Pagsanján nisqa llaqtaq qayllanpi kaq cataratataqa askha turistakunan qhawaq rinku, chayqa Filipinas nacionpin kashan. Chaypiqa pobrellan runaqa karan chaypin papayqa tiyaran. Chaymantapas autoridadkunapas manan allintachu gobiernaqku aswanpas suwakuqkun, chayta rikuspan papayqa nishu k’araq sonqo runaman tukupuran.

 Noqaykuqa pusaq wawakunan karayku, uywawanankupaqmi tayta-mamaykuqa nishuta llank’ananku karan. Paykunaqa manan wasipiqa kaqkuchu, aswanpas chajrallapiñan kaqku. Noqawan Rodelio hermanoywanmi sullk’aykunata cuidaq kayku, nishu yarqaypin kaq kayku. Juch’uykunallaraqmi karayku, pujllayllatan yachaq kayku. Qanchis wataykumantaqa ñan llank’aq riqña kayku. Orqo-orqokunantan cocota q’epiq kayku, mana q’epiyta atispataq suchuchispa apaq kayku.

 Papaykuqa nishu maqakuqmi karan, mamaykuta maqaqtinmi nishuta sonqoyku nanaq. Mamaykumantan atajakuyta munaq kayku ichaqa manan atiqchu kayku. Chaymi Rodelio hermanoywan planearayku wiñaruspa papaykuta wañuchinaykupaq. ¡Anchatan munaq kani sumaq munakuq papayoq kayta!

 Millay papay kasqanraykun noqapas k’araq sonqoman tukupurani, chayraykun 14 wataypi kashaspa wasiymanta ripurani. Callekunapin tiyaq kani, marihuana nisqa drogatan consumirani. Chaymantataq boteta manejaspa llank’arani, turistakunatan catarataman apaq kani.

 Manila nisqa llaqtapin universidadman jaykurani. Ichaqa catarataman viajanay kasqanraykun mana tiempoy aypawaranchu estudianaypaq. Chay ruway munasqaypas mana atikusqanraykun marihuana nisqa drogata astawan consumiq kani. Chaywanpas manan contentakuqchu kani chayraykun metanfetaminas, cocaína, heroína nisqa drogakunatañataq consumirani. Nishuta drogakusqayraykun qhelli kausaypi purirani. Llaqtaypiqa pobrekunallan karayku, manan justiciapas karanchu, nishu sufrimientollan karan. Gobiernotan nishuta cheqnikuq kani, tukuy mana allin kasqanmantan juchachaq kani. Diostan tapuq kani: “¿Imaraykun khayna kausay?”, nispa. Ichaqa manan mayqen religionpas chay tapukusqaytaqa kutichiwarankuchu. Llakikuyniyta thaj nichiwananpaqmi astawan drogakuq kani.

 1972 watapin Filipinaspi estudiantekuna gobierno contra jatariranku. Noqapas chaypin purirani ichaqa mana allinpin tukuran. Askhatan carcelman aparanku, chaymantataq manaña gobierno contra jatarinankupaq juj leyta orqoranku nacionnintinpi orden kananpaq.

 Jujmantan callekunapi tiyallaranitaq, ichaqa gobierno contra jatariqkunawan purisqaymantan autoridadkunata manchakuq kani. Drogata rantinaypaqmi suwakuq kani, qhapaq runakunapaq, extranjerokunapaq iman servicios sexuales nisqata ruwaq kani. Manan importawaqchu kausay otaq wañuypas.

 Mamayqa juj sullk’aypiwanmi Jehová Diospa testigonkunawan Biblia estudiayta qallarisqaku. Papayqa sinchita phiñakuspan mamaypa qelqakuna chaskikusqanta ruphaykachisqa. Chaywanpas manan paykunaqa saqerankuchu jinaspa Testigo kapuranku.

 Juj p’unchaymi papayta juj Testigo Diospa promesankunamanta rimapayasqa, chaypi manaña mundontinpi sufrimiento kananmanta (Salmo 72:12-14). Chay promesakunata uyarispan papayqa Biblia estudiayta qallarisqa. Papayqa manan allin gobierno kanallantachu yachasqa, yachallasqataqmi allin qosa allin tayta kanantawan Dios munasqanta (Efesios 5:28; 6:4). Chaymantataq papaypas juj hermanoykunapas Testigoman tukupusqaku. Noqaqa karupin familiaymantaqa kasharani, chaymi mana chaykunataqa yacharanichu.

 1978 watapin Australiaman ripurani. Ichaqa manan chay qhapaq llaqtapipas thaj kaytaqa tariranichu. Seguishallaranin alcoholta ujaspa drogakuspa ima. Chay watallapin Testigokuna visitamuwaranku. Bibliapin rikuchiwaranku kay pachapi thaj kausay kananmanta, ichaqa manan paykunapiqa confiayta atiranichu.

 Chay qhepallamanmi Filipinasta kutirani, chaypin hermanoykuna willawaranku papayqa sumaq runa kananpaq cambiashasqanta, noqan ichaqa mana qonqayta atiranichu millay runa kasqanta, chaymi mana visitaq riranichu.

 Sullk’a hermanaymi Bibliawan yachachiwaran imarayku sufrimiento injusticia kay pachapi kasqanta. Admirakuranin Bibliawan sullk’a hermanay tapukusqay tapuykunaman kutichiwasqanmanta. Manaraq Australiaman kutipushaqtiymi papay Usted puede vivir para siempre en el paraíso en la Tierra  a nisqa librota qowaran. Niwarantaqmi: “Kay libron yanapasunki”, nispa. Niwallarantaqmi Australia nacionman chayaspay Jehová Diospa Testigonkunata maskhanaypaq.

 Papaypa niwasqantan kasukurani, chaymi Jehová Diospa testigonkunaq juñunakunanku wasita maskhaspa tarirani. Bibliamanta estudiota munachiwaqtinkuqa aceptaranin. Bibliapi profeciakunatan leerani Daniel libropi 7 capitulota chaymantataq Isaías libropi 9 capitulota, chaypin yacharani Diospa gobiernonqa mana kay pachapi gobierno jinachu kasqanta, jamuq tiempopi chay gobierno kamachiwananchista ima. Yachallaranitaqmi kay pacha paraisoman tukupunanta. Dios serviytan munarani, ichaqa chaypaqqa manañan drogakunaychu nitaq alcoholtapas ujanaychu karan, millay caracterniyta, qhelli kausayniyta iman saqenay karan. Chaymi tiyasqay warmimanta separakapurani, vicioykunatapas saqepuranin. Jehová Diospi pisi-pisimanta confiaspan cambianaypaq yanapawananta mañakurani.

 Pisi-pisimantan entienderani Bibliamanta yachay juj runata cambiasqanta. Bibliaqa ninmi: “Mosoq runa kaywan p’achawan jina churakuychis”, nispa (Colosenses 3:9, 10). Cambianaypaq kallpachakuspaymi repararani Biblia yanapawasqanta, chaypin cuentata qokurani hermanoykunaq papaymanta nisqanqa cheqaq kasqanta. Papaytaqa manañan enemigoyta jinañachu rikuyta munarani, aswanpas phiñachinakusqaykutan arreglapuyta munarani. Chaymi perdonarani jinaspa papayta cheqnikusqayta qonqapurani.

 Waynallaraq kashaspayqa millay runakunaq portakusqanta jinan noqapas portakuq kani. “Mana allin runakunawan juñukuspaqa allin ruwaykunatan qonqapunkichis” nispa Bibliaq nisqanqa cheqaqmi karan (1 Corintios 15:33). Ichaqa Testigokunawan juñukuspan allin amigokunata tarirani, paykunan yanapawaranku allin runa kanaypaq. Chay amigoykunamanta jujninmi karan esposay Loretta. Iskayniykun runakunaman yachachiyku “Bibliaqa yanapasunkin” nispa.

 Bibliaq yanapayninwanmi papayqa cambiapuran, manaña cambiananpaq jinañachu karan chaypas: payqa munakuq qosan kapuran, humilde sonqoyoq ima. 1987 watapi bautizakusqay pasaytan papaywan primera vez abrazanakurayku.

 Treinta y cinco más watakunan papaywan mamaywanqa sumaq suyakuymanta Bibliapi yachachisqanta predicaranku. Papayqa allin llank’aq runamanmi tukupuran, jujkunata yanapaq kasqanmantan allinta reqsiranku. Tiempowanqa papaytaqa munakuranin respetarani iman. Orgulloson wawan kasqaymanta sientekurani. 2016 watapin papayqa wañukapuran, ichaqa iskayniykun caracterniykuta Bibliaq yanapayninwan cambiarayku. Kunanqa cheqaqtapunin qonqapuni cheqnikusqaytaqa. Anchatan agradecekuni Jehová Diosta tarisqaymanta, paymi tukuchinqa familiakunata sufrichiq problemakunata.