Cusahuarmicunaca diferentecunami can. Diferente cosascunata ruranata gushtajcuna, diferente costumbrecunata charijcunami can. Chaimi paicunapa matrimoniopi ali causanaca ashata difícil ricurin. Pero huaquin cosascunacarin ashtahuan delicadollami can. Por ejemplo:

•   ¿Mashna tiempotashi familiahuanga yalingapaj munanga?

•   ¿Imashinashi culquitaca gashtanga?

•   ¿Huahuacunata charingapaj munangacha?

 Chai cosascunapi na de acuerdo cai ushashpaca ¿imatata cusahuarmicunaca ruraita ushan?

•  Caitami yachana cangui

•  Caitami rurana cangui

 ¿Ali intindiringapaca tucuipichu igual pensana can? Ali intindirishpa causaj matrimoniocunapash na siemprechu lo mismotallata pensarinata yachan. Importante cosascunapipash cambiadotami pensarinata yachan.

 Tamara shuti huarmiguca ninmi: “Ñuca familiaca siempremi igual yalinata gushtan carca. Fin de semanacunataca ñuca abuelocunahuan, tiocunahuan, primocunahuanmi tandanajun carcanchi. Pero ñuca cusapa familiaca, na tanto imacunatapash igual ruranata yachanllu carca. Chaimi familiacunahuan mashna tiempota igual yalinata o carupi familiacunahuan mashna tiempota parlajunataca ñuca cusahuanga na de acuerdo caita ushan carcanchi” ninmi.

 Tyler shuti runaguca ninmi: “Diferenteta viñashcamandami, ñuca huarmiguca shuj cosascunapi y ñucaca shuj cosascunapi culquitaca gashtangapaj munan carcanchi. Chairalla cazarashca primero quillacunapica culquimandami culirarin carcanchi. Chai problemataca tauca viaje parlashpami solucionai ushan carcanchi” ninmi.

 Problemacunata solucionangapaca de acuerdo canallaca na suficientechu can. Por ejemplo, si cusapa o huarmipa mama o taita ungujpi y cuidachun minishtijujpica ¿imatashi ruranga? Si cusa o huarmi huahuata charingapaj munajpi pero chaishuj na munajpica ¿imatashi ruranga? a

 Alexca ninmi: “Ñuca huarmiguhuanga cutin cutinmi huahuata charinamanda parlashcanchi. Paica huahuata charinapica pensarijunllami. Pero ñucaca na shinachu cani. Chaimi shuj acuerdoman chayanaca dificilpacha can” ninmi.

 ¿Diferenteta pensashcamandallachu nalimi causanajun ninchiman? Huaquin especialistacunaca ninmi, delicadolla temacunapi na de acuerdo tucui ushashpaca, maimandami imata munajushcataca pactachina can. Divorciarina minishtirijpipash divorciarinallami can ninmi. Pero shina rurashpaca, ima pasajpipash igualmi cashun nishpa Taita Diosman prometishcataca ladoman saquishpami, paicunapa sentimientocunatalla en primer lugar churanajun.

 Cazarajushpa imata prometishcataca cumplinami capangui. Si ishcandillata imata prometishcata pactachingapaj munanguichica, ima problemacuna ricurijpipash ishcandillata igual solucionangapami esforzaringuichi. Chai problema mishachunga na saquinguichichu.

 Bibliapica ninmi: “Taita Dios tandachishcataca nipipash na separanachu can” (Mateo 19:6).

 Imacunalla minishtirinataca pensarinami capangui. Por ejemplo, cusa o huarmica huahuacunata charingapaj munashcaman. Pero chaishujca na munashcanman. Shina pasajujpica cai cosascunapi pensaripanguichi:

•   ¿Ali amigocuna cashpa catita ushanguichicha?

   ¿Huahuata viñachina preocupaciongunata controlai ushangapaca listochu canguichi?

•   ¿Taitamamapa responsabilidacunata pactachitaca ushanguichicha?

   Taitamamacunaca na solo micunata, ropa o maipi causana pushtugutallachu cuna can.

•   ¿Culquica pactangacha?

   Huahuata charishpaca ¿trabajopi, familiapi y shuj obligaciongunatapash pactachi ushanguichicha?

 Bibliapica ninmi: “Huasita rurangapaj munashpaca ¿nachu primeroca mashna gashtarinatara, huasichi tucuchingapaj culqui pactanata o na pactanatara ricungapaj tiaringuichi?” (Lucas 14:28).

 Imamanda problemacuna tiajtami pensarina capangui. Na de acuerdo tucui ushanajushpapash problemacunataca solucionai usharinmi. Por ejemplo huahuacunata charinamanda parlashpaca, huahuata na charingapaj munajuj cusa o huarmica cai tapuicunapimi pensarita ushan:

•   “Huahuata na charingapaj munanichu nishpaca nunca na charingapaj munashcata o solo cunan horaslla na charingapaj munashcatachu nijuni”.

•   “¿Nali cuidaita ushashachu yashpachu huahuacunataca na charingapaj munani?”

•   “Ñuca cusa o huarmi ña ñucapilla preocuparinata manllashpachu huahuacunata charingapaca na munani”.

 Cutin huahuacunata charingapaj munajuj cusa o huarmica cai tapuicunapimi pensarita ushan:

•   “¿Taitamama cangapaca preparadocunachu canchi?”.

•   “¿Huahuata viñachingapaca culquica pactangacha?”.

 Bibliapica ninmi: ‘Jahua cielomanda ali yachaica intindijcuna cachunmi ayudan’ (Santiago 3:17).

 Cusapa o huarmipa yuyaicunapash ventajata charijtaca yaipimi charina capangui. Ishcai personacuna shuj juyailla pushtuguta igual ricunajushpapash cada unomi diferente cosascunata ricui ushan. Cusahuarmicunapash shinallatami can. Culquita gashtanamanda parlashpaca diferente yuyaicunatami charita ushan. Si imapash cosascunamanda diferente yuyaicunata charishpaca, imapi de acuerdo cashca puntocunatarami parlana capanguichi y chai jipami na de acuerdo cai ushashca puntocunataca parlana capanguichi.

•   ¿Imacunatata ishcandillata pactachingapaj munanchi?

•   Cada unopa yuyaicunaca ¿ima ventajacunatata charin?

•   Matrimoniopi ali causangapaca ¿cusa o huarmi imata nijujta intindingapaj ñucapa o ñucanchipa pensamientocunata cambiai ushanchichu?

 Bibliapica ninmi: “Cada unomi shujcunapa beneficiota mascana capanchi y na ñucanchipa beneficiotallachu mascana capanchi” (1 Corintios 10:24).