“Diosmanta cheqaqtapuni yachayta munanki chayqa Jehová Diospa testigonkunawan qhepakuy”. Anchatan admirakurani chay niwasqanwan. Chayta niwashaqtinqa ñan Bibliata estudiasharaniña Testigokunawan. Chay niwasqanmanta imarayku admirakusqayta yachanaykichispaq noqamanta astawan willasaykichis.

 Salvador nacionpi Quezaltepeque llaqtapin nacerani. 15 wayqe-panakunamantan soqta kaq kani. Tayta-mamayqa yachachiwarankun honrado kayta leykuna respetaytapas. Jinaspapas Jehová Diospa testigonkunamanta Leonardowan iskay señorakunapiwanmi mayninpi visitamuwaqku Bibliamanta yachachiwanankupaq. Noqaqa manan ima yachachiwasqankutapas kasuqchu kani, munasqallaytan ruwaq kani. 14 watallayoq kashaspan escuelapi amigoykunawan alcoholta ujaq kayku drogakuqtaq kaykupas. Paykunaqa estudionkuta saqespan juj-jujmanta millay runakunawan (pandillero) juñukuyta qallariranku, chaytan noqapas ruwarani. Callellapiñan sayaq kayku vicioykupaq runakunamanta qolqeta mañakuspa suwakuspa ima.

 Chay juñukusqay runakunatan familiayta jina qhawarirani. Manañan paykunamanta t’aqakuyta munaranichu. Juj kutinmi juj amigoy drogasqa kasharan jinaspa juj vecinoyta maqayta qallariran, vecinoytaq payta qaqata jap’iruspa policiata wajaruran. Noqataq sinchita phiñakuspa amigoyta kacharinanrayku juj k’aspiwan carronta p’anayta qallarirani. Vecinoyqa anchatan valekuwaran amaña chayta ruwanaypaq, noqataq mana kasuspa carroq ventanankunata tukuy imaymananta jaqaynata p’anaykurani.

 18 watayoq kashaqtiymi juñunakusqay runakuna policiawan maqanakuranku. Juj bombata paykunaman choqaykunay kashaqtinmi makiypi phataran. Paña makiyta qhawariqtiymi ñut’u kashasqa jinaspa desmayakurani, chaymantaqa manan ima pasasqantapas yuyaniñachu. Hospitalpi rijch’ariqtiymi willawaranku manaña makiy kasqanta, jinaspapas paña kaq ninriymi mana uyariranchu, paña kaq ñawiytaq manaña ancha rikuranchu.

 Chhaynaña kashaqtiypas, hospitalmanta lloqsispa jinan juñukusqay runakunata maskharani. Chay qhepallamanmi policiakuna jap’iwaspa carcelman apawaranku, chaypiqa astawanmi juñukusqay runakunaman k’askakurani. Ch’isiyaqmi paykunawan kaq kani, desayunopi marihuanata pitasqayku horasmanta puñunayku horaskama.

 Carcelpi kashaqtiymi Leonardo visitamuwaran. Paymi brazoypi tatuaje ruwachikusqayta qhawaykuspa niwaran: “¿Yachankichu iman significan brazoykipi chay kinsa puntokuna?”, nispa. Noqan nirani: “Riki, chayqa significan: sexo, droga, rock and roll nisqa musicapiwan”, nispa. Leonardotaq niwaran: “Chayqa aswanpas significan: hospital, cárcel, wañuypiwan. Ñan hospitalpi karankiña, kunantaq carcelpi kashanki. Reparashankiñachá qhepaman imachus pasanasuykita”, nispa.

 Chayta niwasqanmi yuyaymanachiwaran. Payqa sut’illantan niwasharan, noqallataqmi wañuy pataman churakusharani imayna kausasqaywan. Leonardon niwaran Bibliata estudianaykupaq jinan estudiota qallarirayku. Estudiasqayman jinan cambiayta qallarirani. Bibliapin nin: “Mana allin runakunawan juñukuspaqa allin ruwaykunatan qonqapunkichis”, nispa (1 Corintios 15:33). Chayta kasukunaypaqmi juj amigokunata maskhanay karan. Chaymi manaña amigoykunaq juñukusqanman riranichu, aswanmi carcelpi Testigokunaq ruwasqanku juñunakuyman rirani. Chaypin reqsinakurayku Andreswan, paypas carcelpin kasharan ichaqa ñan bautizakusqaña carcelpi. Paymi niwaran desayunota kuska tomanaykupaq; chaymantapachan manaña desayunopi marihuanata pitapuranichu. Aswanmi sapa tutamanta Andreswan Bibliapi juj textomanta rimaq kayku.

 Chay qhepamanmi grupoymanta runakuna repararanku cambiapushasqayta. Jujnin kaq jefen niwaran noqawan rimay munasqanta. Chayta niwaqtinmi anchata mancharikurani, chay grupokunamanta lloqsiyqa manan facilchu chaymi sonqoypi nirani: “Imataraqchá ruwawanqa imachus ruwasqayta yacharuspa”, nispa. Jinan pay niwaran: “Manañan juñunakuykuna ruwasqaykuman jamunkichu aswanpas Testigokunaq juñunakuyninmanmi rishanki. ¿Imatan ruwayta munashanki?”, nispa. Chaypin willarani Bibliata estudiashasqayta cambiapuyta munasqaytawan. Jinan payqa niwaran: “Sichus kausayniykipi rikuchinki Testigo kay munasqaykita chayqa, llapa gruponchismi respetasunki”, nispa. Chayta niwaqtinmi anchata admirakurani. Chay qhepamanmi niwaran: “Diosmanta cheqaqtapuni yachayta munanki chayqa Jehová Diospa testigonkunawan qhepakuy. Ojalachá manaña millay ruwaykunata ruwawaqchu. Felicitaykin, allintan chayta ruwashanki. Testigokunaqa yanapasunkikun. Noqapas estudiaranin paykunawan Estados Unidos nacionpi tiyashaspa, wakin familiaypas Jehová Diospa testigonkunan kanku. Ama manchakuychu, estudiashallay”, nispa. Cuerpoyqa khatatashallaranraqmi ichaqa kusisqan kasharani. Jehová Diostan “gracias” nirani. Juj urpita jaulanmanta kacharipushankuman jinan sientekurani. Chaypin entienderani Jesuspa nisqanta, paymi niran: ‘Reqsinkichismi imachus cheqaq kasqanta, chay cheqaq kaqtaqmi kacharichisunkichis’, nispa (Juan 8:32).

 Chaywanpas, ñaupaq amigoykunan drogata munachiwaqku, chaymi mayninqa paykunata kasuq kani. Ichaqa sapa kutillanmi Diosmanta mañakuq kani jinan qhepamanqa chay viciota saqepurani (Salmo 51:10, 11).

 Carcelmanta lloqsipuqtiymi jujkuna rimasqaku: “Kunanqa ñaupaq kausayninmanchá kutipunqa”, nispa. Ichaqa chay ruwanaymantaqa aswanmi carcelta askha kutita rirani jujkunaman Bibliamanta yachachinaypaq. Chayraqmi ñaupaq amigoykuna creeranku cambiapusqayta, ñaupaq enemigoykunan ichaqa mana.

 Juj kutinmi juj hermanowan predicashaqtiyku ñaupaq enemigoykuna makinkupi armantinkama muyuykuwaranku. Paykunaqa wañuchiytan munawaranku. Hermanoqa valorta jap’ispan sumaqllata willaran manaña ima grupowanpas kashasqayta. Paykunataq maqaykuwaspa amenazawaranku amaña jayk’aqpas chayninta kutinaypaq jinaspa ripuranku. Bibliaqa cheqaqtapunin yanapawaran cambianaypaq, ñaupaqpi chayta ruwawankuman karan chayqa mayñachá paykunamanta vengakuyman karan. Kunanqa 1 Tesalonicenses 5:15 textopi nisqantan kasukuni, chaypin nin: “Amapuni mayqenniykichispas mana allinmantaqa mana allinllawantaq kutichichunchu, aswanpas jujkuna-jujkunapaq allin kaqllatapuni ruwaychis, chhaynatapuni ruwaychis lliu runapaqpas”, nispa.

 Jehová Diospa testigon kapusqaymantapachan kallpachakuni honrado kanaypaq. Qallariypiqa sasan karan, chaywanpas Jehová Dios, Bibliapi consejonkuna, mosoq amigoykuna iman yanapawaranku cambiapunaypaq. Kunanqa manañan jayk’aqpas chay kausayman kutiyta munaymanchu (2 Pedro 2:22).

 Ñaupaqqa millay caracterniyoq runan karani. Diosta mana reqsispaqa ñachá wañupuymanña karan. Bibliapi yachasqaymi yanapawaran viciokunata saqepunaypaq, ñaupaq enemigoykunawan thajpi kausanaypaqpas, kunanqa mosoq runan kapuni (Lucas 6:27). Amigoykunapas yanapawankun aswan sumaq runa kanaypaq (Proverbios 13:20). Kunanqa mana allinkuna ruwasqaymanta perdonaykuwaq Diostan servini, chaymi kusisqa kausani (Isaías 1:18).

 2006 watapin soltero qharikunapaq escuelapi capacitacionta chaskirani. Chay qhepamanmi juj sumaq warmiwan casarakurani jinaspa juj ususiyoq kapurayku. Kunanqa tukuy tiempoywanmi jujkunaman yachachishani yanapawasqan yachachikuykunata. Jinaspapas congregacionniypin umalli kashani, chaypin wayna-sipaskunata rimapayani ñaupaqpi purisqay ñanmanta cuidakunankupaq. Kunanqa manañan wañuy patamanchu churakuni, aswanmi kallpachakushani Bibliapi Diospa prometesqan kausayman aypanaypaq.