Finlandia nacionpa Tampere llaqtaq camponpin tiyarayku. Familiayqa manan religiosochu karanku, ichaqa yachachiwaqkun allin portakuyta allin educacionniyoq kayta ima. Mamayqa Alemaniamantan, juch’uyllaraq kashaqtiyqa Alemaniatan riq kayku abueloykunaq tiyasqanta.

 Gustawaqmi pujllay chaymi juch’uy kasqaymantapacha practicaq kani. 14 wataypi kashaspaymi tenista pujllanaypaq decidikurani. 16 wataypi kashaspataq sapa p’unchay iskay kutita otaq kinsa kutita entrenaq kani. Iskay kutitaqa profesorniywanmi entrenaq kani, tardenkunatan ichaqa sapallay entrenaq kani. Tenista pujllaspaqa kallpayta umayta iman llank’achiq kani chaymi gustawaq. Mayninpiqa gustawaqmi amigoykunawan cerveza tomay, ichaqa manan jayk’aqpas nishutaqa tomaranichu nitaq drogatapas consumiranichu. Tenis pujllayllamanmi dedicakuq kani.

 17 wataypi kashaspaymi tenis pujllaq asociacionpi participarani ATP nisqapi. a Askha campeonatokunapin ganarani, chaymi allin reqsisqa nacionniypi karani. 22 wataypi kashaspayqa ñan mundontinmanta 50 mejor pujllaqkuna ukhupiña kasharani.

 Askha watakunan mundontinta tenis pujllaq rirani. Jinantin lugarkunatan purirani, chaypin cuentata qokurani mundontinpi imaymana problemakuna kasqanta. Ejemplopaq, Estados Unidos nacionpin niwaranku “wakin lugarkunataqa manan rinachu nishu peligroson” nispa. Chaykunaqa llakichiwaqmi. Gustawasqantaña ruwasharani chaypas, imapas faltawashanman jinan sientekurani.

 Noviaymi karan Sanna sutiyoq, payqa Jehová Diospa testigonkunawanmi Biblia estudiayta qallarisqa. Admirakuranin religionniyoqman tukupushasqanmanta, ichaqa manan jark’aranichu estudianantaqa. 1990 watapin casarakapurayku, watamantataq esposayqa bautizakapuran. Noqaqa manaña religiosochu karani chaypas Diospiqa creeranin. Alemaniamanta abuelitayqa Bibliata leellaqmi, Diosmanta mañakuytapas yachachiwaranmi.

 Juj p’unchaymi juj pareja Testigokuna invitawaranku wasinkuta visitanaykupaq. Hermanoq sutinmi karan Kari, paymi rimapayawaran ‘tukukuy p’unchaykunamanta’ (2 Timoteo 3:1-5). Chaymi sonqoyman chayaran, chayraqmi cuentata qokurani imarayku kay mundopi imaymana pasashasqanta. Chay p’unchayqa pisillatan religionmantaqa rimarayku. Ichaqa chay p’unchaymantapachaqa Kariwanqa Bibliamantaqa rimallaqmi kayku. Bibliamanta yachasqayqa tuparanmi kay pachapi pasasqanwan. Noqaqa viajasqayraykun ocupasqalla kaq kani, Kariwanqa manan tupaqchu kayku. Chhaynaña kaqtinpas cartakunata qelqaspan tapukuyniykunaman kutichimuwaq. Chaypin repararani tukuy tapukusqaykunataqa Bibliawan kutichiwasqanta. Pisi-pisimantan Biblia imamanta yachachisqanta entienderani: Diospa gobiernonmi Diospa munasqanta cumplinqa. Diospa sutin Jehová kasqantan yacharani, chaymantapas imaymanata noqanchisrayku ruwasqanmanta yachaymi sonqoyman chayawaran (Romanos 10:13). Astawanqa sonqoyman chayaran Jesús noqanchisrayku sacrificakusqanmi, chayqa manan juj kamachikuyta junt’ayllachu aswanpas Dios anchata munakuwasqanchismi (Juan 3:16). Chaymantapas yacharanin Diospa amigon kay atisqayta, sumaq paraisopi tiyay atisqaytapas (Santiago 4:8). Chaymi tapukurani: “¿Imatan ruwayman Diosta agradecekunaypaq?”, nispa.

 Piensaranin vidaywan ima ruwashasqayta. Bibliapin yacharani “qoypin aswan kusikuyqa” kasqanta, chaymi jujkunaman yachashasqaymanta willayta munarani (Hechos 20:35). Tenis pujllaqtaq karani chayqa watapi 200 p’unchaykuna jinan wasiymanta karupi karani. Familiayqa noqaq ruwasqaykunamanmi yachakunanku karan: entrenaq purisqayman, pujllaq purisqayman ima. Cuentatan qokurani chhayna kasqayta cambianay kasqanta.

 Religionrayku carrerayta saqepusqaytaqa manan pipas entiendewanmanchu karan. Ichaqa Jehová Diosta reqsisqay, wiñay kausaymanta yachasqaymi noqapaqqa tenista pujllaspa ganasqaymantaqa aswan importante karan; sut’in kasharan ima munasqayqa. Decidisqan kasharani ama jujkunata kasunaypaq. Bibliapi Salmos 118:6 textoq nisqanmi yanapawaran, chaypin nin: “Señor (otaq Jehová) Diosqa noqawanmi kashan, manan manchakunichu. ¿Imanawanmantaq runari?”, nispa.

 Chay tiempopiqa askha empresakunamantan munachiwaranku tenis pujllayman dedicakunaypaq, jinaspa mana imamanta llakikuspa kausanaypaq. Ichaqa decidisqañan kasharani. Tenis pujllaqkunaq asociacionnin munachiwasqantaqa renunciapuranin. Jinaspa Biblia estudiayta seguillarani, chaymantataq 1994 watapi iskay p’unchay juliopi bautisakapurani.

 Diospi iñinaypaqqa manan desgracia pasawanantaraqchu suyarani. Manataqmi ichaqa ñaupaqpiqa Diostaqa maskharanichu. Piensaqmi kani “allinmi kausayniyqa, manan imapas faltawanchu” nispa. Ichaqa qonqayllan sienterani Bibliamanta cheqaq yachachikuyqa suyawashanmanpas tarinaypaq jinata, chaypin yacharani imapaq kausasqayta. Kunanqa vidayqa aswan allinmi. Familiaywanpas aswan jujllachasqan kausayku. Anchatan agradecekuni wawaykuna ejemployta seguisqankumanta, wawaykunaqa manan pujllaq kasqaytachu seguiranku, aswanpas cristiano kasqaytan.

 Mayninpiqa pujllaniraqmi tenistaqa. Tenis pujllay yachasqaywanmi mayninpiqa vidayta pasani. Mayninpitaq llank’ani entrenador kaspa otaq administrador kaspa. Ichaqa manañan nishutañachu tenis pujllaymanqa dedicakuni. Ñaupaqpiqa askha horakunatan semanapi entrenaq kani allin pujllaq kanaypaq, gananaypaq ima. Kunanqa mastaqa tiempoyta dedicani jujkunata Bibliamanta yachachinaypaqmi, chhaynapi noqa jina paykunapas kasukuspa vidankuta cambianankupaq. Jehová Dioswan amistadniymi kunanqa noqapaqqa aswan importante. Diospa promesankunamanta jujkunaman willaymi anchata kusichiwan (1 Timoteo 6:19).