Ñucanchi mamitacuna vijsayu quidajpimi, ñucanchi causaica callarin. ¿Imashinata callarin? Primeroca, cigoto nishca uchilla uchilla celulagumi tiai callarin. Chai celulaca aguja utujumandapash ashtahuan yali uchillagumi can. Huaquin quillacuna jipami, chai shujlla celulagumandaca, shuj llullu huahuagu formarin. Cigoto nishca celulagumi multiplicarin, cambian y 200 yali diferente celulacuna tucun. Chai celulacunaca cada unomi, shuj shuj forma, shuj shuj tamañocuna tucun. Y cada celulami shuj shuj cosascunapa especializarin.

 Caipi yuyapai: Cigoto nishca celulaca ADN nishcatami charin. Chai ADNpa copiata rurashpami, cigoto nishca celulaca ishcaipi dividirin. Chai ishcaipi dividirishca celulacunapashmi tauca viajeta shuj shuj celulacunapi dividirin. Callaripica, chai mushuj celulacunaca parecidocunami can. Paicunapa ADNpica, diferente celulacunata formangapaj tucui instrucciongunatami charin.

 Vijsayu quidashcamanda shuj semana jipami, celulacunaca ishcai cosascunapa especializari callarin. Huaquin celulacunaca, huahua cuerpogu formari callarichun embrión nishcami tucun. Cutin shuj celulacunaca, chai embrión viñachunmi ayudan y placentapashmi tucun.

 Ña quimsa semanata vijsayu cajpica, chai embrionba celulacunaca quimsa capacunapimi organizarin. Jahualla capapa celulacunaca, asha ashami nervio angucuna, cerebro, shimi, huahuapa aicha caragu y shuj celulacunapash tucunga. Cutin chaupi capapa celulacunaca, yahuar, tullucuna, riñonguna, musculocuna y shuj celulacunapashmi tucunga. Cutin ucu capapa celulacunaca, pulmonguna, vejiga y vijsa ucupi shuj partecunapashmi tucunga.

 Vijsa ucupi cashca tiempopica, embrionba celulacunaca shujlla cashpa o por grupo cashpapashmi, chai embrionbillata shuj ladomanda chaishuj ladoman cambiarin. Cutin shuj grupo celulacunaca, tandanajushpami shuj lámina cuenda tucun. Chaicunami ashaguta doblarishpa shuj espacio utujugu cuenda tucun. Igual chashna rurangapaca, alipachami celulacunaca organizarina can. Por ejemplo, lámina celulacunaca curvarishpami shuj uchilla tubogucunashna tucun. Chai ratopillatami embrionba shuj ladocunapi lámina celulacunapash shuj uchilla tubogucunashna tucuna can. Chai uchilla tubocunaca asha asha viñashpami shuj shuj ladocunapi formari callarin. Shinami tiempohuanga chai espacio utujucunaca tandanajun y libremente yalijuna ñanshna quidan.

 Shuj sano huahuagu nacirijpica, paipa cuerpopica ashtaca ashtaca millón celulacunami tian. Cada celulami imata ruranata, maipi canata y ima tiempopi canatapash exactotapacha yachan.

 Quiquinga ¿imatata yuyapangui? Imapi especializarinata yachaj celulacunaca ¿yangamandacha shina can? O ¿pipash rurashca caimandacha shina can?