaypiqa participaqkuchu”, nispa. Chaymantapas chay tiempopi kausaq Orígenes sutiyoq runan nillarantaq: “Cristianokunaqa manan munankuchu ima autoridad kaytapas”, nispa.

 ¿Manchakunankuchu autoridadkuna chhayna kasqaykumanta? Manan manchakunankuchu, noqaykuqa thaj kausaq runakunan kayku. Politicapi mana participasqaykumantan 2001 watapi “Academia Nacional de Ciencias de Ucrania” nisqa juj informeta orqomuran, chaypin nin: “Manapaschá wakinmanqa gustanchu Testigokunaq chhayna kasqan. Chhayna kasqankumantan ‘nazi’ nisqa, jinallataq ‘comunista’ nisqa gobernantekunapas paykunataqa sentenciaranku”, nispa. “Comunista” nisqa nacionpi qatikachasqa kasqaykumantan chay informepi nillantaq: “Chhaynaña kaqtinpas paykunaqa respetashallarankun leykunataqa, honradowanmi granjakunapi fabricakunapi ima llank’aqkupas, manapunin chay nacionpi autoridadkunataqa amenazaqkuchu”, nispa. Chay informepin nillantaq: “Jehová Diospa testigonkunaq chhayna kasqankuqa manan manchakunapaqchu, manan paykunaqa ima naciontapas amenazankuchu”, nispa.