Montreal llaqtapin nacerani, chayqa kashan Quebec provinciapin Canadá nacionpi. Tayta-mamayqa sumaqtan uywawaranku kinsa wayqeykunatawan kuskata, chaymi kusisqa kausarayku. Rosemont barriopin tiyarayku.

 Juch’uyllaraq kasqaymantapachan Bibliamanta yachayta munarani, chaymi 12 wataypi kashaspa Jesuspa vidanmanta Nuevo Testamentopi leerani. Chay leesqaypin yacharani Jesusqa ancha munakuq, khuyapayakuq kasqanta. Jesuspa chhayna kasqanqa anchatan gustawaran, chaymi pay jina kayta munarani. Ichaqa wiñasqayman jinan chayqa chinkapuran, mana allin amigokunawanmi juñukuyta qallarirani.

 Papayqa músicon karan, paymanqa gustaqpunin musicaqa, saxofontan tocaq. Noqamanpas anchatan música tocay gustawaran, chaymi guitarra tocayta ratulla yacharani. Tiempowanmi amigoykunawan grupoyta formarani, rock nisqa musicatan conciertokunapi tocaq kayku. Chaymantapas discokunata ruwaq allin reqsisqa runakunan juj contratota firmachiwaranku paykunawan llank’anaypaq, chaymi tocasqay musicaqa allin reqsisqa kapuran. Tocasqayqa Quebec llaqta radiopin uyarikuq.

 Allin reqsisqa, askha qolqeyoq, wayna, imachus gustawasqanta ruwaspa, gimnasiota rispa iman kusisqa kaq kani, manapas imapas faltawanmanchu jinan kaq kani. Chaymantapas allin reqsisqa kasqayraykun firmakunata firmaq kani, televisionpipas lloqsimullaqmi kani. Tutakunataq fiestakunapi tocaq kani. Chay fiestakunapiqa askha runakunan kaq, chaymi qallariypiqa chayta aguantanaypaq alcoholta ujaq kani, chaymantataq drogakuq kani. Mana allin ñanpin purisharani, manan piensaranichu qhepaman imapi tarikunayta.

 Askha runakunan kusisqa kausanaypaq piensaspa noqa jina kayta munaranku, ichaqa noqaqa manan kusisqachu kausasharani, astawanqa sapallay kaspan llakiq ñit’isqan kaq kani. Chaymantapas discokunata ruwaq iskay jefeykunan sida onqoywan wañupuranku, chayqa sinchi llakikunapaqmi karan. Gustawaranmi música tocayqa, ichaqa imayna runakunawanchus kausasqayqa millakunapaqmi kasharan.

 Allin reqsisqaña imaymanayoqña karani chaypas, reparaqmi kani kay mundo millayman tukupushasqanta. Mayninmi tapukuq kani: “¿Imaraykutaq kay mundopiri nishu injusticia kan? ¿Imaraykutaq Diosri mana imatapas ruwanchu?”, nispa. Mayninpiqa mañakuqmi kani Diosmanta, “kutichimuway” niq iman kani. Juj kutinmi lliuta purisharani tocaspa, chaypin juj llaqtaman chayaspay juj rato Bibliata jujmanta leerani. Manan faciltachu Bibliataqa entiendeq kani, ichaqa chay kutipin entienderani tukukuyqa cercapiña kashasqanta.

 Bibliata leeshaspan entienderani Jesusqa ch’inneqpi kashaspa 40 p’unchay ayunasqanta (Mateo 4:1, 2). Chaymi nirani: “Noqapas chayta ruwasaq chayqa yaqapaschá Diosqa noqaman rijuriwanman”, nispa. Chaymi ima p’unchaytachus ayunayta qallarinaypaq decidikurani. Ichaqa ayunanaypaq iskay semana faltashaqtinmi Jehová Diospa iskay testigonkuna punkuyta takaykamuranku, chaymi noqaqa kaqratopacha wasiyman pasaykachirani. Chaymi Jacques sutiyoq hermanota uyanta qhawaspa tapurani: “¿Imaynapitaq sut’intapuni yachasunman tukukuy p’unchaykunapi kausashasqanchista?”, nispa. Jinan payqa Bibliamanta leewaran 2 Timoteo 3:1-5 textota. Noqaqa imaymanatan tapurani, paytaq Bibliawanpuni allinta kutichiwaran, chaymi convencewaran. Visitawasqanman jinataq entienderani mana ayunanaychu kasqanta.

 Jehová Diospa testigonkunawanmi Biblia estudiayta qallarirani. Tiempowantaq chujchayta rutuchikuspa juñunakuykunaman riyta qallarirani. Juñunakuykunapiqa sumaqtan chaskiwaranku, chaymi convecewaran cheqaq religionta tarisqayta.

 Bibliapi yachasqayta ruwayman churanaypaqmi usqhaylla vidayta cambiarani. Qhelli kausaypi puriyta, drogata iman saqepurani. Chaymantapas jujkunatan yanapanay karan, manan noqallapichu piensanay karan. Sapallaytaq wawaykunata uywaq kani chayqa, tukuypin wawaykunata yanapanay karan allillan kanankupaq, Diostapas reqsinankupaq. Músico kasqayta saqepuspan juj fabricapi llank’anata aceptarani, chay llank’anapiqa manan allintachu pagawaqku.

 Manan facilchu karan vidayta cambiayqa. Saqepuytan musharani drogakunata, ichaqa cuerpoymi mañawaq, mayninpiqa khatatataqraqmi kani, chaymi cuerpoyta mana venceyta atispa jujmanta drogakuq kani. (Romanos 7:19, 21-24). Ichaqa aswan sasaqa karan qhelli kausayta saqeymi, manapunin facilchu chayqa karan. Chaymantapas may sasan noqapaqqa llank’ay karan, pisitataqmi pagawaqkupas, chaykunawanmi pisipaq kani. Músico kashaspaqa iskay horallapin kunan kinsa killapi ganasqayta ganaq kani.

 Diosmanta mañakusqaymi yanapawaran vidayta cambianaypaqqa. Chaymantapas sapa p’unchaymi Bibliata leeq kani. Chay leesqaymi mayta yanapawaran, jujninmi karan 2 Corintios 7:1, chay textopin kallpachashawanchis ‘tukuy ima qhellimanta cuerponchistapas sonqonchistapas limpiakunanchispaq’. Chaymantapas Filipenses 4:13 texton yanapawaran mana allinkuna ruwashasqayta saqepunaypaq, chaypin nin: “Tukuy imapaqmi kallpa qowaqniyqa kallpata qowan”, nispa. Jehová Diosqa uyariwaranmi mañakusqayta, yanapawarantaqmi Bibliapi yachachikuykunata entiendenaypaq. Chaymi noqaqa payllataña servinaypaq prometekurani (1 Pedro 4:1, 2). 1997 watapi bautizakuspan testigo kapurani.

 Ñaupaqpi jinallachus mana allinta kausaspa purishayman karan chayqa wañupuymanñan karan. Kunanmi ichaqa kusisqa kausani. Esposay Elviepas juj regalo jinan noqapaqqa, paywan kuskan kunanqa tukuy tiempoykuwan Diosta servishayku, anchatan kusikuyku runakunaman Bibliamanta yachachispa. Kunanqa kusisqan kashani, maytan Jehová Diosta “gracias” nini payta reqsinaypaq pusamuwasqanmanta (Juan 6:44).