FAMILIACUNATA AYUDANGAPAJ | CUSAHUARMICUNAPA

Nara cazarashpallata igual causanaca ¿alicha can?

Cai idiomapi uyangapaj o ricungapaj

Ashtaca parejacunaca nara cazarashpallatami igual causai callarin. Huaquingunaca paicunapura intindirishpa, munarishpa cushilla causai ushanata o na ushanata yachangapami nara cazarashpallata igual causai callarin. Pero ¿chaica alicha can?

Cai temapica cai tapuicunatami yachajupashun:

Bibliapica ¿imatata nin?

Bibliapica nara cazarashpallataca na igual puñunachu can ninmi. Chaimandami ‘huainayana juchamandaca jarcarinami canguichi’ nin (1 Tesalonicenses 4:3; 1 Corintios 6:18). Jipaman cazarashunllami nishpa igual puñunapash na alichu can. a Bibliapi consejocunaca nara cazarashpallata ama pacta puñushpa ama vijsayu quidachunmi ayudan.
Jehová Diosmi matrimoniotaca callarichirca. Chaimi Jehová Diosca nirca: ‘Jarica paipa taitata y paipa mamatami saquinga. Y paipa huarmiguhuanmi tandanajushpa causanga. Ishcandicunaca shujlla aichami tucunga’ ninmi (Génesis 2:24). Cazarashca cashpallami shuj familiaca cushilla ali causaita ushanga.

Nara cazarashpallata igual causanaca ¿matrimoniopi ayudanllu?

Huaquingunaca ari, ayudanmi ninmi. Chaimi ishcandicuna aliguta intindiringapaca huasipi ruraicunata compartina, cada uno imashina cashcata ricunami minishtirishcapacha can nin. Shinapash cusahuarmi cushilla, ali causangapaca ishcandimanda shuj responsabilidadta charishcatami aliguta intindina can.

Alipi cashpa o nalipi cashpapash igual cashpa catingapaca ¿imatata rurana can? Ali o nali causanata yachanamandalla igual causanaca na minishtirinllu. Porque probangapalla igual causajcunaca ima ratopipash separarinllami. Ali causangapaca tanto jari como huarmipash paicunapa responsabilidadta aliguta pactachingapaj y llaquicunata igual arreglangapami esforzarina can.

Shuj shimicunapi nishpaca: Nara cazarashpallata igual causajcunaca cazarangapaca na prepararijunllu. Sino separaringapami prepararinajun.

Bibliapica ninmi: “Imata tarpushpapash chaitallatami cozechashun” (Gálatas 6:7).

Igual causashpaca ¿culquita ahorrashunlla?

Huaquingunaca ari ninmi. Estados Unidospi Pew Research Center nishcaca shuj investigaciondami rurarca. Paicunaca, 10 personamanda 4ca culquimandami igual causai callarin ninmi. Shinapash, huaquin tiempota igual causashca jipaca, cazarashpa igual causangapaca na suficiente culqui tianllu ninmi.

Nara cazarashpallata causajcunaca tauca problemacunatami charin. Ashtahuanbachaca huarmicunami ashtahuan sufrin. Por ejemplo, separarishpaca casi siempremi huarmicuna huahuacunapa cargo tucun.

Shuj shimicunapi nishpaca: Nara cazarashpallata igual causajcunaca ali causanapa randica ashtahuan llaquicunatarami charin.

Bibliapica ninmi: “Ñucami, cangunata Mandaj Taita Dios cani. Ñucami, cangunapaj ali cachun cangunata yachachini” (Isaías 48:17).

Ali cusahuan o ali huarmihuan cazarangapaca ¿igual causanaca minishtirinllu?

Huaquingunaca ari ninmi. Shinapash shuj libropica ninmi: Nara cazarashpallata igual causajcunapaca problemacuna ricurijpi separarinaca shinllimi can (Fighting for Your Marriage [Luche por salvar su matrimonio]). ¿Imamandata shinlli can? Huaquin parejacunaca paicunapura na aliguta intindirishpami na ali llevarita ushan. Pero chaicamanga ñami shuj alcuguta charin, arriendotapash paganajun o shuj huahuagutapash cuidanajun. b Chaimandami investigadorcuna nishcashnaca, huaquingunaca ñana separarita ushashpa, “mejor cazarana cashcamandalla cazaran”. Shuj libropash chaitallami nin (Fighting for Your Marriage).

Shuj shimicunapi nishpaca: Nara cazarashpallata igual causanajuimandami na ali causashpapash huaquinbica separarinaca shinlli ricurin.

Bibliapica ninmi: “Ali yuyaita charij runaca, ima llaqui japinata ricushpaca pacajunmi. Ashtahuangarin na yachajushca runacunaca, yangata rishpa llaquichi tucunllami” (Proverbios 22:3).

¿Imata ashtahuan mejor can?

Nara cazarashpallata na parejo causashpaca huaquin llaquicunamandami jarcarishun. Shinallata cazarashpaca ashtahuan cushilla, alimi causashun. ¿Imamanda shina can? Cusahuarmicunaman Biblia ima nishcatami cazuna can. Chaimandami pihuan cazarangapaj munashpapash nara cazarashpalla ali rijsingapaj tiempota llujchina can. Cusata o huarmita agllagrijushpaca na paihuan cana munaimandallachu cazarana can. Ashtahuangarin ishcandicunami chai creenciacunatallata, chai yuyaicunatallata charina can.

Bibliapica cusahuarmicuna cushilla, ali causachunmi ashtaca consejocunata cun. c Por ejemplo Bibliaca…

… quiquinba cusatalla o huarmitalla juyachunmi ayudanga.
… shuj ali cusa o shuj ali huarmi cachunmi ayudanga.
… noviocuna cashpallata imapi fallajushcata ricuchunmi ayudanga.

Ashtahuan yachajungapaca, Internetpi jw.org paginaman yaicushpa “Familiacunapa” nishca parteta ricupangui.

Bibliapica ninmi: ‘Taita Dios escribichishca shimica, tucuillami paipa yuyaicuna can. Chaimandami yachachingapaj ali can’ (2 Timoteo 3:16).

a “¿Están justificadas las relaciones prematrimoniales si hay amor?” nishca temata ricupangui.

b Cai temaca “Sliding Versus Deciding: Inertia and the Premarital Cohabitation Effect” (“Dejarse llevar o tomar una decisión: la inercia y el efecto de la convivencia prematrimonial”), de Scott M. Stanley, Galena Kline Rhoades y Howard J. Markman, Family Relations nishca revistapimi llujshirca.

c Huaquin llactacunapica taitamamacunami churicunata, ushicunataca pihuan cazaranata agllachun ayudan. Ayudanajushpaca Bibliami taitamamacunataca noviopi o noviapi ima cualidadcunata ricuna cashcata yachachun ayudan.